(Evangelio según San Mateo) 17

Jesús yapajinamu

(Mr. 9.1-13; Lc. 9.28-36)

1Seis tsawan asa Jesús, Pedron, Jacobo niina yachi Juagkan aatus juki muja yakí tsakajunum weajui. 2Nuwi ditash wainainaig Jesusa niimé yapajinauwai; nunik yapig etsajai betek etsantu, niina jaanchjishkam shiig puju tsaaptin wajasui. 3Nuniai Moisés Eliasjai Jesusan aujuinak ijuntatman wainkajui. 4Nunik Pedro Jesusan chichajak:

—Apuh, ¡jutiish maigkis jui batsatagtai!, amesh wakegakminig kampatum aak umikagmi, makichik aminu, tikich Moisesdau, nuigtú Eliasdau, tau.

5Nuna aatus Pedro chichai, yujagkim winchamtin ashí ditajai ijumag ijikui; nuniai yujagminmaya chichaak: “Juuwai mina uchig anetaijuk, wi etegkamu. Nigki antugkatajum”, tiuwai.

6Nu tabaun antukag, niina jintintaiji aidau senchi ishamkag tikishmajag tsuntsumawaju. 7Nunikagmatai Jesús ditan tajuntun antiak:

—Nantaktajum; ishamkaigpajum, tau.

8Tama diistakamá imá Jesusak wajattaman wainkajui.

9Nunik Jesús mujanmaya minisá:

—Atum wainkaujum nu pachisjumek makichik aentskesh ujakaigpajum, Aentsmaga akiinauwa nu jakau aina nuiya nantatsaigkik, tiu.

10Nuna timatai, ni jintintaiji aidau inidau:

—¿Wagka maestro chicham umiktinun jintinkagtin aidaush, dekatkauk Eliasá taatnai tuinawa?

11Tusa iniam Jesús ayaak:

—Duka dekaske, Elías niiyá eemak taa tikich takastinun umiktinai tibauwa duka. 12Tujash wi tajime, Eliasak taabi, nunikunak ditak dekachaju ainawai, nuninak ashí dita wakegaina dutiksag niinak inagkeatkiagmayi. Nunisag Aentsmaga akiinauwa dushakam dita waitkam atatui, tiuwai.

13Nuna tutai ni jintintaiji aidaushkam dekaawajui, Jesusak Juan Yamijatnunap pachis tawa tusag.

Wakan pegkegchau uchin egkemtuamun Jesús etsagagbau

(Mr. 9.14-29; Lc. 9.37-43)

14Aents tuwakbaunum jegamtai, makichik aents Jesusa tajuntun tikishmatug chichajak:

15—Apuh, mina uchijush wait anenjutjata, nantu nantutin jauwe nuniak senchi waitnuwe, imaaniak kuashtá jiinum patamnuwe nuniak namakash iyainuwe; 16imaniakui jintintaijum aidaun itaantamjai; tujash etsagagchagmae, tau.

17Tutai Jesús ayaak:

—¡Aents dekaskeapi tuchau pegkegchau aidauwah! ¿Wajupá dukapea atumjaish pujumainaitja? ¿Wajupak katsunjatjime?

Jui uchi itantá, tiuwai.

18Tusa Jesús iwanchin jiyaká uchinmayan jiikiuwai, dutikamuik uchishkam pegkeg wajasui. 19Nuna dutikamtai ajuma dui jintintaiji aidau Jesusan niinak akanki iniinak:

—¿Wagka jutiish wakan pegkegchau jiiktakamaish tujinkamji?, tuidau.

20Tiagtai Jesús chichaak:

—Atumnak dekaskeapi tabauk imaanis atsugtamainawai. Dekas tajime, dekaskeapi tabaujum mostaza jigkayiya nuninkesh ajutjamainakuig, ju muja jujú chichagkujum: “Juig atsuk tikich yantamnum wetá”, tamak nunisag nagkaemamainai. Makichkish tujinmainuk atsugtamainaitjume. 21Tujash jujú wakanik ayuno takaaku, Apajuí aujku jiimainai, tiuwai.

Jesús awentsag ni mantamnatnuji etsegkamu

(Mr. 9.30-32; Lc. 9.43-45)

22Galilea weenak ijunja shimamunum Jesús jintintaiji aidaun chichajak:

—Aentsmaga akiinauwa nunak, aents aidaunum sujukagtatui, 23dutikawagmatai maawagtatui; tujash kampatum tsawanta jui nantaktatui, tau.

Tutai ditashkam senchi wake besekajui.

Jega Apajuí ememattainum kuichik akikmaktin tibau

24Nunik Jesús ni jintintai aidaujai yaakat Capernaúm jegawagmatai, jega Apajuí ememattainum kuichik itaamun yajumin aidau Pedron jegaantag iniinak:

—¿Amina jintinjamnuk jega Apajuí ememattainum kuichik itaata tibauwa nunak akikmakchattawak?, tuidau.

25Tama Pedro ayaak:

—Ehé akikmaktatui, tusa ukuak jegá wayamtai. Jesús niiyá iniak:

—¿Simogka amesh wajuk anentaimtame? ¿Ju nugka juiya Rey aidaush yaá aents aidauna akikmakta tuinawa? ¿Ditá uchijish akikmainawak atsa tikich aents aidaunak akikmakta tuina?, tau.

26Tutai Pedro ayaak:

—Ikaya aina nuna akikmakta tuinawai, tau. Tutai Jesús ayaak:

—Dekaske, ditá uchijig akikmainatsui; 27tujash nunin aig dita shiig juwakchainum tau asá kuchanum weme agsea ajugtá, dutikam dekatkau namak ajuittam nuna weni iwanjam diistá. Nui kuichik egkemtatui. Nunú kuichik jukim jega Apajuí ememattainum weme, midau aminujai akikmakta, tiuwai.

Currently Selected:

(Evangelio según San Mateo) 17: AGR

Highlight

Copy

Compare