(Evangelio según San Mateo) 27

Jesús Pilatowai ejegamu

(Mr. 15.1; Lc. 22.66-71; Jn. 18.28)

1Tsawagmatai, ashí sacerdote apuji aidau, judío apuji aidaujai Jesusan chichaman umigkajui mantamnati tusag. 2Dutikawag jigkajá jukiag, apu Poncio Pilato pujamunum ejegawag susajui.

Judas Iscariote kajemjamu

(Tak. 1.18-19)

3Judas, Jesusan sujukua nunú, maawagtatus imatikiagtai wainak, anentai idajuk sacerdote apuji aidaun tikich apu aina nuna treinta kuichkin awagtak:

4—Wika tudau takasjai, pegkegchau takasbaujish atsujaig maatajum tusa sujuku asan, tau.

Tama dita aiinak:

—¿Iish dusha utugkatjiki? Duka aminuajamah, tiaju.

5Tiagtai Judas kuichkin nagkimá jega Apajuí ememattainum ukuak, wee kajemjauwai.

6Dutikamtai sacerdote apuji aidau kuichkin jukiag:

—Ju kuichkia juka ofrenda egketaiya nuig egkemaitsui, aents mantamnati tusa akikmatkamu asamtai.

7Tusag chichasag nunú kuichkia duik, “Duwé takau nugke” tutain sumakajui, aents tikich nugkanmaya jaidaun ukustinun. 8Nuadui, nunú nugka duka yamaikish “Nugka numpeagbau” tutaiyai. 9Aatus uminkauwai profeta Jeremías:

“Jukiaje treinta kuichkin Israela uchijí aidau akike apujtusbaun, 10dutikawag sumakaje duwé takauwa nuna nugkeen, Apajuí tibauwa dutiksag” tawa nunú.

Pilato Jesusan iniasbau

(Mr. 15.2-15; Lc. 23.2-25; Jn. 18.28-40)

11Jesusa jukiag gobernadora eemtin ejegawajui, dutikawagmatai iniak:

—¿Amekaitam Rey judío aidaunu?, tau.

Tama Jesús ayaak:

—Duka ame tujutme, tiuwai.

12Tuja sacerdote apuji aidau, tikich apu aidaujai bakutatus etsegtuidau, imatjamash nigka makichkish chichaachu; 13nunitai Pilato chichajak:

—¿Antatsmek kuashat wajiin pachis imatjutpaina duka?

14Tamashkam Jesusak makichik chichamnakesh aikchau. Nunitai apuk shiig anentai jegagchau.

15Tuja apuk fiestatinig aents achikbau aina nuiyan makichik jiisagké au, aents aidau nu jiinkiti tusa mamikiamua nuna. 16Nuniamunum Jesús Barrabás#27.16 “Jesús Barrabás”, manuscritos initaik agagbau aina nuig Jesús Barrabás tawai griego chichamnumag. daagtinchakam pegkegchaunum wantinjau achikam egketu. 17Nunin asamtai aents aidau nui ijuntatman Pilato iniak:

—¿Yana jiiktí tusagmea wakegagme, Jesús Barrabasnak jiiktatag atsa Jesús, Cristo daagtina nunaká jiiktatag?, tau.

18Nunak kajejuidau asag sujukaja nuna dekau asa tiuwai.

19Nuna tusa Pilato chicham epegkatasa ekeemtaijin eketai, niina nuwe chichaman awetak: “Amek aanú aents pegkejan takauwa nuig pachinkaipa. Wi ishamainun kajamjamjai yamai, aanú imatikamunum”, tiu.

20Tujash sacerdote apuji aidau nuigtú tikich apu aidaujai, aents tuwaká ijunun anentain egketuawaju, Pilaton segatí Barrabás jiintai Jesús mantamnati tusag. 21Ataktushkam Pilato ditan iniak:

—¿Ju jimaja juiyanash, yana akupkati tusagmea wakegagme?, tau.

Tutai dita aiinak:

—Barrabás akupkata, tuidau.

22Tiagtai Pilato ditan iniak:

—¿Tujash Jesús, Cristo tajum junash utugkatjaki? tau.

Tutai ashí pampaajag:

—¡Anka achinjati! wajaidau.

