Gálatas 3
3
Cakac'ul ri Ruxlabixel ri Dios ruma xkacoj ri Utzilaj Tzij
1¡Tok'o' wach alak aj Galacia! Lic co 'anom che ri c'u'x alak. ¿China xsocoso'n e alak cha' na cacoj ta chi alak ri K'ijsak? Ma lic xk'alajisax chiwach alak sa' que'elawi rucamic ri Kanimajawal Jesucristo chwa ri cruz. 2Bi'ij alak wa' chwe: ¿Xc'ul alak ri Ruxlabixel ri Dios ruma xtakej alak ri takanic que raj judi'ab o ruma xta alak ri Utzilaj Tzij y xcubi' c'u'x alak che? 3¿Su'chac lic 'anom co che ri c'u'x alak? Ma ri binic silabic alak chwach ri Dios xjek lo alak ruma ruchuk'ab ri Ruxlabixel ri Dios, yey wo'ora ¿ca'aj cami alak ri' caq'uisbej alak wa' xa ruc' ri chuk'ab ralak? 4¿Na jinta cami utikom ri' che alak janipa tak ri c'ulum alak ruma ri Ruxlabixel ri Dios? Na cancoj ta c'ana ri'in we wa' na jinta utikom che alak. 5Ma echiri' ri Dios cuya ri Ruxlabixel che alak y ruc' ruchuk'ab cu'an nimak tak milagros chixo'l alak, ¿su'anic cu'ano? ¿E nawi ruma takem alak ri takanic que raj judi'ab o e ruma xta alak ri Utzilaj Tzij y xcubi' c'u'x alak che?
Ri cubulibal uc'u'x ri Abraham ruc' ri Dios
6Ri Abraham xcubi' uc'u'x ruc' ri Dios#3:6 Ri Abraham xucojo ri Dios e cu'ana janipa ri xubi'tisij che. Gn. 15:6 y ruma c'u ri' x'ani' jusuc' che. 7E uwari'che, chirajawaxic queta'maj alak wa': E janipa ri lic cubul quic'u'x ruc' ri Dios, ri' e ralc'o'al can ri Abraham. 8Ruch'a'tem ri Dios xex chi ubi'im wi lo paquiwi ri na e ta aj Israel, we rique cacubi' quic'u'x ruc' ri Dios, quebu'an jusuc'. Ma jewa' ri utzilaj tzij xbi'x lo ojertan che ri Abraham:
Awuma ri'at, ri Dios quebu'an bendecir conoje tak ri tinamit che ruwachulew. Gn. 12:3
9Jec'uri'la', conoje ri cacubi' quic'u'x ruc' ri Dios caquic'ul na ri utz cape ruc' Rire, jela' pacha' ri xuc'ul ri Abraham ruma xcubi' uc'u'x ruc'.
10Conoje ri quicubam quic'u'x quecolobetaj xa ruma caquitakej u'anic ri tzij pixab, ri' e c'o chi chuxe' ri k'atbal tzij re ri Dios, ma jewa' tz'ibitalic:
China c'u ri na cu'an ta janipa ri takanic
tz'ibital can chupa ri Tzij Pixab,
ri' c'o chi chuxe' ri k'atbal tzij re ri Dios Dt. 27:26
cacha'. 11Cak'alajin c'u ri', na jinta junok cu'an jusuc' che rib chwach ri Dios ruma cutakej ri Tzij Pixab, ma jewa' tz'ibitalic:
Ri e jusuc' chwach ri Dios,
c'o quic'aslemal ruma ri cubulibal quic'u'x ruc' Rire Hab. 2:4
cacha'.
12E junok cuch'ob rakan cacolobetaj ruma cutakej ronoje ri Tzij Pixab, ri' na cubul ta uc'u'x cacolobetaj ruma ri cubulibal uc'u'x ruc' ri Cristo. Yey jenewa' cubi'ij Ruch'a'tem ri Dios:
China ri ca'anaw re ronoje ri cubi'ij ri Tzij Pixab,#3:12 Xew ri Kanimajawal Jesucristo xch'ijow u'aniquil ronoje Rutzij Upixab ri Dios.
ri' c'o uc'aslemal chwach ri Dios ruma cu'an wa' Lv. 18:5
cacha'.
13Ri Cristo xojresaj chuxe' ri k'atbal tzij c'o pakawi' ruma xkapalajij Rutzij Upixab ri Dios; xu'an c'u wa' echiri' xuya rib pakac'axel ri oj aj mac, ma jewa' ri tz'ibital can pa Ruch'a'tem ri Dios:
Chwach ri Dios, itzel uwach junok catzayabax chwa juna che'.#3:13 Wa' e x'an ojertan echiri' cak'at tzij puwi juna aj mac, cacamisaxic y catzayabax chwa juna che'. Dt. 21:23
14E xu'an wa' ri Kanimajawal Jesucristo cha' ri rutzil uc'u'x ri Dios, ri xbi'tisix che ri Abraham, caya'taj na paquiwi ri na e ta aj Israel ruma ri Cristo; y jec'ula' ruma ri cubulibal kac'u'x, konoje cakac'ul ri Ruxlabixel ri Dios bi'tisim chi ulok.
