(Los Hechos de los Apóstoles) 16

Timoteo Pablon Silasjai uyuntsamu

1Pablo Derbe jegaa nagkaemaki Listra jegauwai. Nui makichik Jesusa nemajin Timoteo daagtinun wainkauwai, dukujig judío nuwa Jesusa nemajin, tujash apají griego. 2Yatsut listranmaya, Iconionmaya aidaushkam Timoteo pachisag pegkejan chichajuidau. 3Tuidau asagmatai Pablo uyuntusti tau asa, pakagtajum tima pakajiajui, judío nui batsamin aidau pegkegchaun anentaimtinum tau asa, apají griegon ashí dekaidau asagmatai. 4Nunikag ashí yaaktanum nagkaemainak, Jesusa nemajin aidaun, apóstol aidau nuigtú anciano aidau Jerusalén batsata nujai chichaman umikag agagbauwa nuna pachisag ujaidau. 5Nuniau asamtai iglesia aidaush dekaskeapi tabaujiya nuig ichichmamaidau, nuninak kashí kashinig kawedau.

Pablo kajanum macedonianmaya aents wainkamu

6Wakaní Pegkejiya nunú Asia nugkanmag chichamak etsegkaipa tabau asag, Frigia nugkanum nuigtú Galaciaya aatú nagkaemakiajui; 7nunikag Misia nugkanum jegawag, Bitinia nugkanum wegagtatus anentaimaidau; tujash Jesusa Wakaní wetinme tichauwai. 8Nunikag Misianak tutupit nagkaikiag Troas jegawajui. 9Nuanui Pablon Macedonianmaya aents kajanum paan wantintuk chichajak: “Macedonia katigkam jutiish yaijatkata”, taun wainkauwai. 10Pablo nuna wainkamtai, dekas Macedonia wegagmi tusa umintsabiaji, junak Apajuiyap yamajam chichaman awi etsegkati tujamu asa jutikawa tusaja.

Pablo Silasjai Filipos jegaamu

11Nunikaja Troas egkemjá tutupnik wega weakua ajuntai Samotracia jegaa, kashinia dui Neápolis jegabiaji. 12Nui pujusá Filipos weamiaji, romanmaya batsamtaiji dekas yaakat iman Macedonia nugkeen awa nuanui, nunika nu yaaktanum machik tsawan pujusbaiji. 13Nuniamunum tsawan ayamtai tsawagmatai, yaakat jiinki namaká uwet jegawabiaji, judío aidau Apajuí aujtaijig awints awatai tau asaja; nui pekaamsa nuwa aidau ijunjau chicham ujabiaji. 14Nu aina nuiya nuwa Lidia daagtin, yaakat tiatiranmaya jaanch kapantu nentetkau sujin, Apajuinash emematin ekeemas antú ekeemayi; nunittaman Apu Apajuí anentain antinkabi Pablo etsegbaunash shiig antukti, tusa. 15Nunik ashí niina patayijai yamimakag:

—Atumesh, minash Apu Jesusan dekas umigmain waitkugmek, mina jegajui taajum kanagtajum tusa segapakui, weamiaji nui pujustasa.

Pablo Silasjai cárcel egkeamu

16Nunika, Apajuí aujtainum wegajin, nuwa muntsujut inak wakan dekamin ajamu igkumpaktatus jiintugmakmayi. Nunú dekaamtai apuji aidauk kuashat kuichkin juidau. 17Nunú, jutiin Pablojai wegajin pataetugmak minis senchi untsumak:

—¡Ju aents aina juka Apajuí ashí nagkaekagtasu muunta nuna inake ainawai, nunin asag nuiya uwemta nuna pachis jintinjamatatus minitjamainawai! wajau.

18Nunak kuashat tsawantai imatú wekaegu, nunitai Pablo kajejuk ayampatua wakanin chichajak: Jesucristo daajin tajame, aanú nuwauch jiinkim ukuktá.

Tamawaik wakanchakam jiinki ukukiuwai.

