1 Sôrta Gḭka-Israɛlje 16
16
1Loo gə́ deḛ ree gə sa̰duk-manrɔ lə Ala mba̰ ndá d’unda dan mee kəi-kubu gə́ Dabid la wɔji ne dəa tɔɓəi deḛ d’inja nékinjanéməsje gə́ ka̰ roo ləm, gə nékinjanéməsje gə́ ka̰ kɔm na̰’d ləm tɔ no̰ Njesigənea̰’g. 2Loo gə́ Dabid tɔl ta kula nékinjanéməsje gə́ ka̰ roo ləm, gə yeejé gə́ ka̰ kɔm na̰’d ləm tɔ ndá yeḛ tɔr ndia dɔ koso-dəwje’g gə ri Njesigənea̰ tɔ. 3Tɔɓəi yeḛ kai deḛ lai gə́ to Israɛlje lé, diŋgamje gə denéje, nana kara yeḛ aree pil muru kára ləm, gə mbə gə́ d’ila gə tumbur ləma, gə kandə nduú gə́ tudu ləm tɔ.
Ləbije d’ɔs pa pidi ne Njesigənea̰
Pak 105.1-15, 96, 106.1,47-48
4Yeḛ ɔm kula gə́ kəm ra no̰ sa̰duk-manrɔ’g lə Njesigənea̰ lé ji Ləbije’g gə mba kar dee ɓar ne ri Njesigənea̰, Ala lə Israɛlje ləm, gə pidee ne ləma, gə d’ila ne riɓar dəa’g ləm tɔ. 5Deḛje neelé ri deeje ɓa nee: Asap ɓa to njekɔrno̰ dee, Jakari ɓa to njekɔm’g joo ləm, Jeyel gə Semiramot gə Jehiel gə Matitia gə Eliab gə Benaja gə Obed-Edɔm gə Jeyel. Deḛ d’aw gə nékimje gə́ to kṵdu-ko̰déje gə kṵdu-kagje ji dee’g ndá Asap lé to nje saga ma̰dje səgə-səgə tɔ. 6Benaja gə Jahajiel gə́ to njékinjanéməsje lé d’im to̰to̰ no̰ sa̰duk-manrɔ’g lə Ala ta-ta ya. 7Mee ndəa’g neelé ɓa Dabid un kudu kɔm kula ji Asap’g gə ji ŋgakea̰je’g gə mba kar dee d’ila ne riɓar dɔ Njesigənea̰’g ɓəi.
8Maji kar sí pidije Njesigənea̰
Ɓarje ne ria ləm,
Arje koso-dəwje gər néreaje
Gə́ al dɔ loo sula lé ləm tɔ.
9Ɔsje pa, ɔsje pa ilaje ne riɓar dəa’g ləm,
Néreaje lai gə́ maji dum lé kara
Paje taree ləm tɔ.
10Ndubaje rɔ sí ká gə ria gə́ to gə kəmee doi lé,
Maji kar deḛ gə́ saŋg loo gər Njesigənea̰ lé
Nda meḛ dee kaḭ ya.
11Gə́ telje rɔ sí gə́ rɔ Njesigənea̰’g
Areeje to kag-gəd-rɔ lə sí ləm,
Sa̰geeje mba kila kəm sí dəa’g
Gə́ kédé-kédé ləm tɔ.
12Arje meḛ sí olé dɔ nédumkooje’g
Gə́ yeḛ ra lé ləm,
Gə dɔ némɔrije gə́ yeḛ ra lé ləma,
Gə dɔ rəwta-gaŋgje’g ləa
Gə́ teḛ təa’g lé ləm tɔ lé
13Seḭ gə́ toje ginka Israɛlje
Gə́ toje kuraje ləa lé ləm,
Seḭ gə́ toje ŋgaka Jakob
Gə́ yeḛ ɔr sí unda sí gə́ dəwje ləa lé ləm tɔ.
14Njesigənea̰ lé to Ala lə sí ləm,
Rəwta-gaŋgje ləa lé kara
Yeḛ gaŋg wɔji ne dɔ naŋg nee lai ya ləm tɔ.
