Apocalipsis 16

Ri wukub copas re c'axc'obic

1Chupa ri Rocho Dios chila' chicaj xinta jun lic co cach'awic, jewa' cubi'ij pan chique ri wukub ángeles: «Jix y ji'k'eja che ruwachulew ri royowal ri Dios, ri c'o chupa ri wukub copas» cacha'.

Ri nabe copa

2Xe'ec c'u ri nabe ángel y xu'k'eja chwi ruwachulew ri c'o chupa rucopa, y ruma wa' xwinakir jun c'axlaj yabil re ch'a'c chiquij tak ri winak y xujek c'u ri' cak'olol quij conoje, wa' e ri xec'uluw ri retalil ri nimalaj itzel chicop y xquilok'nimaj uk'ij ri jun uc'axwach 'anom.

Ruca'm copa

3Ruca'm ángel xu'k'eja chwi ri mar ri c'o chupa rucopa, y ruma wa' xu'an quic' uwach ri mar pacha' ruquiq'uel juna ticawex camisam; y xecam c'u conoje tak rawaj e c'o chupa ri mar.

Rurox copa

4Rurox ángel xu'k'eja ri c'o chupa rucopa chwi tak ri nimaya' y chwi tak rac'al pa calax wi tak lo ri ya'; y ruma wa' ronoje ri ya' xu'an quic' uwach. 5Tec'uchiri' xinta ri ángel ri ya'tal tak ri ya' puk'ab, jewa' cubi'ij:

«Lal Dios Kajawxel ri c'o wak'ij ora y ri xex chi c'o lo wi, xew Rilal lic Lal Santo, ma lic Lal jusuc' che ri k'atbal tzij 'anom la 6paquiwi ri xecamisan que ri tinamit la y tak ri k'alajisanelab e la. Xqui'an c'u chique xturuw ri quiquiq'uel. E uwari'che lic Lal jusuc' ma x'an la chique wa e camisanel caquikum quic'. ¡Ec'u lic takal wa' chique!» cacha'.

7Ewi xinta jun chic xch'aw lo chwa raltar, jewa' cubi'ij:

«Pakatzij wi, lal Dios Kajawxel, Rilal c'o ronoje unimal chuk'ab pak'ab la, ma ri k'atbal tzij ca'an la lic e usuc' y lic jusuc'» cacha'.

Rucaj copa

8Rucaj ángel xu'k'eja chwi ri k'ij ri c'o chupa rucopa, jela' c'u ri' xya'taj che ri k'ij quebuc'atisaj conoje ri winak ruc' ruc'atibal. 9Y lic xec'at c'u ri winak ruma ruc'atibal ri k'ij. Ruma c'u wa', xeyajan ruc' itzel tak ch'a'tem chirij ri Dios, ri c'o puk'ab cutak lo wa c'axc'obic paquiwi'. Yey na xquitzelej tane quitzij, ma e na xcaj taj caquiyac uk'ij ri Dios.

Ruro' copa

10Ruro' ángel xu'k'eja ri c'o chupa rucopa chwi ri tz'ulibal pa catakan wi ri nimalaj itzel chicop, y ruma wa' xu'an k'eku'm upa tak ri tinamit c'o puk'ab ri nimalaj itzel chicop. Conoje tak c'u ri winak lic caquicach'aca' upa ri cak' ruma ri c'ax. 11Lic c'ut tzel xech'a't chirij ri Dios c'o chila' chicaj ruma tak ri c'axc'obic y tak ri ch'a'c chiquij; y na xquitzelej ta quitzij chwach ri Dios che tak ri na utz taj qui'anom.

Ruwakak copa

12Ruwakak ángel xu'k'eja pa ri nimaya' Eufrates ri c'o chupa rucopa; y ruma wa', xchakij ri ya' pa ri nimalaj rakana', cha' jela' utz quebic'ow lo ri takanelab e petinak pa relebal lo ri k'ij. 13Y xinwil c'u oxib itzelilaj uxlabixel jela' quetzu'nic pacha' tutz'; jun quel lo puchi' ri dragón, jun chic quel lo puchi' ri nimalaj itzel chicop y jun chic quel lo puchi' ri jun k'alajisanel socoso'nel. 14Wa' e itzel uxlabixel caqui'an tak c'utubal y quebec cuc' conoje ri takanelab che ronoje ruwachulew cha' caquimol quichi' re caqui'an ch'a'oj chupa ri unimal k'ij re ruk'atbal tzij ri Dios, ri c'o ronoje unimal chuk'ab puk'ab. 15Jewa' cubi'ij ri Kanimajawal:

«Chitape', Ri'in quinopon iwuc' jela' pacha' ri oquibal re juna elek'om pa juna ja, ma ri elek'om na cubi'ij ta apanok jampala' coponic.#Mt. 24:43 Lic c'u nim uk'ij ralaxic china ri na cawar taj yey ucojom chi ruk'u' cha' we xinc'unic, na cuya ta uq'uix» xcha'.

16Y xquimol c'u quichi' ri takanelab chupa ri jun luwar rubi' pa ri ch'a'tem hebreo “Armagedón”.#16:16 “Armagedón”: Wa' que'elawi “juyub re Meguido”.

Ruwuk copa

17Ruwuk ángel xu'k'eja pa ri tew ri c'o chupa rucopa; y lic co xch'aw lo jun kulaj pa ri tz'ulibal re takanic c'o chupa ri Rocho Dios chila' chicaj, jewa' cubi'ij:

—Xq'uis c'u wa k'atbal tzij#16:17 Ruc' ri wukub copas re c'axc'obic, xq'uis ri royowal ri Dios. Ap. 15:1 —cacha'. 18Tec'uchiri' lic xyoc' ca'n ruxe' caj, xetataj uch'awibal jab caraklajic y cajininic; yey xpe jun nimalaj cabrakan che ruwachulew, wa' e cabrakan más nim u'anom chwi lo ri quic'oji'ic ri ticawex che ruwachulew. 19Ruma c'u wa', ri nimalaj tinamit xjakataj upa, oxib xu'ano; y conoje tak ri jujun chic tinamit e c'o che ruwachulew xewuluwubic. Ec'u ri Dios na xic'ow ta chuc'u'x tak ri mac u'anom ri nimalaj tinamit Babilonia; xuya c'u pa c'axc'obic ruma ri unimal royowal Rire chirij. 20Yey ruma c'u wa cabrakan conoje tak ri islas y tak ri juyub xesachic.

21Y xtzak lo chicaj nimak tak sakbach paquiwi ri ticawex. Ri ra'lal wa' laj jun quintal chujujunal. Ruma c'u ri c'axc'obic re ri nimak tak sakbach, ri winak lic tzel xech'a't chirij ri Dios, ma ri c'axc'obic xu'ano lic xibibal uwach.

Currently Selected:

Apocalipsis 16: acrT

Highlight

Copy

Compare