(Evangelio según San Juan) 6
6
Jesús cinco mil aents ayugkamu
(Mt. 14.13-21; Mr. 6.30-44; Lc. 9.10-17)
1Nuna tusa ukuak, Jesusak Galilea kuchají amain weuwai, Tiberias tutainum. 2Nuniamunum kuashat aents saetukajui, jau aidaun aents dutikmainchaun dutikaun wainkaju asag. 3Nudiagtai Jesusak nainnum waka, jintintaiji aidaujai ekeemsauwai, 4Judío aidau fiestamtaiji Pascua tikiju wajasú ai. 5Nunik Jesús niimkamá shiig kuashat aents niiní minidaun wainak, Felipen iniak:
—¿Pagkash tuwiya sumaktatji aents imaanik minina au ayugmainush? tau.
6Tujash nunak dekapsatatus tiuwai, wagki nigka dekau wajuk dutikattawa nunak. 7Tama Felipe ayaak:
—Doscientos denariowai pag sumaka, makí makichik aents imá imachik tinamash tuké jegamaitsui, tiuwai.
8Tutai jintintaiji aina nuiya makichik Andrés, Simón Pedro tutaya nuna yachi chichaak:
9—Jui makichik uchi cinco pag cebadajai najanamu nuigtú jimag namak ajawai. ¿Jukeuchish aents ibauwa nuish jegamainkaih? tiuwai.
10Tiagtai Jesús ayaak:
—Ashí aents aidau batsamsatajum titajum, tiuwai.
Nuanui kuashat chijichi ayau, nuwi batsamsajui cinco mil aishmag tumain. 11Jesús nuna pagkan juki Apajuin see tii jintintaiji aidaun tinamkauwai, dutikam dita jukiag batsata nuna tinamkajui, dutika namaknashkam dita wakegaina dutiksag tinamkajui. 12Dutikam shiig yuwawagmatai, Jesús jintintaiji aidaun chichajak:
—Punjau ampinkaja duka yajuaktajum, wainak utsankai, tiuwai.
13Tima ditashkam yajuakajui, dutikawag doce chagkinnum aimkajui, cinco pag cebada najanamu yuwaku puujá ampigbau aina nuna. 14Dutikawagmatai aents aidaushkam, Jesús aents dutikmainchaun dutikau asamtai, chichainak:
—Juka dekaskenum profeta ju nugka jui taatnai tibauwa nuuwai, tuidau.
15Tujash aents aidau Jesusan tajuawag kakantus jukiag rey ematasag wakegainamun dekau asa, ataktú nigki muja yakí jiitkaunum wakauwai.
Jesús yumí awanken wekaesá webau
(Mt. 14.22-33; Mr. 6.45-52)
16Nunik kintamai, Jesusa jintintaiji aidauk kuchanum jegawajui, 17nunikag barcanum chimpimjag Capernaúm katigtatus weedau. Shiig suwe wajasmataishkam, Jesusak eke wakitkig taachu asamtai. 18Nuniamunum, dase senchi umpuamu asa kuchak senchi tsukatu. 19Imatikamaitak wiyankag seis kilómetro tumain kuwagainai, Jesús yumí awanken wekaegas barcan adijkattak minittaman wainkajui. Nunik ishamkajui. 20Nuniagtai Jesús chichaak:
—¡Witjai ishamkaigpajum! tiuwai.
21Tutai shiig aneasag barcanum egkejajui, nunik machik wesag wamkes dita jegatasa wegamunum anuumkajui.
Aents aidau Jesús egakbau
22Kashinia dui, aents kuchá amain juwaju aidauk adeajajui, jintintaiji aina duka makichik barca au asamtai ditak weenai, Jesús ditajai egkemjachua nuna. 23Nuniamunum yaakat Tiberiasnumia barca aidau, Apu Jesús Apajuin see tusa pagkan puujá, aents aidaun ayugkauwa nui, tikiju anumkajui. 24Nunikag diikmá, Jesús ni jintintaiji aidaujai nui atsuagtai, ataktú barca aina nui chimpimjag Capernaúm weajui, Jesusan egakagtatus.