23Tiagtai apu ayaak:

—¿Tujash jusha wají pegkegchauna takasé?, tau.

Tutaishkam nuní senchi untsumkag:

—¡Anka achigtá! wajaidau.

24Pilatok makichkish niinak antujuinatsu nuna wainu asa, ayatak nuní senchi pampaidiagtai yumí utugtitnume tusa inamjau, nunik ashí ditá eemtin ikigmak:

—Wika agkantaitjai, ju aents pegkegma nuna numpe ukaemainnumag; atum diistajum, tau.

25Tutai ashí aents pampaajag:

—Ni mantamnamua duka jutiiní nuigtú ashí ii uchijí aina nui juakti, tiaju.

26Tiagtai Barrabasan jiikiu, dutika Jesusnak asutiawagmatai, achigtinme tusa sujukui.

Suntag aidau Jesusan waitkasagbau

(Mr. 15.16-20; Jn. 19.1-3)

27Dutikamtai apú suntaji aidau Jesusan jukiag apú pujusá inamtaijin ejegawagmatai, ashí suntag ijuntujaju ni wajamunum. 28Nunikag jaanchin awitkag tikich jaanch kapantu nentetkaun anugjaju. 29Dutiksag atsejutain jagkin najatuawag Jesusan atsemitkakag, uwejí untsujin numin achimtikag, niina eemtin tikishmatjag dushikinak:

—¡Juuwai Rey judío aidaunuk! awajuidau.

30Imatjuinak usukidau, dutikainak numi atakuamujin jujukiag buuknum awatuidau. 31Dutikainak dushí dushikinakua jaanch anugjamunak awituk, ni nugkutaijinak anugjag juki emajui achijagtatus.

Jesús achigbau

(Mr. 15.21-32; Lc. 23.26-43; Jn. 19.16-24)

32Jiinkamag, yaakat cirenenmaya Simón daagtinun wainkag, Jesús achigtinun cruzan yanaktí tusag susajui.

33Nunikag Gólgota tutainum jegantajui, (“Gólgota” tawa duka, “Buuké Sakamtai” taku tawai.) 34Nui ejentag, Jesusan vino chujuau dupa yapaujai pachimjamun uwagti tusag susajui. Nu susam apas dekapes idaisauwai.

35Dutika achijag, suntag aidauk Jesusa jaanchjinak yana kayají jiintukne nuna diisag akandaikajui.#27.35 Textus Receptus (TR), tawa duka latín chichamai. Nunak “Texto Recibido” taku tawai. Nunú textoa nu awaiwai salmo capítulo 22 versículo 18, nuiyan Reina-Valerashkam tawai; tujash duka ju textonmag idaiji, wagki griego dekas yaunchuk agagbau aina nuig, duka atsau asamtai. 36Nunikag pekaamsag dii batsamtuidau. 37Tuja wajuk asamtaiya achijaje nuna pachisag agajag chaiken anujtukaju: “JUUWAI JESÚS, REY JUDÍO AIDAUNU”, tusag.

38Nuigtushkam jimag kasan niijai achijajui, makichkia nuna untsujin awajainak, tikichia nunak menajin awajawajui. 39Tuja nui aents nagkaemaidauk, buuken pegajag pegkegchau chichajuidau, nuninak:

40—¡Ame, jega Apajuí ememattai tegakam kampatum tsawantai ataktú jegamainaitjai tinumjamah, akaikim uwemjakia! ¡Dekas Apajuí Uchijiyaitkumek, cruznum nematsuk akaikita!, tuidau.

41Dutiksag sacerdote apuji, maestro chicham umiktinun jintinkagtin aidau nuigtú tikich apu aidaujai ijunag dushikinak:

42—Tikich aidaunak uwemtiknuwe, tujash nigkig uwemain dekapeatsui. Nuigtush Israela Reyjiyai, nunin asa yamai cruznum deta nuna akaikimtai, niinig dekaskeapi tiagmi. 43Apajuin kajinas anentaimtinuwe, ni wakegakug yamai agkanmitkati, wagki Apajuí Uchijiyaitjai tumamnuwe dui, wajaidau.

44Nunisag kasa aidaushkam Jesusjai achijam detaidaush pegkegchau chichajuidau.