19Tujash nuna apuji aidau ni dekamamtai kuichik jutaijin nunimainchau wajasmatai, Pablon Silasjai achiká jukiag, plazanum apu aidau eemtin ejegawaju. 20Dutika juez aidaun chichajuinak:

—Jujú aents aina juka judío ainawai, nuninaitak iina yaaktajin taawag dapamkagtuinawai, 21nuninak ditá pujutin ii romanmaya aidautik machikish dutikmaitsug nuna jintinawai, tuidau.

22Nuna tiagtai aents aidau Pablon Silasjai pampantug wajatkiagmatai, juez aidau, jaanchjin awitug, numí suwimatajum, tusa inamjau. 23Timatai senchi suwimawag cárcel egkeawaju, dutikawag achikbau kuitamin aidaun:

—Shiig kuitamkatajum, tiajui. 24Nunú tiajam, achikbau kuitamnushkam juki, carcela initken calabozo egkeawajui, dutikawag naween cepo#16.24 “Cepo” tawa nunak, achikbau cárcel pujau jiinki tusag tapna jimag mai yantamen agtuamunum dawenum apatuk chanua ukujakú ainawai. apujtusag shiig emetug ukukiajui.

25Tujash aehaet wajasú ai, Pablo Silasjai Apajuin aujuinak, kantamtan kantam wajagtai, tikich achigbau aidauskam antú batsatu. 26Nuniai pachiachbau shiig senchi uujak, cárcel jegamku ajigbau aidaun senchi umuchiau, nuniaig waamak ashí waiti aidaushkam ujanjau; nunitai ashí achigbau aidau cadenayai jigkakbauk tsujinag kakekajui. 27Imaniai achikbau kuitamin shintaak diistakamá, carcela waitiji aidauk ujanag atatman wainkau, nunik espadajin ukuini juki maamata tau, achigbau aidauk tupikakiajeapi tusa. 28Nunitai Pablo senchi untsuká:

—Maamawaipa, jutiik ashí betek batsatji, tiuwai.

29Tutai achikbau kuitamnushkam jii ekemakjum sujustajum tusa segabiu, nunik ishamak kujaukmaikia tupikaki Pablo Silasjai wajamunum jegantá tikishmatjau. 30Dutika agaa jiikí:

—Muun aidauh, ¿wajina wisha dutikmainaitja uwemjatasanush? tusa iniau.

31Tuinam dita aiinak:

—Apu Jesucristo dekaskeapi tita, nuniakum ame, nuigtú amina pataim aidaujai uwemjattame, tiajui.

32Tusa Apu Apajuí chichamen niina ujaak, ashí niina jeen batsata nunash ujakui. 33Nunú hora kashia duik juki, achikbaun kuitamnushkam ipujamu aidaun nijatkau; dutikam nuadui yamimakaju ni, nuigtú ashí patayí aidaushkam. 34Nunik niina jeen juki yutain ajamsau, nunikag ashí niina jeen batsata duka shiig aneasaju, Apajuin dekaskeapi tiaju asag.

35Kashikmas juez aidau achijatin aidaun, achikbau kuitamnun awetiaju: Anú aents aidauk jiiktajum, timae titajum tusa. 36Tima achikbaun kuitamin Pablon chichajak:

—Juez aidau akupkati tujutiaje; nunin asamtai shiig aneasjum wetajum, tau.

37Tujash Pablo achijatin aidaun chichajak:

—Jutiik romanmaya aents ainajinig shiig chichaman dekagtamtsuk tuwakbaunum asutamawag cárcel egkepawagmae; dutijabau ainayatkush, ¿wagka yamaish uukash jigmakta tuinawa? Duka nunimaitsui, dita taawag jigmaktinme, tuidau.

38Achijatin aidau juez aidaun timae tusa ujainam, antukag senchi ishamkaju, romanmaya aents ainaji tuidau asagmatai. 39Nunikag Pablon, Silasjai wejiaju, tsagkugtugtajum, tita tusag. Dutikawag jiikiag:

—Juig pujutsuk wetajum, tusag awemaju. 40Carcelnumia jiinkiag Pablo Silasjai Lidia jeen weaju, nunikag nui yatsut aidaun wainkag anentain ichichtujag ukuinak shiyakajui.

Currently Selected:

(Los Hechos de los Apóstoles) 16: AGR

Highlight

Copy

Compare