1 Mbaije 14
14
Ta gə́ gaŋg dɔ Jeroboam’g lé
1Mee ndəa’g neelé Abija, ŋgolə Jeroboam oso gə rɔko̰. 2Ndá Jeroboam ula dené ləa pana: M’ra ndòo rɔi’g, maji kari ḭta tel rɔi ɓəd mba kar dee gəri gə́ dené lə Jeroboam el ndá ɔd aw Silo. Lée gə́ neelé Aija, njetegginta si keneŋ, yeḛ gə́ pata dɔm’g to gə́ m’a gə to mbai lə koso-dəwje neelé. 3Odo pil muru dɔg ləm, gə mbəje ləma, gə ubu tə̰ji ku kára ləm tɔ aw ne kəi ləa ndá, a kulai né gə́ a gə teḛ dɔ ŋgon’g lé ɓəi.
4Dené lə Jeroboam ra togə́bè ya tɔ, yeḛ aw Silo ndá andə mee kəi’g lə Aija. Aija ɓuga yaa̰ ar kəmee oo loo el. 5Nɛ Njesigənea̰ ula Aija pana: Aa oo, dené lə Jeroboam aw gə́ rɔi’g nee gə mba dəjii ta gə́ wɔji dɔ ŋgonee gə́ oso gə rɔko̰. I a kulá ta bèe-bèe. Loo gə́ yeḛ ree lé ndá yeḛ a tel rəa gə́ dené gə́ raŋg ya.
6Loo gə́ Aija oo kaa gɔlee gə́ andə ne tarəwkəi’g ndá yeḛ pana: I dené lə Jeroboam, maji kari andə kəi. See gelee gə́ ban ɓa i tel rɔi gə́ dené gə́ raŋg wa. Ma lé d’ulam mba kam m’ulai taje gə́ kədərə ya. 7Aw ula Jeroboam pana: Aa oo ta gə́ Njesigənea̰, Ala lə Israɛlje pa ɓa nee: Ma m’ɔri mbuna koso-dəwje’g, m’undai gə́ mbai dɔ koso-dəwje ləm gə́ Israɛl. 8Ma m’taa ɓeeko̰ ji gel-bɔje’g lə Dabid m’ari, nɛ i to asəna gə kura ləm gə́ Dabid gə́ aa dɔ godndumje ləm, gə njaa goom’g gə ŋgaw mée bura ləma, gə ra né gə́ danasur kəm’g ləm tɔ lé el. 9I ra némajel unda deḛ lai gə́ nɔḭ’g kédé ndá i aw ra magəje mbata ləi ləm, i léḛ néndajije gə mba kar məəm ḭ ne pu ləma, i ubam ya̰’m gooi’g gogo ləm tɔ. 10Gelee gə́ nee ɓa m’a gə kar meeko̰ oso ne dɔ kəi’g lə Jeroboam ya, dəw gə́ rara gə́ to ka̰ Jeroboam lé, lé yeḛ gə́ to ɓər əsé ŋgonkoji gə́ mee ɓee’g lə Israɛlje kara m’a karee udu bo̰, tɔɓəi m’a kwa mee kəi lə Jeroboam rəw-rəw to gə́ d’wa ne ɓiri-ɓisije saar d’ar dee godo bèe#1Mb 15.29. 11Yeḛ gə́ rara gə́ mee kəi’g lə Jeroboam gə́ a kwəi mee ɓee-boo’g ndá bisije ɓa d’a kusá ləm, yeḛ gə́ a kwəi mee wala’g kara yelje ɓa d’a ko̰ yée ləm tɔ. Mbata Njesigənea̰ ya ɓa pa bèe.
12Nɛ i lé ḭ aw kəi ləi. Loo gə́ i a gə kila gɔli mee ɓee-boo’g pà ya ndá ŋgon lé a kwəi. 13Israɛlje lai d’a nea̰ ləm, d’a dubee ləm tɔ, mbata yeḛ ya kára ba gə́ dəw gə́ mee kəi’g lə Jeroboam gə́ d’a dubee dɔɓar’g ləm, yeḛ ya kára ba gə́ dəw gə́ mee kəi’g lə Jeroboam gə́ d’iŋga néra gə́ maji rəa’g kəm Njesigənea̰ Ala’g lə Israɛlje ləm tɔ. 14Njesigənea̰ a kunda mbai dɔ Israɛlje’g, yeḛ gə́ a kar njémeekəije lə Jeroboam d’udu bo̰ mee ndəa’g neelé. See yee ɓa gə́ né gə́ teḛ ɓasinè mba̰ el wa, 15Njesigənea̰ a ra gə Israɛlje né gə́ kədərə ndá d’a to asəna gə twatɔg gə́ mán ɓiree bèe. Yeḛ a kɔr Israɛlje mee ɓee gə́ maji péd-péd gə́ yeḛ ar bɔ deeje, tɔɓəi yeḛ a sané dee kel tura-baa gə́ nu mbata deḛ ra magəje lə dee d’ar oŋg ḭ ne gə Njesigənea̰ pu ya. 16Yeḛ a sula Israɛlje sɔgɔ kya̰ dee mbata kaiyaje gə́ Jeroboam ra ləm gə kaiyaje gə́ yeḛ ar Israɛlje kara ra ləm tɔ.
