(Evangelio según San Lucas) 17
17
Tikichin pegkegchau takamtikaidau pachisa tibau
(Mt. 18.6-7, 21-22; Mr. 9.42)
1Jesús jintintaiji aidaun chichajak: —Kakajus tupanmaitsui tudau takata nuna anentai egketkagtuina duka; tujash ¡wait anentajai makichik aentskesh tikichin tudau takamtikaina nunak! 2Dekas pegkeja duka jujú piipich aina juiya mina dekaskeapi tujutuina nuna tudaun takamtikaidauk, dekas kaya muun juki kuntugnum jigká detua nayantsa kunajin ajugká ajapmainus ajapachbau ainatai. 3Nuadui ¡Atumek kuitamamkatajum! “Amina yatsum tudau takagtamkuig, jiyaktá; dutikam tsagkugtugta takuig, tsagkujata. 4Nuigtú makichik tsawantinig sieteya imagnia tudaun takagtamas, sieteya imania tajutjama: Atak awagkinuk ankashtatjai takuig, tsagkujata”, tiuwai.
Dekaskeapi tabauwa nu
(Mt. 21.21)
5Apóstol aidau Apu Jesusan:
—Dekaskeapi tabau aan nagkaemas sukagtusta, tuidau.
6Tiagtai Apu Jesús ayaak:
—Dekaskeapi tabauwa nu mostaza jigkayiya nuninkesh ajutjamainakuig, ju sicómoro chichagkujum: “Teganim nayantsanum wajaata”, tamak nunisag umigtamainai, tiuwai.
Inak aidau umimain
7“¿Atum ainajum anuiyash, ya inake ajanum takaak wekagu nuniachkush baká kuitamak wekagu taamtai, wayam mesanum ekeemsam yujumak yuwata, tumainaita? 8¿Nunak tutsuk: ‘Aagkú yuwatin umigtukta, nunikam yapagmamam ajamjusta wi yuwan, uwagmatai amesh dui yuwam uwagta’, tuchauk aina? 9¿Inakega nuna dutikata tibaun imatiksag umikmataish see tinuk aina? 10Atumshakam nunisjumek, Apajuí ashí dutikata tibauwa duke umiká idaikugmek: ‘Jutiik inak atsumchatai ainaji, imá tibauwa duke umidau asaja’, tumainaitjume”.
Diez aents lepragtin aidaun Jesús etsagakbau
11Jesús Jerusalén weak, Samaria, Galileajai tesagdayamu jinta asamtai nuní nagkaebau. 12Nunik yaakat yaignum jegai, diez aents lepragtin jiinag ikaag ijuntsaju, 13nunik senchi untsumkag:
—¡Jesús, Maestro, jutiish wait anenkagtujia! wajaidau.
14Imatiagtai Jesús wainak, chichajak:
—Wetajum nunikjum sacerdote wantintuktajum, tiu.
Tima ditashkam, jintá wesag pegkeg wajasaju. 15Nunik dita aina nuiya makichik ni tsagagbaujin wainmamak, senchi jiiká Apajuin emematki waketak, 16Jesusa jegantun tikishmag dijayin nugkan antig pujus, see tau. Duka samarianmaya aajakui. 17Nunitai Jesús chichak:
—¿Diez aidau tsagagchagmaka? ¿Nueveya dusha wajukawagmae? 18¿Imá jukeuchikaih tikich nugkanmayayaitak wakitki Apajuí ememati duka? tau.
19Tusa Jesús:
—Wajakim wetá, amek dekaskeapi tame dui tsagajume, tiuwai.
Apajuish wajutí inamjatnaita tibau
(Mt. 24.23-28, 36-41)
20Fariseo aidau Jesusan, Apajuish wajutí inamjatasash taatnaita tusag inidau.
Tama ni ayaak: —Apajuí inamjatna duka duwiyap atatua tusaik kakajus dekamaitsui. 21Nuniau asamtai: “Jui inamui, awi inamui”, tabauk achatnai. Apajuik yamaiya juik atumin inamui, tiuwai.
22Tusa jintintaiji aidaun chichajak:
—Tsawan jegatnai, Aentsmaga akiinauwa nuna makichik tsawankesh wainkatatus wakeyagtin aina nu, nuniakush waitkachagtin ainawai. 23Ujumak aents aidaukesh chichagtamainak: “Jui pujawai”, nuniachkush “awi pujume”, tujamainakuish wegpajum nuigtushkam nemagkaigpajum. 24Wagki peem peeti nayaimpin mai yantamejai tsaaptin emama numamtuk wajaktinai tsawan Aentsmaga akiinau minamu atina duka. 25Nunú tsawan jegatsaig, dekatkauk senchi waittsattajai, aantsag aents aidaush dakitjiagtatui. 26Noé pujusua nu tsawantin wajukejakajua numamtuk wajagtinai, tsawan Aentsmaga akiinauwa nu minamunmash. 27Aents aidauk yuwinak, umutnash umuinak, nuwenainak, nawanjin suju wajá batsatai, Noé niina arcajin egkemauwai, nuniai diluvio minak ashí tajakui. 28Nunisag Lot pujujakua nu tsawantinish yuwinak, umuinak, sumainak, sujuinak, ajakmainak nuigtú jegá jegam wajá batsataidau; 29nuniai Lot Sodoma pujau jiinkiuwai, nunikmatai nayaimpinmaya jii yutug azufrejai pachimdaegag iyajui, nunikmatai ashí jinawajui. 30Nunisag atinai Aentsmaga akiinauwa nu wantinkatna dusha.
31“Nu tsawantin, jega ekenja jegamkamu nagkatka nui pujauk, wajiiji jegá aunak akaikig jukishti; antsag ajanum takaak pujaushkam jeenig wakitkishti. 32Adeagtajum Lota nuwe wajukauwaita nu. 33Aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak niina pujutjinash puyatjukchauk, uwemjatnai.
34“Junashkam tajime: Jimag aents kashi makichik pegaknumag tsanias tepaushkam, makichik juwaku, tikichik ukuam atinai. 35Jimag nuwa tsanias deketainum dekeak pujuidaushkam makichik juwaku, tikichik ukuam atinai. 36Jimag aents ajanum takaak pujaushkam, makichik juwaku, tikichik ukuam atinai”, tau.
37Tutai iniinak:
—¿Apuh, dusha tuwí nuniktinaita?
Tiagtai ni ayaak:
—Tuwí jakau tepettawa, nuwi chuwagkak tuwakagtinai, tiuwai.
Currently Selected:
(Evangelio según San Lucas) 17: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.