(Salmos) 104
104
Apajuí emematbau
1Ashí mina wakanjujai Tuke Pujuun
emematkun pegkegnum chichagtinaitjai.
¡Tuke Pujuu mina Apajuíjuh,
amek dekas múuntaitme!
Tuja amek amina imanjumea nunú ijiam,
etsanjam pujame.
2Amek dekas tsaaptin ijimakume.
¡Ame nayaimpia duka
jáanchjai betek ejauwaitme!
3Dutikam yaki nayaimpinum
ame pujustinjum umikuitme.
Amina carrogmin yujagminum
egkemkam wekaeme.
¡Amina nanapjumin
dasenum nanaakam wekaeme!
4Dase aina duka ame iname,
ame nunikti tama jiishkam kegawai.
5Apajuík nugkanak nigki
buchitmainchaun najanauwai;
nuadui makichkish umuchmainchau atinai.
6Ame nayants pimumtikjam
nugka yutuabiume,
dutikakum ashí muja
múun tsakaku aidaush yutuabiume.
7Imanikmataish,
kuyua buku wajasti timayume,
tusa tabaugmin amina chichamjumin
ipamtajai betek antuk wamak kuyuabi.
8Nuadui, yumi piyag
muja aidaun amuja auk,
wake aidaunum akaiki,
ame nuwi ijumnagti tibaunak imanisag
nuwi ijumnajui.
9Nunikmatai ataktu pimak
nugkan utujai tusam,
juwig nagkankati, nuwi nagkama
pima pimakuag wechati tiuwaitme.
10Untsu yumi mujanum pukuni jiinki,
entsa najanea pakajin jegak,
namak múun wajasti tusam idaime.
11Nunú yumin kuntin ikamia aidau
burro ikamia aidaujai kitamainak
umin ainawai.
12Nunú namaka yantamen numi ayaunum,
nuna kanawen chigki aidau pasugmak petsainak,
shinuinamu antunawai.
13Tuke Pujuuwah, amek
nayaimpinum pujusam yumi yutumtijam,
ikam ukatkam pegkeg emame;
tuja amina anenkagmea nunú
nugkanak shiig anemtikui.
14Apajuí dupanak tsapapitkawai,
kuntin nuna yuu aidau
yuwatnume tusa,
tuja ajak aidaunashkam
tsapapitkawai, nunú nejekmatai
aents aidau yuwatnume tusa.
15Tuja pagkan yuwa ichichmamtain,
tuja vino uwaja shiig aneastinun,
nuigtu aceite kugkuin yapinum
nijamtain aatus ashí umikui.
16Tuke Pujuu numi najankamua duka
yumi uchupiam shiig ijunui,
tuja Líbanonmaya setug aidaun
nii tsapapitkakua dushakam,
yumi yutak nugkan uchupiau asamtai
shiig ijunui.
17Nuna kanawe aidaunum
chigki aidau pasugmak petsainawai;
nuwi pishak cigueñashkam pujawai.
18Tuja muja tsakaku aina duka
cabra ikamia aidau batsamtai ainawai;
untsu kaya múun aina duka
wapujushan uumka batsamtai ainawai.
19Apajuí nantunak najanauwai,
wajupa nantuk weawa tusa dekatnun;
tuja tsawan dekapa dekatain etsan najanauwai.
20Etsa akaetaik kiyawai,
nunikmatai kashi kuntin
ikamia aidau jiinag yujawai.
21Tuja león aidaushkam kashi jiinag,
dita yumainji atsutai shinuinawai,
Apajuín segainak.
22Untsu tsawak etsa jiintai,
dita waajin akuumag megkagainawai.
23Tsawan tsawagmatai,
aents aidau takatjin jiintukiag,
takai takainakua agkutai ukuinawai.
24¡Tuke Pujuuwah,
amek shiig kuashat najankauwaitme!
Tuja ashí duka
amina yachagmijai umikuitme.
¡Nugka ame najanamua
nuwig ashí ame najankamu aina nunú batsatui!
25Diisia ame najanamu
nayants shiig múun,
nuwig kuntin múun aidau,
kuntin piipich aidau shiig kuashat
makichkish dekapamainchau ayawai.
26Nuwi yujawai lancha múun aidau;
tuja nuwi semagkau múun
najanawaitam nunú
shiig aneak wasugkamui.
27Nunú aidauk ashí
amina dakagmainawai,
wajutik yutainash amasat tusag.
28Nuadui ame dita yuwatnuk suwame,
dutikam jukiag shiig yuwinawai.
29Untsu ame uumjukmak,
senchi ishamainawai;
tuja ame mayatut jujamshakam jawai,
nunik iyashig yukukuntu najaneawai.
30Tujash ame Wakanim suwamak
ashí nugkanmaya aents aidauk
yamajam pujutan juwinawai.
31¡Tuke Pujuu imanjiya duka tuke auwai!
¡Tuke Pujuuk nii najankamujin diisa shiig aneawai!
32Tuja Apajuí diyamak nugkak kujawai,
untsu muja aidauk
Apajuí antiamak bukuituinawai.
33Wi eke iwaku pujuttag nuaduik
Tuke Pujuun, mina Apajuíjun emematkun
kantamtain kantamjuattajai.
34Tuja Tuke Pujuu wi anentaibaujua
nuna shiig aneas diigtusti,
wagki minak niyai shiig aneamujuk ajutui.
35¡Aents pegkegchaun takau aidau
Apajuí ememattan dakituidauk
ashí jinawag megkaejatnume!
¡Ashí mina wakanjujai Tuke Pujuun emematkun
pegkegnum chichagtinaitjai!
¡Yajauwajah! Tuke Pujuun daaji ememattai ati.
Currently Selected:
(Salmos) 104: AGR
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