15Hermanos, ri u'anom ri Dios canjunimaj ruc' ri caqui'an ri ticawex cha' camaj alak usuc': Echiri' queb achijab caqui'an juna tzij chiquiwach y caquijiquiba' uwach, lic na utz ta c'u ri' we jun chique cutzelej uch'a'tem che ri ubi'im chic o cucoj uwi' ri quijiquibam chic. 16Ec'u ri Dios xuya rubi'tisinic che ri Abraham y che can ri Jun ralc'o'al. Rutzij Upixab ri Dios na jetawa' cubi'ij «chique can rawalc'o'al», pacha' e uq'uiyal ticawex, ma jewa' cubi'ij «che can ri Jun awalc'o'al»; wa' que'elawi e ri Cristo.#Gn. 12:7 17Wa quintajin che ubi'xic e wa': Ri Dios xu'an jun tzij ruc' ri Abraham. Xic'ow na c'u cuatrocientos treinta junab c'a echiri' ri Moisés xutz'ibaj can ri takanic re ri Tzij Pixab. Ec'u wa takanic na utz taj cuyoj wa nabe tzij y na cuyoj tane ri xubi'tisij lo ri Dios. 18Ma we ta cakac'ul rubi'tisim ri Dios ruma cakatakej ri Tzij Pixab, ri' na e ta ruma ri bi'tisinic xu'an ri Dios; no'j ri xusipaj ri Dios che ri Abraham e ruma ri bi'tisinic u'anom chi che.
Ruchac ri Tzij Pixab tz'ibital can ruma ri Moisés
19¿Sa' c'u ruchac ri' ri Tzij Pixab tz'ibital can ruma ri Moisés? E cha' cuk'alajisaj chique ri ticawex sa' tak ri quimac chwach ri Dios. Y jela' u'anom lok c'a che ruc'unibal ri Jun Alc'o'al bi'tisim lok, wa' e ri Cristo; ma che Rire x'an wi wa' wa bi'tisinic. Ri Tzij Pixab xtzijox cuma ri ángeles che ri Moisés cha' rire cuk'atisaj chiquiwach ri tinamit; 20no'j ri Dios echiri' xu'an rubi'tisinic che ri Abraham, na jinta junok xk'atisan ri tzij chiquiwach, ma e Rire xuk'atisaj rutzij che ri Abraham y na xajawax ta c'u junok chic. 21E uwari'che, echiri' ri Dios xuya Rutzij Upixab che ri Moisés, ¿e nawi xujalc'atij ri bi'tisinic u'anom chi che ri Abraham? Na e taj. Ma we ta e ri', e ri Tzij Pixab caya'w ri kac'aslemal chwach ri Dios, y coju'an c'u jusuc' ri' ruma ri cakatakej ri tz'ibital canok. No'j na e ta u'anom ri'. 22Ma chupa ri Tzij Pixab tz'ibital canok, cak'alajinic konoje ri oj ticawex oj c'o puk'ab ri mac; e uwari'che lic cajawax ri bi'tisinic u'anom lo ri Dios chique ri cacubi' quic'u'x ruc' ri Kanimajawal Jesucristo.
23Echiri' c'amaja' cac'un ri Jun cacubi' kac'u'x ruc', e ri Tzij Pixab xojuchajij y xuc'am lo kawach cha' cacubi' kac'u'x ruc' ri Cristo echiri' copon ruk'ijol cak'alajisax ri Utzilaj Tzij chikawach. 24Ec'u que'elawi, ri Tzij Pixab tz'ibital can ruma ri Moisés xojuchajij y xuc'ut chike ri cajawaxic cakamajo, pacha' chi oj ac'alab; xuk'alajisaj c'u pan ruc'unibal ri Cristo cha' ruma ri cubulibal kac'u'x ruc' Rire, ri Dios cu'an jusuc' chike. 25Ec'u wo'ora cubul chi kac'u'x ruc' ri Cristo, jec'ula' na oj jinta chi chuxe' ri Tzij Pixab ri xuc'am lo kawach ojertan. 26Ma onoje ralak alak chi ralc'o'al ri Dios ruma ri cubulibal c'u'x alak ruc' ri Kanimajawal Jesucristo. 27Onoje c'u ralak ri xc'ul alak ri bautismo chupa rubi' ri Jesús, wo'ora alak chi re ri Cristo y cac'ut c'u alak wa' ruc' ri binic silabic alak. 28Xa jun 'anom alak chwach ri Dios, tob jujun che alak e cuq'uil raj judi'ab o na e ta cuq'uil, tob ne jujun che alak e aj chaquib elok'otalic#3:28 “E aj chaquib elok'otalic”: Quil “esclavo” pa vocabulario. yey jujun chic quechacun pa que rique, tob achi o ixok; ma onoje ralak, xa jun 'anom alak ruma alak c'o puk'ab ri Kanimajawal Jesucristo. 29Yey we alak re ri Cristo, ri' alak ralc'o'al ri Abraham yey cac'ul c'u alak ri sipanic ubi'tisim lo ri Dios.
Currently Selected:
Gálatas 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.