1 Ja̰ 3
3
1Aa ooje, Bɔ-dəwje lé ndigi sí gə mée gə́ ɔr jol-jol ɓa gə mba kar dee ɓar sí ne ŋgan-Alaje. Tɔgərɔ jeḛ n’to gə́ ŋganeeje ya. Ɓó lé dəwje gə́ dɔ naŋg nee gər sí gə́ ŋganeeje el ndá to mbata deḛ gəree-yeḛ el tɔ#Ja̰ 1.12. 2Seḭ gə́ m’unda sí dan kəm’g lé jeḛ sə síje n’toje ŋgan-Alaje ɓasinè ya. See rɔ sí a tel to gə́ banwa. Yee ɓa to raga pai-pai el ɓəi, nɛ jeḛ n’gər gao loo gə́ yeḛ a teḛ wai ndá j’a to tana səa pai-pai ya mbata j’a kée gə́ dəw gə́ bèe lé ya. 3Nana ɓa gə́ mée to yel gə́ dɔ ta’g neelé ndá a kɔr won kaiya mée’g kar mée àr ne ŋgad-ŋgad to gə́ yeḛ bèe tɔ.
4Nana ɓa gə́ ra kaiya ndá al ta ta godndu’g lé, mbata kaiya lé gə́ kalta ya. 5Seḭ gərje gao, Jeju lé ree mba kɔr kaiya lə dəwje kɔm kɔrɔ nɛ kaiya kára kara uba rəa təb el#Ja̰ 1.29. 6Nana ɓa gə́ nai səa ndá yeḛ ra kaiya el. Nana ɓa gə́ ra kaiya ndá yeḛ ée el ləm, yeḛ gəree el ləm tɔ.
7Ŋganəmje, maji kar dəw kára kara su kəm sí el. Yeḛ gə́ ra né gə́ gə goo rəbee ndá yeḛ to njemeekarabasur to gə́ Kristi to gə́ njemeekarabasur bèe tɔ. 8Yeḛ gə́ ra kaiya ndá yeḛ to gə́ ka̰ njekurai mbata njekurai lé un kudu ra kaiya kédé gə́ dɔtar saar ɓasinè. Nɛ Ŋgon-Ala lé unda loo teḛ gə mba tuji néraje lə njekurai lé.
9Nana ɓa gə́ Ala ojee ndá a ra kaiya nda̰ el mbata kó Ala nai mée’g, yeḛ a kaskəm ra kaiya el mbata Ala ɓa ojee ya. 10Yee neelé ɓa d’a gər ne ŋgan-Alaje gə ka̰ njekurai lé tɔ. Nana ɓa gə́ ra né gə́ lal najee ndá yeḛ to gə́ ka̰ Ala el, yeḛ gə́ lal kunda ŋgokea̰ dan kəmee’g ndá kara yeḛ to gə́ ka̰ Ala el tɔ.
Undaje na̰ dan kəm na̰’d
11Tɔgərɔ ya, ta gə́ deḛ d’unda kunda d’ar sí kédé gə́ dɔtar saar ɓasinè gə́ seḭ ooje taree mba̰ lé to mba kar sí j’undaje na̰ dan kəm na̰’d#Ja̰ 13.34. 12Maji kar sí n’to tana gə Kaḭ el mbata yeḛ to ka̰ njegosoyèr gə́ tɔl ŋgokea̰. See gelee ban ɓa yeḛ tɔlee ne wa. Mbata kula reaje majel nɛ ka̰ ŋgokea̰ lé ɓa to gə goo rəbee#Gn 4.8.
13Ŋgakɔmje, ɓó lé njé gə́ naŋg nee d’wa sí gə meḛ dee kara arje kaar sí ndəb ne el. 14Jeḛ lé jeḛ n’gər gao, j’unda loo-yoo ŋgaŋ j’uru loo kəmə’g lé mba̰ mbata jeḛ j’unda ŋgako̰ síje dan kəm sí’g. Yeḛ gə́ unda ŋgokea̰ dan kəmee’g el ndá yeḛ nai dan loo-yoo’g ɓəi#Ja̰ 5.24. 15Nana ɓa gə́ wa ŋgokea̰ gə mée ndá yeḛ to gə́ njetɔl dəw, tɔɓəi seḭ gərje gao, njetɔl dəw gə́ rara kara lé kəmə gə́ to gə no̰ lé uru kəi mée’g el. 16Kristi lé ya̰ rəa ar yoo mbata lə sí, yee ɓa jeḛ n’gər ne meenoji gə́ gəd ya, maji kar síjeḛ kara j’ya̰ rɔ sí j’ar yoo mbata lə ŋgako̰ síje bèe tɔ. 17Ɓó lé dəw to gə́ njenékiŋga ɓa oo ŋgokea̰ gə́ aw ndòo né ɓa un kəmee dəa’g rəw lal karee né ndá see meenoji lə Ala to mée’g loo gə́ ra’g wa.
18Ŋganəmje, ar sí ndigije na̰ gə nojikwa gə ta sí’g kari ba el nɛ kankəm noji gə́ j’wa gə na̰ lé yee ɓa j’unda ne na̰ dan kəm na̰’d ya. 19Yee ɓa j’a gər gao, jeḛ n’toje gə́ ka̰ kankəmta ya ləm, meḛ sí a koso lemsé nea̰’g ləm tɔ, 20mbata ɓó lé meḛ sí ila ta dɔ sí’g ndá Ala boo unda meḛ sí tɔɓəi yeḛ to gə́ njegər néje lai tɔ. 21Seḭ gə́ m’unda sí dan kəm’g, ɓó lé meḛ sí ila ta dɔ sí’g el ndá j’a koo loo gə mba rəm pər gə́ rɔ Ala’g lé gə meendakaḭ. 22Né gə́ rara ɓa gə́ jeḛ dəjee kara jeḛ n’taa jia’g ya mbata jeḛ j’aa dɔ godndia kər-kər ləm, jeḛ n’ra né gə́ taa kəmee rəgm ləm tɔ. 23Godndia gə́ yeḛ un ar sí ɓa nee: To mba kar sí j’ɔm meḛ sí dɔ ri Ŋgonee Jeju Kristi’g ləm, kar sí j’unda na̰ dan kəm na̰’d gə goo godndu gə́ yeḛ un ar sí lé ləm tɔ#Ja̰ 13.34, 15.12,17. 24Yeḛ gə́ aa dɔ godndiaje kər-kər ndá yeḛ naḭ gin Ala’g ləm, ala kara naḭ mée’g ləm tɔ. Ndil gə́ yeḛ aree to meḛ sí’g lé ar sí n’gər gao to gə́ yeḛ naḭ meḛ sí’g ya.
Currently Selected:
1 Ja̰ 3: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