Jesusai pag pujutan sukagtinuk
25Nunik kuchá amain katikmag Jesusan wainkag, iniinak:
—Maestroh, ¿wajutí juish taamume? tuidau.
26Tama Jesús ayaak:
—Dekas tajime, atum egatjum duka aents dutikmainchaun dutikamag dui egattsugme, pag shiig yuwamujum dui egatjume. 27Yutai dukap atsuk abuena duka anentaimtigpajum. Dekas yutai abuechau tuke pujutan sukagtina nu jukitasajum anentaimtustajum; nunak Aentsmaga akiinauwa nu amastatui, wagki Apajuí mina Apajua nu: Ame duka dutikata tusa inatjau asamtai.
28Timatai aents aidau iniinak:
—¿Wají dutikmainaita Apajuí wakegamu umigkatasaish? tuidau.
29Tiagtai Jesús ayaak:
—Juuwai Apajuí wakega duka, ni awemamua nuna dekaskeapi titinme tawa nuuwai.
30Tutai dita chichajuinak:
—¿Wají wainchatai iwainkagtumainaitme, nu wainkaja dekaskeapi tumainush? ¿Tuwaita ame takaamu aidaush? 31Jutii muunji aajakajua duka uwegshunum maná yuujakú ainawai, agagbaunmash: “Nayaimpinmaya pagkan yuwatnume tusa susauwai” tawai, tuidau.
32Tiagtai Jesús ayaak:
—Dekas tajime, nunak Moisés nayaimpinmaya pagnak susachui, mina Apajua nuuwai nayaimpinmaya pag dekaskea nuna sukagta duka. 33Wagki Apajuí pagjiya duka nayaimpinmaya jui akaikiuwa nuuwai, ashí nugkanmayan pujutan susatna nu.
34Tutai:
—Apuh, nu pag tuke sukagtita, tuidau.
35Tiagtai Jesús chichaak:
—Witjai pag pujutan sukagtinnuk, minai minidauk tuke yapajuashtin ainawai. Nunisag minai dekaskeapi tuidaushkam tuke kitaagchatin ainawai. 36Tujash timajim dutiksanuk tajime, mina waitiatkugmesh dekaskeapi tujuttsugme. 37Ashí mina Apag sujamu aina nu minaig tamain ainawai, nunú minai taidaunak wika dakitjashtatjai. 38Wagki wi nayaimpinmayan akaikig nunak, wi wakegamun takastasan taachuitjai; mina awetiuwa nu wakegamun takastasan tauwaitjai. 39Juuwai mina awetiuwa nu wakegamua duka, makichkish ni sujusbauwa nunak emegkaumainchauwaitag nu, dutikakun tsawan nagkanbaunmash inanmainaitag nuuwai. 40Wagki mina Apag wakegamua duka, ashí aents Apajuí Uchijimpapita tusa dekaskeapi tujutuidauk pujut nagkanchau ajitnume, nunikmatai wi tsawan nagkanbaunum inankitjai, tawa nuuwai.
41Nuna tutai judío aidauk Jesús augmattan nagkamawaju, wagki ni chichaak: “Witjai pag nayaimpinmayan akaikiunuk” tau asamtai.
42Nunik pepeemtunisag: —¿Ju Jesús José uchijí, apajish nuigtú dukujish jutii wainnuweg duchaukaih? ¿Wajukeakua jusha nayaimpinmayan akaikijai tusash tawa? tuidau.
43Tiagtai Jesús chichaak:
—Atumek tudayá yujatsuk idaisatajum. 44Makichkitigmekesh minaig tamain ainatsjume mina Apag awetiuwa nu itagmashkuig. Tuja wi inankittajai tsawan nagkanbaunum. 45Profeta aidau agagbaunum: “Ashí Apajuí jintintuamu agtinai”, tawai. Nunin asamtai ashí Apajun antugkau aina nu nuigtú niiniyan unuimaina nu minaig mininawai.