15Arje meḛ sí olé dɔ manrɔ’g ləa
Gə́ gə no̰ lé ta-ta ləm,
Gə dɔ ndukunje’g ləa
Gə́ wɔji dɔ ŋgaka dəwje-dəwje
Loo tɔl-dɔg (1.000) lé ya ləm,
16Gə dɔ manrɔ ləa gə́ yeḛ man ne rəa
Ar Abrakam lé ləma,
Gə dɔ ndukun gə́ yeḛ un
Gə rɔkubu ar Isaak lé ləm tɔ#Gn 12.7, 26.3.
17Yeḛ aree to godndu gə́ to njaŋg
Ar Jakob ləm,
Yeḛ aree to manrɔ gə́ to gə no̰
Ar Israɛl ləm tɔ#Gn 28.13.
18Yeḛ pana: M’a kar dee ɓee gə́ Kana̰ lé
Gə́ nékwanduba gə́ wɔji dee-deḛ ya.
19Mee ndəa’g neelé deḛ bula yaa̰ el,
Deḛ to gə́ jebəre ba bèe ləm,
Deḛ to gə́ mbáje mee ɓee’g neelé ləm tɔ.
20Deḛ d’ḭ mbuna ginkoji dəwje gə́ kára
D’aw rɔ ginkoji dəwje gə́ raŋg’d ləm,
D’ḭ ɓeeko̰ gə́ kára’g
D’ɔd d’aw par gə́ rɔ koso-dəwje gə́ raŋg’d ləm tɔ.
21Nɛ yeḛ ya̰ loo ar dəw kára kara
Gə mba karee ula kəm dee ndòo el ləm,
Yeḛ ar bo̰ néra mbaije
Ɔs ta dee’g mbata lə dee ya ləm tɔ#Gn 20.3-7:
22Njé’g ləm gə́ m’wa dɔ dee gə ubu lé
Maji kar sí ɔrɔje rɔ dee el ləm,
Njéteggintaje ləm lé kara
Raje sə dee majel el ləm tɔ.
23Ɔsje pa arje Njesigənea̰,
Seḭ dəwje lai gə́ síje dɔ naŋg nee!
Ilaje ne mbər ta kaji ləa gə ndɔ sí ndɔ sí tɔ.
24Ɔrje sor rɔnduba ləa
Mbuna ginkoji dəwje gə raŋg’g lé ləm
Ɔrje sor néreaje gə́ maji dum
Mbuna koso-dəwje’g lai ləm tɔ.
25Mbata Njesigənea̰ lé boo ya ləm,
Yeḛ nja ɓa askəm kiŋga pidi ləma,
Yeḛ to ɓəl kədm-kədm
Ur dɔ magəje lai-lai ya ləm tɔ.
26Mbata magəje lai gə́ ginkoji dəwje gə raŋg pole dee lé
To néje gə́ kari ba
Nɛ Njesigənea̰ lé ɓa unda dara ya.
27Boo-ronduba gə ro̰doolé keḭ-keḭ to kea̰ ləm,
Siŋgamoŋ gə rɔlel taa loo-siée pəl-pəl ləm tɔ.
28Seḭ gel-bɔje lə ginkoji dəwje gə raŋg lé
Ulaje rɔnduba dɔ Njesigənea̰’g ləm,
Ilaje riɓar dəa’g ləm tɔ.
29Ulaje rɔnduba dɔ ri Njesigənea̰’g.
Unje nékarje lə sí reeje ne nea̰’g,
Undaje barmba no̰ Njesigənea̰’g.
Dan néje gə́ bə̰dərə bə̰ gə́ to gə kəmee doi lé!
30Seḭ lai gə́ síje dɔ naŋg neelé
Ndəbje péd-péd nea̰’g,
Naŋg neelé gelee kiriŋ kiriŋ-kiriŋ ɓó yə el to!
31Maji kar deḛ gə́ d’isi dara ra rɔlel ləm,
Maji kar deḛ gə́ dɔ naŋg nee kara
D’isi dan rɔkal’g ləm tɔ!
