(Los Hechos de los Apóstoles) 8

Saulo Jesusa nemajuidaun waitkasbau

1Sauloshkam nui pujau asa Estebagkak mantamnati tau.

Nunú tsawantin iglesia Jerusalén batsatu senchi waitkamu nagkamnauwai; nuniau asamtai ashí nugkanum Judea, Samarianmash pampagkajui, tujash apóstol aidauk nuig batsatu. 2Tuja Estebannak ujumak aents Apajuí puyatjus umijin aidau, Estebagkan iyashin jukiag ukusag, senchi buutiajui. 3Nuniamunum Saulok iglesianmaya aidau waitkatan nagkamau, nuniau asa makí makichik jeganum utua, aishmag aidaun, nuwanashkam achig yajumu cárcel chimpiatatus.

Yamajam chicham Samaria etsegkamu

4Tujash pampagkaju aidauk, dita tuwí jegainawa nuanui yamajam chichama nuna etsejuidau. 5Nuniamunum Felipe yaakat Samaria jegaa, Cristo pachis etseju. 6Nunitai aents aidauk ijunjag Felipe etsegbaun puyatjus antuidau, nuninak aents dutikmainchau dutikamunash wainaidau. 7Wagki kuashat aents wakan pegkegchau ajamu aidauk senchi untsumak jiinaidau, nuigtushkam wekaechau aidau, nuigtú shutú aidaunashkam etsagaku. 8Dutiktai nunú yaaktanmaya aidauk shiig aneedau.

9Yaunchuk nagkamas nunú yaaktanum makichik aents Simón daagtin magia takau pujujakui, nuniak samarianmaya aidaunak tsanuau “Wika imajaitjai” tusa. 10Tutai, ashí uchi, muun aidaujai nagkamas puyatjus antujuinak: “Juuwai ‘dekas Apajuí senchijig’ ”, tuidau.

11Tuidau asag nuna antujuidau, wagki kuashat tsawantai mágico takatai aidaujai takaak tsanú pujujuinamu asag. 12Tujash Felipe yamajam chichaman Apajuí inabaujin nuigtú Jesucristun pachis etsegtai, aishmag nuwa aidaujai dekaskeapi tiaju aidauk yamimakajui. 13Nuniamunum Simogshakam dekaskeapi tusa yamimag, Felipejai ashí yantamnum wekaegu, nuniak aents dutikmainchaun kuashat dutiktai puyatjus diyau.

14Nuniamun apóstol aidau Jerusalén batsatu, Samarianmaya aidaush Apajuí chichamen wakegas antuinawai tabaun antukag, Pedron Juagjai awemajui. 15Dutikawajam ditashkam jegawag Apajuin aujtusaju, Wakaní Pegkejin jukitnume tusa, 16wagki eke ditaig makichkinmakesh Wakaní Pegkejig taachui, ayatak Apu Jesusa daajinak pachisag yamimakaju asagmatai, 17Pedro Juagjai buuknum achikag Apajuin aujtuinam, Wakaní Pegkeji egkemtujajui.

18Apóstol aidau aentsun buuknum achitai, Wakaní Pegkeji egkemtamun Simón wainak, kuichkin anagkuauwai.

19Nuniak: Minash aanú senchi sujustajum, wisha tikich aents aidaun buuknum achiai Wakaní Pegkejin jukitnume, tau.

20Tutai Pedro chichajak:

—Amek kuichkigmijai megkaekatnaitme, Apajuí anentag sukagtusbauwa nunú kuichki sumakta tiu asam. 21Amek makichkish jukiti tamak amaitsume, wagki Apajuí emtinig amina anentaimik pegkegchauwai. 22Nuniau asam pegkegchaujum idaikum Apajuí segatá, ame aaja anentaimjaum nunash tsagkugtamjachaintash; 23wagki senchi kajeam nuna wainjame, nuniau asam pegkegchauwa nu achikam wekaeme, tiuwai.

24Tama Simón ayaak:

—Atum minash Apu segatjitajum, atum mina tujutjum nunú imanisag nagkaetuki, tiuwai.

25Pedro Juagjai Apajuí chichame etsegbaun ashimkag, Jerusalén wakitkiajui, nuninak kuashat yaakat yaig samarianmaya batsatbaunum weenak, yamajam chichaman etsejuidau.

Felipe Etiopianmaya yamigbau

26Nuniku ai makichik Apajuí angelji Felipen chichajak: “Felipeh, surnumanini weta jinta Jerusalén juwaki Gaza wegamunum uwejush awa nui”, tiuwai. 27Nu tima Felipeshkam weuwai, nunikmá etiopianmaya aents, aents kaga emamu, Etiopía reinaji Candace kuichkijin kuitamin Jerusalén Apajuin ememattatus weu wakettatman wainkau; 28nugkeen waketak carrojin ekeemas profeta Isaías agagbaun au aujkawa wegau.

29Nunittaman Wakan Felipen chichajak: “Carro wega au adijkata nunikam tikiju wajastá”, tiuwai. 30Tama Felipeshkam adijkamá profeta Isaías agagbaun au aujkawa minittaman antujuk iniak:

—¿Ame aujam dusha antamek? tau.

31Tama ni ayaak:

—¿Wajuk antuktajaki, nuna taku tawai tusa ujachbaunush? tau.

Nuna tusa Felipen:

—Wakata tiuwai niijai ekeemsatatus. 32Agagbaunum ju chicham tawa juna auju:

“Uwig mautainum juki ematia numamtuk jukiag emagmayi;

nunisag uwig uje tsupigmash takamtak tepegama numamtuk niishkam chichakchabi.

33Nuniau asa ayatak yunumkabi, nunitaish makichkish ayamjauk atsusui,

niina uchijigkesh atsugsauwai ju nugka juig maamu asa”.#8.33 Is. 53.7-8.

34Tibauwa nuna eunuco#8.34 “Eunuco” tawa juka, aishmag suki katijai tsupigkamu aajakajui, ashí rey jeen takasagtin aidau, nunú shiig wainkatasam diistá Mt. 19.12 Jesús nunin aidaun kampatum niimtinun tawa nu. Felipen iniak:

—Wait aneasam tujutta, ¿junash profetash yana takua tawa; nigkik tumama, atsa tikichin takug tawa?

35Tutai Felipeshkam nunú ni Apajuí chichamen auja nui nagkama, chicham yamagman Jesusan pachis ujakú. 36Nunik weamunum jintaa entsa aunum jegantá eunuco chichaak:

—¿Ju yumi awa jui wi yamimagta tamash wají utugchata amainaita? tau.

37Tutai Felipe ayaak:

—Ame dekas ashí anentaimjai dekaskeapi takumek yamimamainaitme, tiuwai.

Tama ni ayaak:

—Wika Jesusak dekas Apajuí Uchijimpapita tajai, tiuwai.

38Tutai carrojum awantata tusa awantamtai, mai yuminum jegawajui nunik Felipeshkam yamijú. 39Entsanmaya jiinkimtai, Wakaní Pegkeji Felipenak jukiuwai; dutikamtai eunucok ataktuk wainkachu, tujash shiig aneas weuwai. 40Felipek Azoto wantinkauwai, nunik ashí yaaktanum nagkaemak yamajam chichaman etse etsegkawa Cesarea jegauwai.

Currently Selected:

(Los Hechos de los Apóstoles) 8: AGR

Highlight

Copy

Compare