(Evangelio según San Mateo) 14

Juan Yamijatin maamu

(Mr. 6.14-29; Lc. 9.7-9)

1Nunú tsawantinig Herodes tetrarca Jesús pachisa tuinamun antuku, 2nunik ni inake aidaun chichajak: “Duka Juan Yamijatnai, nunú nantakne, nuniku asa senchijí ajawai aents dutikmainchaun iwaina nunak”, tau.

3Nunak Herodesak niina yachi Felipe nuwe Herodiasan nuwatuk pujau asa Juagkan achiká cárcel egkeau aajakui. 4Wagki Juan chichajak: “Amek, yatsumi nuweg nuwatkamek pujumaitsume”, tibau asa.

5Herodesak maumainaitak aents aidaun ishamak idaisauwai; wagki Juagnak profetayai tuidau asagmatai. 6Tujash dutikauwaitak Herodes akiinamuji tsawagmatai, Herodiasa nawanji ipaamu aidau eemtin nantsemauwai, nuniak Herodesan shiig awajkauwai, 7dutikam makichkish yapajimainchaun anagkuauwai ni wajina segattawa nunak imatiksag susatatus. 8Tima nuwauchishkam dukují akatjam, Herodesan jegantun:

—Platonum Juan Yamijatnun buuké sujustá, tusa segauwai.

9Nunú tama Rey Herodesak wake besekui, nuniayatak ipaamu aidaush antuinamunum yapajimainchaun anagkuau asa, susatnume tiuwai.

10Dutika inamjauwai Juan cárcel puja nuna buuken tsupiktinme tusa. 11Timatai Juagkan buuken platonum egkejag itaantajui, dutika nuwauchin susajui. Ni juki dukujin susauwai. 12Dutikawagmatai Juagkan jintintaiji aidau kautuawag iyashin jukiag ukusag ukuinak, Jesusan wejiag ujakajui.

Jesús cinco mil aents ayugkamu

(Mr. 6.30-44; Lc. 9.10-17; Jn. 6.1-15)

13Jesús nuna antuk, nuiya jiinki barcanum egkemag uwejush agkantunum nigki pujustatus weuwai; nuniai aents aidaushkam dekaawag, yaaktanmaya juakiag kukag shimutkajui. 14Nuniai Jesús barcanmaya jinkamá, kuashat aents tuwaká ijunun wainak, wait anenjauwai, nunik jau aidau ikaunmamunash etsagakui. 15Nuniai kiyau asamtai, niina jintintaiji aidau jegaantag:

—Juig aents atsamunum batsatji, etsash akaewai. Aentsuk akatjam ishiakta, yaakat yaijuch aina nui wegag dita yuwatnun sumaktinme, tuidau.

16Tutai Jesús ayaak:

—Wemain ainatsui, atum dita yuwatnuk susatajum, tau.

17Tama dita aiinak:

—Atsugtamui ayatak cinco pag nuigtú jimag namak ajutjamui.

18Tiagtai Jesús:

—Jui itagtuatajum, tiuwai. 19Tusa aents aidaunak chijichi aina nui batsamsatnume tiuwai. Tusa cinco pagkan nuigtú jimag namaka nuna juki, nayaimpinum pagkai see tusa, pag aidaun puujá ni jintintaiji aidaun tinabiu; dutikam dita aents aidaun tinabiajui. 20Tuja ashí yuwawagmatai, ampinkaun yajuakag doce chagkinnum aimjajui. 21Nui yuawaju aina duka cinco mil aishmag tumain aajakajui; nuwa aidau, uchi aidaush dekapatsuk.

Jesús yumí awanken wekaesá webau

(Mr. 6.45-52; Jn. 6.16-21)

22Nuna dutika, Jesusak ni jintintaiji aidaunak barcanum egkemjag ditá eemak kuchá amain katigtinme tusa ishimak, nigka aents aidaun akateg ukuktatus juwakui. 23Nunik aents aidaun akateg ukuak, mujanum kanakí wakauwai Apajuin aujsatatus. Nunik kiyagmataishkam nuig nigki pujau, 24nuniai barcashkam atushat nugkan ukukí wegai, dase igku umpuau, dutikamu asa yumi tajeamujiya nu barcanak senchi pegau. 25Imaniai tsawagtatak weamunum, Jesús yumí awanken wekaegas ditan adijkauwai. 26Nunik yumí awanken wekaegas minittaman jintintaiji aidau wainkag, puyatkag:

—¡Pasun, pasun! tusag untsumaidau sapigmaidau asag.

27Imatiagtai Jesús chichaak:

—¡Witjai, ishamkaigpajum! ¡Imatigpajum! tau.

28Tutai Pedro ayaak:

—Apuh, dekas ametkumek minash, yuminum wekaesam tantata tujutia, tau.

29Tutai:

—Minitá, tiuwai Jesuschakam.

Tama Pedroshkam barcanmaya jiinki, yumí awanken wekaegas Jesús wajamunum jegantatus wegau. 30Tujash dase senchi dasentun wainak ishamkau, nunik yuminum tepeak:

—¡Apuh, achigkata! tau.

31Taig Jesuschakam uwegnum achikú, dutika:

—¡Aents imanis dekaskeapi tuchauwah! ¿Wagka utujimkaume?, tiuwai.

32Tusa barcanum egkemjagmatai, daseg mijakui. 33Nunikmatai ashí barcanum chimpijuk Jesusan jegaantag emematuinak:

—¡Amek dekaskenum Apajuin Uchijiyaitme!, tiajui.

Jesús Genesaretnumia jau aidau etsagakbau

(Mr. 6.53-56)

34Nuna nunikag katigkag Genesaret nugkanum jegawajui. 35Nunikmatai nuiya aents aidau Jesusa wainkajui, nunikag ashí nu nugkanmag etsegkajui, dutikawagmatai ashí jau aidaunak niina ikautuidau; 36dutikawajam ni jaanchji weninakesh antigtajai, idaikagtusta tusag segaidau, tuja ashí aents antigkaju aidauk tsagagkajui.

Currently Selected:

(Evangelio según San Mateo) 14: AGR

Highlight

Copy

Compare