Jesús jakamu

(Mr. 15.33-41; Lc. 23.44-49; Jn. 19.28-30)

45Etsa tutupit ai nagkamas, a las tres wegaish ashí nugkanum suwe wajas asauwai. 46A las tres jegattak weamunum Jesús senchi untsumak: “Elí, Elí, ¿lama sabactani?”,#27.46 “Elí, Elí, ¿lama sabactani?”, tawa juka hebreo chichamai. tiuwai. (Nunak: “Mina Apajuijuh, mina Apajuijuh, ¿wagka idaitusume?” taku tiuwai).

47Ujumak aents nui ijunaidauk nuna antukag:

—Eliasan untsuawai, tuidau.

48Tusa taig, ijuna nuiya makichik tupikaki esponja juki vino chujuaunum ajugká tagkanai aapi Jesusan uwagti tusa iwagkau. 49Dutiktai tikich aidau chichainak:

—Idaisakia, Elías uwemtijatatus minishtimpash wainkami, tuidau.

50Tujash Jesusak ataktú senchi untsumak, jakauwai.

51Nuniaig jega Apajuí ememattainum jaanch ejaamuk, yakiin nagkamnas ichiinak jimaituk kanakui. Nugkashkam ugkauwai imaniau asamtai kaya muun aidaushkam punjauwai; 52Imanikmatai ukumatai aidauk ujaniajui, nunikmatai kuashat pegkejam jinau aidaushkam nantajajui; 53nunikag ukusbaunmaya jiinjajui Jesús nantakiu ai, nunik yaakat pegkegma nui utsanawajui, nunikun kuashat aents wainkajui.

54Tuja capitán tikich niijai ijunas Jesusan diyak ijunaidauk, uugbau imanikmatai nuigtú kuashat ishamain nagkaemajun wainkag, senchi ishamkag chichainak:

—Dekaskenum juka Apajuí Uchijí aajakui, tuidau.

55Nui nuwa aidaushkam ikaa ijunas dii ijuntuidau, Jesusan Galileanum nagkamsag saetusag yaijakú aina nunú. 56Nu aina nuiya María magdalanmaya; María, Santiagon Josenashkam dukujiya nu nuigtú Zebedeo uchijí aina nuna dukují aatus wajaidau.

Jesús ukusbau

(Mr. 15.42-47; Lc. 23.50-56; Jn. 19.38-42)

57Kintamai arimateanmaya José daagtin wiyakuch, niishkam Jesusa jintintaiji aajakú asa tauwai. 58Nunik Pilaton Jesusa iyashin segauwai. Tutai Pilatoshkam Jesusa iyashin susatnume tiuwai. 59Tuja Joseshkam Jesusa iyashin juki, dekas sábana pegkejai pempeajui, 60dutika ukumatai yamá kaya taimunum awayá kaya muuntan apapetug waajin epeti ukuak weuwai. 61Tuja María magdalanmaya tikich María aatus, Jesús ukusbaunum jegantag eketaidau.

Jesús ukusbaun kuitamkatnume tusa ishitkamu

62Kashinia nu, tsawan ayamtai tsawagtin asamtai, sacerdote apuji aidau nuigtú fariseo aidaujai Pilaton jegajuawag:

63—Apuh, adeagji wait aaya nunú, iwaaku pujus chichaak: “Kampatum tsawan asan nantaktinaitjai”, tuuyi. 64Nuniau asamtai, awemata aents ukusbauwa nuna kampatum tsawantai shiig kuitamkatin, dutikashmak niina jintintaiji aidau kashi kautuawag iyashin jukiag, aents aidaun ujainak: “Jakabia duka nantakne”, tiagtatui. Nuna aatus tuinakug yama nagkamchaku waitjuamua nuna nagkaesau waitjuawagtatui, tuidau.

65Tusa tiagtai Pilato ayaak:

—Anú suntag aidau kuitamkatnume, wejum wajuk wakegagme dutiksagmek umiktajum, tau.

66Timatai ditashkam wegag ukusbau kaya apujtukbaunak shiig asakug, nui suntag kuitamkatin aidaunashkam batsatkiajui.

Currently Selected:

(Evangelio según San Mateo) 27: AGR

Highlight

Copy

Compare