Maji kar dee pa mbuna ginkoji dəwje gə raŋg’g pana:
Njesigənea̰ ɓa to mbai!
32Baa-boo-kad lé maji karee ula
Ɓar mbiao̰-mbiao̰
Gə néje lai gə́ to keneŋ ləm,
Maji kar mee looje gə́ wala gə néje lai gə́ to keneŋ
D’al rɔ dee ləm tɔ!
33Maji kar kagje gə́ mee kɔr’g
D’al rɔ dee no̰ Njesigənea̰’g!
Mbata yeḛ ree mba gaŋg rəwta dɔ naŋg nee ya.
34Pidije Njesigənea̰
Mbata yeḛ to njemaji kɔr njoroŋ,
Mbata meekɔrjol ləa lé to saar-saar gə no̰#2SgI 5.13, 7.3, Esd 3.11, Pak 100.5, 107.1, 118.1, 136.1, Jer 33.11!
35Maji kar sí paje pana:
Ǝi Ala gə́ njekaji sí,
Maji kari aji sí ya,
Maji kari mbo̰ sí na̰’d
Ɔr sí mbuna ginkoji dəwje gə raŋg’g
Gə mba kar sí j’ilaje riɓar dɔ rii’g
Gə́ to gə kəmee doi ləm,
Gə mba kar sí j’un rɔnduba lə sí bura
M’pidiije ne ləm tɔ.
36Maji kar dɔ ri Njesigənea̰,
Ala lə Israɛlje ai səgərə
Gə ləbee-ləbee saar-saar gə no̰!
Maji kar koso-dəwje lai pana: Bèe ya!
Pidije Njesigənea̰ ya!
37Dabid un ndia ar Asap gə ŋgakea̰je mba kar dee d’aar no̰ sa̰duk-manrɔ’g lə Njesigənea̰ gə mba kar dee ra kula lə dee ta-ta. 38Obed-Edɔm gə Hosa gə ŋgako̰ deeje gə́ d’as rɔ-misa̰-gir-dee-jinaijoo ləm, gə Obed-Edɔm, ŋgolə Jedutun ləm tɔ lé yeḛ ar dee to njéŋgəm tarəwkəije tɔ.
39Yeḛ unda Sadɔk, njekinjanéməs gə ŋgakea̰je gə́ to njékinjanéməsje no̰ kəi-kubu-si-Njesigənea̰ gə́ to dɔ loo gə́ ndəw gə́ to Gabao̰ 40gə mba kar dee d’inja nékinjanéməsje gə́ ka̰ roo ta-ta d’ar Njesigənea̰ gə ndɔ ləm, gə kàrkemetag ləm tɔ dɔ loo-nékinjanéməsje’d gə́ wɔji dɔ roo né ləm, gə mba kar dee ra néje lai gə́ ndaŋg taree mee maktub godndu’g lə Njesigənea̰ gə́ yeḛ un ar Israɛlje lé ləm tɔ. 41Heman gə Jedutun gə njé gə́ raŋg gə́ mbər dee gə goo ri dee lé d’aar mbɔr dee’g gə mba pidi Njesigənea̰. Mbata meekɔrjol ləa lé to saar-saar gə no̰. 42Heman gə Jedutun d’aar mbɔr dee’g gə to̰to̰je ləm, gə ma̰dje gə́ sa səgə-səgə ləm tɔ mbata lə deḛ gə́ d’im d’aree ɓar ŋgəw ləm, gə nékimje gə́ wɔji dɔ pa kula rɔnduba dɔ Ala’g lé ləm tɔ. Ŋgalə Jedutun to njéŋgəm tarəwkəije ya.
43Koso-dəwje lai lé nana kara tel aw kəi ləa-ləa ləm, Dabid kara tel aw kəi ləa gə mba tɔr ndia dɔ njémeekəije’g ləa ləm tɔ#2Sam 6.19-20.
Currently Selected:
1 Sôrta Gḭka-Israɛlje 16: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
