(Evangelio según San Mateo) 8

Aents lepragtinun Jesús etsagagbau

(Mr. 1.40-45; Lc. 5.12-16)

1Nuna Jesús ashimak nainnumia akaiki wetai, kuashat aents saetukaju. 2Nuniai makichik aents jata lepra achikam jaak pujau wainak, Jesusan jegantun niina eemtin tikishmag pujus segaak:

—Apuh, wakegakmek etsaentumainaitme, tau.

3Tama Jesús uwejin antiak:

—Wakegajai, pegkeg wajastá, tiuwai. Tamawaik leprak megkaekauwai. 4Nunikmatai Jesús chichajak:

—Nijah, makichik aentskesh ujakaipa, sacerdote jegajuam wantintukta, nuniakum ofrenda susata Moisés dutikata tibauwa dutiksamek, ditashkam waipakag dekas tsagaje tujamtinme, tiu.

Jesús Capernaumnumia capitani inaken etsagagbau

(Lc. 7.1-10; Jn. 4.43-54)

5Jesús Capernaúm jegattaman capitán jegantauwai aujsatatus. 6Nunik:

—Apuh, mina inakeg ashí iyashí najaimak shiig senchi waitiak buchitmainchau wajas jegajui tepawai, tiuwai.

7Tama ni ayaak:

—Ayú, wi anui taan etsagagtajai, tiuwai.

8Tutai capitán#8.8 “Capitán” tawa nunak tikich agagbaunmag “centurión” tuinawai. ayaak:

—Apuh, wika amea ibauk mina jegajui utuamak amaitsujai; ayatak chichamaik tsagagti tujutta, tamak mina inakjush tsagagtatui. 9Wagki wikishkam apu umigbau ajutui, antsag suntag mina umigtuidaush ajutuinawai, nunú aina nuiyan wi: “Wetá”, tamak wegawai. Tikichia nuna: “Taata”, tamak minawai; aikasnuk mina inakjunash: “Ju dutikata”, tamak dutikawai, tau.

10Nuna tutai Jesús antuk anentai jegagchau, nunik niina saetus minina nuna chichajak:

—Dekas tajime, Israel aina nuiyanakesh imatika dekaskeapi tabau ajamunak wainkachjai. 11Nunin asamtai tajime: Etsá minitaijinia, etsá akaetaijinia kuashat aents aidau kaunkagtinai, nunikag Apajuí inamtaijin nayaimpinum Abraham, Isaac, Jacob aina nujai pekaamsag yuawagtinai, 12tujash Apajuí inamtaijin wayatnume tibau aina duka, agaa jiikí suwenum ajapeam agtinai, dutikam nui batsamas butuinak nainak takegtú batsamtin ainawai, tau.

13Nuna tii Jesús capitanin chichajak:

—Wakitkita, ame dekas ashí nuniktatuapi tame duka imatiksag uminkattawai, tau. Nuna tiuwa duik inakshakam tsagajui.

Jesús Pedro tsatsají etsagagbau

(Mr. 1.29-31; Lc. 4.38-39)

14Nuna tusa ukuak Jesús Pedro jeen weuwai, nui jegakmá Pedro tsatsají senchi tsuweak tepettaman wainkauwai. 15Dutika Jesús uwegnum antigkui, dutikam tsuweamunak megkaekau, nunik nantakí Jesusan yutain ajampeau.

Kuashat aents etsagakbau

(Mr. 1.32-34; Lc. 4.40-41)

16Nunú tsawantaik kintamai, kuashat aents wakan pegkegchau egkemtuamu aidaun ikautuawajui; dutikawagmatai chichamenig wakan pegkegchau aidaunak jiijá ishiakui, dutika ashí jau aidaunash etsagaku. 17Nunak profeta Isaías tibau aajakua nu uminkati tusa dutikauwai, duka: “Nigki jutii kakakchamujinash, jatanashkam jukini”, tawai.

Jesusa jintintaiji agtatus wakejukaju aidau

(Lc. 9.57-62)

18Jesús kuashat aents tuwajuinam wainak, ni jintintaiji aidaun: —Amain wegagmi, tiuwai. 19Nuniai makichik maestro chicham umiktinun jintinkagtin jegantun:

—Maestroh, wisha ame tuwig wekaetam nuniakminish tuke amijaig wekaesatin atajai tajai, tau.

20Tutai Jesús ayaak:

—Kujancham aidau waajig ajuinawai, antsag yakiya pishak aidaushkam pasugkeg ajuinawai; tujash Aentsmaga akiinauwa duka buuké atumsa ayamainjigkesh atsujui, tiu.

21Nuna tutai makichik niina jintintaiji aina nuiya:

—Apuh idaitusta, dekatkauk wenu mina apajun ukusan ukuakun nemagkatjame, tau.

22Tutai Jesús ayaak:

—Amek nemagtukta, idaisata wakanin jakau aina nu jakau aidaunak ukustinme, tiuwai.

Jesús dase imijkamu

(Mr. 4.35-40; Lc. 8.22-25)

23Nuna tusa ukuak Jesús ni jintintaiji aidaujai barcanum chimpimjag weajui. 24Nunik weenai dase shiig senchi dasentu, imaniau asa tsukatak barcanum yumik senchi yajanu; tujash Jesusak kanag egketu, 25imanitai niina jintintaiji aidau jegaantag ishintainak:

—¡Apuh, uwemtikagtugta jakektatji! tuidau.

26Tama ditan ayaak:

—¿Wagka sapigmajume aents imatikas dekaskeapi tuchau aidauwah?

Tusa nantakí dasen, kuchanashkam imijiaku, dutikam kuchashkam miyasuch wajas patamsauwai. 27Dutikamtai ditak pempeentunisag:

—¿Jusha wají aents asamtaiya dasesh, kuchash ni chichamenash antujuinawa? tudaiyinau.

Gadaranmaya aents aidau wakan pegkegchau egkemtuamu

(Mr. 5.1-20; Lc. 8.26-39)

28Nunik Jesús kuchá amain katigkú, nugka gadaranmaya aidau batsamtain, nuniai jimag aents iwanch egkemtugbau aidau ukumatainmaya jiinkiag Jesusan jegantaju. Nunú aents aidauk senchi kajen aidau asamtai, nunú jintanmag makichkish nagkaemamainchau aajakui; 29nunik untsumainak:

—¿Apajuí Uchijiyah, jutiish utugkagtukta tame? ¿Tsawan jegatsaigkik juish suwimak sukagtustasam minam? tuidau.

30Tuja kuashat kuchishkam ikaa yuwak batsatu, 31nuniau asamtai wakan pegkegchau aidau Jesusan segainak:

—Ju aentsnumia jiijatkumek, au kuchi batsata awi awekagtita.

32Tusá tama Jesús ayaak:

—Wetajum, tiuwai.

Tama wakan pegkegchau aidaushkam aentsnak ukuinak kuchinum utsanawajui, dutikam kuchishkam pisajag betsag tajaekaunum utsanawag kuchanum iyagkag jinawajui.

33Nunikagmatai kuchí kuitamin aidaushkam pisajag yaakat jegawag, kuchi jinamun pachis, tuja aents wakan pegkegchau egkemtuamu aidaushkam nunikagmae tusag ashí etsejuidau. 34Tiagtai ashí yaaktanmaya aidauk Jesusan wainkagtatus wejiajui, nunik wainkag, juig pujutsuk yajá wetá tusag segajui.

Currently Selected:

(Evangelio según San Mateo) 8: AGR

Highlight

Copy

Compare