17Dené lə Jeroboam lé uba naŋg ḭ aw, ndá yeḛ teḛ Tirsa, tɔɓəi loo gə́ yeḛ teḛ takəi’g ndá ŋgonee lé wəi ya tɔ. 18Deḛ dubee ndá Israɛlje lai nea̰ gə goo ta gə́ Njesigənea̰ ar kura ləa Aija gə́ to njetegginta pa lé ya tɔ.
19Ges sor-néraje lə Jeroboam ləm, gə sorta rɔje ləa ləma, gə ko̰ɓee ləa ləm tɔ lé ndaŋg tareeje lai mee Maktub-sorta néraje’g lə mbaije gə́ Israɛl ya. 20Jeroboam o̰ ɓee ləbee rɔ-joo-giree-joo tɔɓəi yeḛ wəi ndá ŋgonee gə́ Nadab o̰ ɓee toree’g tɔ.
Ɓeeko̰ gə́ Juda gə́ gel Roboam’g
21Roboam, ŋgolə Salomo̰ o̰ ɓee gə́ Juda. Yeḛ ra ləbee rɔ-sɔ-giree-kára ɓa tel to mbai ɓəi ndá yeḛ si ɓee-boo gə́ Jerusalem o̰ ne ɓee as ləb dɔg-giree-siri, to ɓee-boo gə́ Njesigənea̰ ɓa mbəree mbuna ginkoji Israɛlje’g lai mba kar ria ɓar dɔ’g. Kea̰je ria lə Naaman, yeḛ to dəw gə́ Amo̰. 22Judaje ra né gə́ majel kəm Njesigənea̰’g ndá kaiyaje gə́ deḛ ra lé ɔs Njesigənea̰ ar kəmkəḭ ḭ səa dɔ dee’g ur dɔ kəmkəḭ gə́ yeḛ ra dɔ bɔ deeje’g ɓəi. 23Deḛ ya kara d’unda dɔ looje gə́ ndəw d’ar néndajije gə magəje mee dɔdərlooje’g lai gə́ d’ḭ tar ləm, gə gel kagje lai gə́ to təb’g ləm tɔ#2Mb 17.9-10. 24Mee ɓee’g neelé kaiya-diŋgamje gə́ to njéra nérɔkulje taa loo keneŋ pəl-pəl. Deḛ ndaji néje lai gə́ mina̰ lə ginkoji dəwje gə raŋg gə́ Njesigənea̰ tuba dee no̰ Israɛlje’g lé tɔ#TtG 23.17.
25Ləb ko̰ɓee lə Roboam gə́ njekɔm’g mi lé Sisak, mbai gə́ Ejiptə ɔr rɔ aw rɔ gə Jerusalem. 26Yeḛ odo nébaoje gə́ mee kəi’g lə Njesigənea̰ ləm, gə nébaoje gə́ mee kəi’g lə mbai ləma, yeḛ odo néje lai-lai ləm tɔ. Yeḛ odo dərje lai gə́ Salomo̰ ra dee gə larlɔr tɔ#1Mb 10.16-17, 2SgI 9.15-16. 27Mbai Roboam ra dərje gə larkas taa ne tor dee tɔɓəi yeḛ ɔm dərje lé ji ɓé-njérɔkwɔilɔje’d gə́ to njékaḭ bada dɔ looje gə́ ŋgəm takəije lə mbai mba kar dee ŋgəm dee maji tɔ. 28Ndɔje lai gə́ mbai aw mee kəi’g lə Njesigənea̰ lé ndá njéŋgəmlooje d’odo dərje lé, tɔɓəi deḛ tel gə dərje lé d’aw ne kəi-ŋgəm dee’g tɔ.
29Ges sor-néraje lə Roboam gə néje lai gə́ yeḛ ra lé see ndaŋg taree mee Maktub-sorta néraje’g lə mbaije gə́ Juda el wa. 30Rɔ to mbuna Roboam gə Jeroboam’g ta-ta ya. 31Roboam wəi ndá deḛ dubee gə keaje-je mee ɓee-boo’g lə Dabid. Kea̰je ria lə Naaman gə́ to dəw gə́ Amo̰. Bèe ɓa ŋgonee Abijam o̰ ɓee toree’g tɔ.
Currently Selected:
1 Mbaije 14: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