46“Nunak makichik aentskesh Apajun wainkau asa nuniatsui, ya Apajuiyai pujau tauwaita duke Apagnak wainkauwai. 47Dekas tajime, minai dekaskeapi tuidauk, pujut tuke atina nu ajuinawai. 48Witjai pag pujutan sukagtinnuk. 49Atumi muunjum aajakajua nu uwegshunum maná yuwawaju aina duka jinawaju ainawai; 50tujash wika pag nayaimpinmaya akaikiuwa nuna tajai, ya nuna yuwattawa duka jakashtinai tusan. 51Witjai pag iwaaku nayaimpinmayan akaikiuwaitag nunak. Makichik aentskesh ju pagka juna yuwauk, tuke pujutnai. Wi pagkan sukagtustatag duka, mina iyashjua nuuwai, nunak wi ashí nugkanmaya aidaun pujutan susatasan nuniktatjai”.
52Tutai judío aidau ditak tudaiyinak:
—¿Utugsaya niina nejenash yuwatajum tusash sujamainaita? tuidau.
53Tiagtai Jesús ditan chichajak:
—Dekas tajime, Aentsmaga akiinauwa nuna neje yuwachkugmek, numpesh umachkugmek, pujutak atsugtabiagtinai. 54Mina nejejun yuwak, numpagnash uma nu, pujut tuke atina nu ajawai; nuna tsawan nagkanbaunum wi inankittajai. 55Wagki dekaskenum yutaiya duka mina nejejua nuuwai nuigtú dekaskenum umutaiya dusha, mina numpajua nuuwai. 56Mina nejejun yuwak, mina numpajun umauk, wijai ijutkawai, nunisnuk wisha niijai ijutkajai. 57Apag iwaaku pujuwa nu awetiu asamtai, wisha niinig iwaaku pujajai; nunin asamtai minaiyan yuwauk, wijai pujustinai. 58Juuwai pag nayaimpinmaya akaikiuwa nu. Atumi muunjum maná yuujakaju jinawajua nuninchau, ju pagka juiyan yuwauk, tuke pujustinai.
59Jesús ashí ju aidaun pachis jintinkagtuauwa nunak, Capernaúm jega ijuntainum tiuwai.
Chicham pujut tuke atina nuna sukagtin
60Nu jintinkagtamun antukag, kuashat niina nemajuidau chichainak:
—Juna jintia juka shiig utugchatai, ¿ya nunash nunimainaita? tuidau.
61Nuna tusa ashishmatuinamun Jesús dekaa chichajak:
—¿Wi tajim duka atumnak shiig awajtamkachajek? 62¿Atumesh wajukmainaitjume, Aentsmaga akiinauwa nu yaunchuk pujujakbauwa nuwi weak takunu wainkugmesh? 63Wakani pujutan sukagta duka, tujash iyashia duka nunak sukagtumaitsui; wi chicham aidaun timajim nu ainawai wakan aidauk nuigtú pujut aina duka. 64Tujash atum ainajum anuiya ujumak dekaskeapi tuinachush ainawai. Nunak Jesusak yama nagkamsag ya aidauwa dekaskeapi tuinatsua, tuja ya sujama atinaita nuna dekau asa tiuwai. 65Nuigtushkam chichaak:
—Nuadui timajime makichkitigmekesh minaig minimainchau ainagme, Apag nunikti tichamu aidautigmek tusan.
66Duwi nagkamas, kuashat jintintaiji aidauk ukukiajui, nunikag nuigtuk niijaig yujainachu. 67Nunikagmatai Jesús ni jintintaiji doce aina nuna:
—¿Atumesh wetasajum wakegatsjumek? tau.
68Tutai Simón Pedro ayaak:
—Apuh, ¿jutiish yayaig wetaji? Amina chichamjum aina dukeajama pujut tuke atinun sukagta duka. 69Jutiik aminí dekaskeapi tiuwaitji, nunin asá dekaji, amek Cristo, Apajuí pegkegma nudauwaitme, tau.
70Tutai Jesús ayaak:
—¿Wichaukaitag atum doce ainajum nuna etegjaunuk? Dutikamu ainagminig, atum ainajum anui makichik Iwanch pachitkawai, tiuwai.
71Nunak Judas Iscariote, Simogka uchijiya nuna tiuwai, wagki nunú doce aina nuiya sujam atin asa.
Currently Selected:
(Evangelio según San Juan) 6: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.