1 Mbaije 17
17
Njetegginta Eli ila mber ta lə loo gə́ a gə tudu kurum-kurum lé
1Eli, dəw gə́ Tisbe gə́ dɔ naŋg gə́ Galaad lé ula Akab pana: Njesigənea̰ Ala lə Israɛlje gə́ m’to kura ləa lé to Njesikəmba! Mee ləbje’g neelé tàl a kwa el ləm, ndi kara a kər el ləm tɔ nɛ gə goo ta gə́ ma nja m’a pa ɓa#Jak 5.17.
2Tɔɓəi Njesigənea̰ ula Eli ta pana: 3Ḭ loo gə́ nee’g aw par gə́ bər ndá iya rɔi mbɔr mán gə́ Kerit gə́ wɔji dɔ Jurdɛ̰ njoroŋ. 4I a kai mán neelé ləm, tɔɓəi ma m’un ndum mba kar ga̰-ga̰je ɓa d’a kari nésɔ lée’g neelé ləm tɔ.
5Yeḛ ḭ aw gə goo ta gə́ Njesigənea̰ pa ndá yeḛ aw si mbɔr mán gə́ Kerit gə́ wɔji dɔ Jurdɛ̰ njoroŋ lé. 6Gə ndɔ lé ga̰-ga̰je ree gə muru gə da d’aree ləm, kàrkemetag kara ree gə muru gə da d’aree ləm tɔ, tɔɓəi mán gə́ yeḛ si ta’g lé ɓa yeḛ ai. 7Nɛ gə kuree waga ndá mán lé yi tə mbata ndi oso naŋg teŋ mee ɓee’g lé el.
Eli aw kəi lə njekəisiŋga gə́ Sarepta
8Yen ŋga Njesigənea̰ ulá ta nee pana: 9Uba naŋg ḭta aw Sarepta gə́ to ɓee gə́ Sido̰ ndá si lée’g neelé. Aa oo, ma m’un ndum mba kar dené gə́ njekəisiŋga gə́ keneŋ ɓa ari nésɔ sɔ ya#Lug 4.25-26.
10Yeḛ ḭ aw Sarepta lé ya tɔ. Loo gə́ yeḛ teḛ tarəw ɓee-boo’g ya ndá, yeḛ oo dené gə́ njekəisiŋga kára gə́ aar odo kir. Yeḛ ɓaree ulá pana: M’ra ndòo rɔi’g, maji kari aw saŋg mán lam am m’ai.
11Nɛ loo gə́ yeḛ aw gə mba saŋg mán lé ndá Eli ɓar gée gogo ulá pana: M’ra ndòo rɔi’g, gə́ ree gə ga̰ muru jii’g am tɔ.
12Ndá yeḛ tel ilá keneŋ pana: Ala ləi gə́ Njesigənea̰ to Njesikəmba, ma m’koro né el mbata nduji ŋgo ji dəw kára ya to mee jo’g ləm, ubu lam ba bèe mee ku’g ləm tɔ. Ndá aa oo, ma m’aar m’odo ɗuguru ta kir joo gə mba kaw gɔl ne yee neelé mbata ləm-ma gə ŋgonəm kar sí j’usɔ ɓa gə mba kwəi ɓəi.
13Nɛ Eli ulá pana: Ɓəl el, aw kəi aw ra to gə́ i pa lé ya. Nɛ maji kari ila mbə kára ree ne am kédé ɓa i a ra mbata ləi-i gə ŋgoni lé ɓəi. 14Mbata Njesigənea̰, Ala lə Israɛlje pa togə́bè pana: Nduji gə́ to mee jo’g lé a godo el ləm, ubu gə́ to mee ku’g lé kara a godo el ləm tɔ, saar kar ndɔ gə́ Njesigənea̰ a kar ndi ər dɔ naŋg nee ɓa.
15Yeḛ aw ndá yeḛ ra to gə́ Eli ulá lé ya tɔ. Togə́bè ɓa yeḛ si dan nésɔ’g kuree əw yaa̰, yeḛ ləm, gə njémeekəije ləa ləma, gə Eli kara ləm tɔ. 16Nduji gə́ to mee jo’g lé godo el ləm, gə ubu gə́ to mee ku’g lé kara rəm el ləm tɔ, gə goo ta gə́ Njesigənea̰ pa gə ndu Eli lé ya.
Eli ar ŋgon lə njekəisiŋga gə́ wəi lé tel si kəmba
17Gée’g gogo ndá ŋgolə dené gə́ njekəi neelé oso gə rɔko̰, ar rɔko̰ ləa to ɓəl kədm-kədm, aree wəi tɔ. 18Dené neelé dəji Eli pana: See ta ɗi ɓa to mbuna síjeḛ səi-i’d gə́ to dəw lə Ala’g lé wa. See i ree kəi ləm gə mba kolé məəm dɔ néra kori-kori’g ləm gə mba kar ŋgonəm wəi ne wa.
19Yeḛ tel ilá keneŋ pana: Am ŋgoni lé.
Tɔɓəi yeḛ taa ŋgon lé kaar dené’g lé aw ne mee kəi gə́ to dɔ maree’g tar gə́ yeḛ si keneŋ lé ndá yeḛ ila ŋgon lé dɔ tira’g ləa tɔ. 20Yen ŋga yeḛ no̰ ɓar Njesigənea̰ togə́bè pana: Ǝi Njesigənea̰, Ala ləm, see njekəisiŋga gə́ wam mbá rəa’g mee kəi’g ləa nee ya i ula kəmee ndòo ar ŋgonee wəi wa.
21Tɔɓəi yeḛ lab rəa dɔ ŋgon’g lé as gɔl munda, no̰ ɓar ne Njesigənea̰ pana: Ǝi Njesigənea̰ Ala ləm, ma m’ra ndòo rɔi’g, maji kar kəmə lə ŋgon lé tel ree rəa’g gogo#2Mb 4.34-35.
22Njesigənea̰ oo ndu Eli ndá ar kəmə lə ŋgon lé tel ree rəa’g gogo aree tel si kəmba tɔ. 23Eli un ŋgon lé mee kəi gə́ dɔ maree’g tar lé ndá yeḛ risi ur səa naŋg aree kea̰je mee kəi’g ləa. Bèe ɓa Eli pana: Oo, ŋgoni lé si kəmba ya.
24Dené lé tel ula Eli pana: Ɓasinè ma m’gər gao to gə́ i to dəw lə Ala ya, togə́bè ɓa ta lə Njesigənea̰ gə́ teḛ tai’g lé to kankəmta ya.
Currently Selected:
1 Mbaije 17: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
