(Salmos) 119
119
97¡Amina chichamjum umiktin sukagtusuitam nuna
shiig senchi aneau asan,
kashi kashinig nuwig anentaimjai!
98Nunú chicham umiktin agagbau
umiktajum tusa sukagtusuitam nunú
mina shiwag aidaun
nagkaesau yachamtijawai,
wagki nunú jintinjau asamtai.
99Wika nuna ausa dekau asan,
mina jintinjin aidaun nagkaesau
chicham umiktin agagbauwa nuwi anentaimjai.
100Tuja amina chichamjum umiktin
sukagtusuitam nuna umiau asan,
múun amina chichamjumin etsejin aidaun
nagkaesau amina chichamjumnak dekajai.
101Amina chichamjumin umiktag tau asan,
pegkegchau aina nunak idaisabiajai.
102Tuja ame minak jintinjau asamin,
aminu chicham umiktina nunak idaisachmaijai.
103Ame umiktin anagkagtuawaitam
nunak mina kayakmataijuig
shiig yumintsak dekapeajai,
tuja mina wenujui dapa yumijin nagkaesau
yumintsak dekapeajai.
104Amina chichamjum umiktin
sukagtusuitam nuwiya unuimaju asan,
waitjut aina nunak kajejajai.
105Amina chichamjum agagbauwa nunú
jii ekemakbaujai betek,
wi weamunum tsaaptin emawai,
tukumak iyajai tusa.
106Wi yaunchuk chichaakun,
umiktajai tiuwaitag nunak, ataktushkam tajai:
“Amina chichamem
pegkegma nunak dekas umiktatjai.”
107¡Tuke Pujuuwah, shiig pimpikin
wake besemag pujajai!
¡Ataktu ichichtugta, ame chichamjum
wajintu chichawa dutiksamek!
108Tuke Pujuuwah,
wi amina emematjam nunú
shiig aneasam jujutkita,
nuniakum amina chichamjumia nunú jintinjuata.
109Wika tuké jamainnum pujajai,
tujash ame jintinjuamua nunak kajimattsujai.
110Aents pegkegchau aidau,
utugchatan apujtujuinawai,
tujash amina chichamjum umiktin
sukagtusuitam nunak kajimatkinuk idaitsujai.
111Amina chichamjum umiktina nunú
minak tuké shiig aneasa pujutan sujawai.
112Wika amina chichamjum umiktin
sukagtusuitam nunak wakejusan,
atakea duwish tuke umiktin atajai,
tusan tumamjai.
129Amina chichamjum umiktina
duka shiig pegkejai;
nuadui wika betek umiajai.
130Amina chichamjum etsegbauwa duka
tsaaptinjai betekai;
nuniau asa aents kakagchauchinak
shiig dekamtikawai.
131Amina chichamjum umiktin sukagtusuitam
nuna dekatasan wakegajai,
nuniakun itugkanuk shiig dekawag
tusa anentaimkun waitiajai.
132Tuke Pujuuwah, amina anempau aidau
wait anentam dutiksamek,
minash diigsam wait anenjugta.
133Amina chichamjum wajintua dutiksamek awekattsata;
pegkegchau wagagkiti tusamek idaitusaipa.
134Aents pegkegchau aidau
mantuawainum ayamjutkata,
wika amina chichamjum umiktin
sukagtusuitam nuna umiktasan wakegajai.
135Wi amina inakmetag dusha
shiig aneasam diigsata,
nuniakum nunú chichamem jintinjuata.
136Amina chichamjumin
eme anentus uminachu asamtai,
shiig senchi buutjai.
137Tuke Pujuuwah, amek pegkegmaitme;
tuja ame suwimak sukagtam
dushakam pegkegnum jintinkagtawai.
138Chicham umiktin ame sukagtusuitam
duka waitchauwai, betek uminnai.
139Mina shiwag aidau
amina chichamjumin uminachkui,
kajeakun shiig senchi waitiajai.
140Amina chichamjumik
ashí dekapsamu dekas pegkegmai,
nuadui wika amina
inakminuk nuna wakegajai.
141Wika dushiktai, wainkauchitjai,
tujash amina chichamjum umiktin
sukagtusuitam nunak kajimattsujai.
142Amina takatjum pegkeja duka
tuké imanisag auwai,
tuja amina chichamjum umiktin
agagbauwa duka dekas shiig pegkegmai.
143Waitiakun wake besemag pujubiajai;
tujash amina chichamjum umiktin sukagtusuitam
nunak minak shiig anemtijusmayi.
144Ame chicham umikuitam
duka makichkish yapajinchauwai.
¡Yainkata wisha nuna shiig antukan umiktajai!
Currently Selected:
(Salmos) 119: AGR
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
