Gálatas 2
2
Ri e aj wach re riglesia caquita puwi ri chac cu'an ri Pablo chiquixo'l ri na e taj aj judi'ab
1Xic'ow na c'u cajlajuj junab echiri' xin'ec tanchi Jerusalem ruc' ri Bernabé, yey xinc'am bi ri Tito kuc'. 2Xin'ec c'ut, ma ri Dios xuk'alajisaj chwe chirajawaxic quinopon chila'. Xkamol c'u kib xew cuc' ri e aj wach re riglesia y xink'alajisaj chiquiwach ri Utzilaj Tzij cantzijoj chique ri na e ta aj judi'ab. E xin'an wa' cha' janipa ri nu'anom chic y tak ri quintajin che u'anic na casach ta uwach. 3Wachbi'il c'u ri Tito yey rire na e ta cuq'uil ri e aj judi'ab; na ruc' ta c'u ri', ri e aj wach re riglesia na xquitak tane che rire cucoj ri retalil re circuncisión.
4Xkamol c'u kib cuc' wa e aj wach, ma e c'o jujun na e ta sakil hermanos xquimin quib chikaxo'libal ri'oj cha' e caquic'ac'alej ri kabinic kasilabic ri oj re ri Cristo, ri Jun xojresaj lo chuxe' ri takanic que raj judi'ab. Xqui'an wa' xa re cacaj cojc'oji' paquik'ab rique. 5Pero ri'oj na xkatakej ta c'ana ri caquibi'ij cha' jela' na cajalc'ataj ta ri K'ijsak re ri Utzilaj Tzij cojom chi alak.
6E tak c'u raj wach re riglesia ri lic c'o quiwach, tob na jinta c'o cu'an chwe ri'in we ri petinak lok c'o quiwach o na jintaj ma chwach ri Dios xa jun kawach; rique na jinta juna c'ac' tzij xquicoj puwi ri nuc'utunic ri'in. 7Y na xew ta wa', ma xquimaj usuc' e ri Dios xya'w panuk'ab ri'in rutzijoxic ri Utzilaj Tzij chique ri na e ta aj judi'ab, jela' pacha' xya'i' che ri Pedro rutzijoxic wa' chique ri e aj judi'ab.#2:7-9 “Ri e aj judi'ab”: Pa ri ch'a'tem griego cubi'ij “ri e re ri circuncisión”. 8Ma ri Dios, ri xutak bi ri Pedro re cu'ana utako'n chiquixo'l ri e aj judi'ab, e xtakaw bi we'in re quinu'ana utako'n chiquixo'l ri na e ta aj judi'ab. 9Ec'u ri Jacobo, ri Pedro y ri Juan, ri lic c'o quiwach pa riglesia, xquimaj usuc' e ri Dios ya'yom wa jun chac chwe. Xquiya c'u ri' ri quik'ab chwe ri'in y che ri Bernabé, c'utubal re oj chi cachbi'il rique. Y xuc'ul quic'u'x cojchacun ri'in y ri Bernabé chiquixo'l ri na e ta aj judi'ab, yey rique e quechacun chiquixo'l ri e aj judi'ab. 10Xew c'u lic xquitz'onoj chike na quekamesc'utaj ta ri e niba'ib y wa' lic e cacha nuc'u'x che u'anic.
Ri Pablo cuch'a'bej upa ri Pedro
11Na ruc' ta c'u ri', echiri' ri Pedro xc'un pa ri tinamit Antioquía, ri'in e la' chiwachil lic co xinch'a'bej upa ruma ri na usuc' taj catajin che u'anic. 12Ma ri Pedro xaki cawa' cuc' ri hermanos na e ta aj judi'ab, no'j echiri' xec'un jujun e petinak Jerusalem pa riglesia pa c'o wi ri Jacobo, xresaj rib chiquij ri na e ta aj judi'ab y na xwa' ta chi cuc', ma cuxi'ij rib chiquiwach ri lic queboc il che ri retalil re circuncisión.#2:12 “Ri lic queboc il che ri retalil re circuncisión”: Wa' e jujun aj judi'ab quicojom chi rubi' ri Cristo pero caquibi'ij chirajawaxic chique ri na e ta aj judi'ab caquicoj ri retalil re circuncisión cha' quecolobetajic. 13Ec'u ri hermanos e aj judi'ab xqui'an que ruc' ri Pedro, yey ri Bernabé xpacha'b ne cuc' wa' wa xa queb quipalaj. 14Echiri' ri'in xinwilo na e ta caqui'an jela' pacha' ri cubi'ij ri sakil c'utunic re ri Utzilaj Tzij, jewa' ximbi'ij che ri Pedro chiquiwach conoje ri quimolom quib: «Rilal, lal cuq'uil raj judi'ab yey ca'an e la pacha' ri caqui'an ri hermanos na e ta aj judi'ab y na catakej ta chi la jujun che ri takanic que raj judi'ab. ¿Sa' c'u uchac ri' cabi'ij rilal chique ri na e ta aj judi'ab chirajawaxic caquitakej wa takanic que ri e aj judi'ab?»
Cojcolobetajic ruma ri cubulibal kac'u'x ruc' ri Cristo
15Ri oj aj judi'ab, chwi kalaxic lok, na oj ta aj palajiy tzij pacha' ri jujun chic tinamit na jinta Rutzij Upixab ri Dios cuc'. 16Na ruc' ta c'u ri', keta'am na jinta junok cu'an jusuc' che rib ruma cutakej ri takanic que raj judi'ab; ma ri lic chirajawaxic wi e ri cubulibal c'u'xaj ruc' ri Kanimajawal Jesucristo. E uwari'che ri'oj xkacoj rubi' cha' jela' Rire cu'an jusuc' chike xew ruma ri cubulibal kac'u'x ruc' y na ruma ta ri cakatakej juna tzij pixab. Ma na jinta junok cu'an jusuc' che rib ruma cutakej ri takanic que raj judi'ab. 17Ec'u ri'oj lic cakaj coju'an jusuc' chwach ri Dios xew ruma ri cubulibal kac'u'x ruc' ri Cristo; yey we chiquiwach c'u jujun chic, oj aj mac ruma na cakatakej ta chi ri quitakanic rique, ¿e nawi que'elok coju'ana aj mac ruma ri cubulibal kac'u'x ruc' ri Cristo? ¡Na e ta ri'! 18Ma we canc'osoj tanchi lo uwach ri nuc'akom chubi, ri' e que'elok in jun aj palajiy tzij. 19Ri'in xinya wib che u'anic ronoje ri takanic que raj judi'ab cha' jela' can'an jusuc' che wib, pero xinmaj usuc' na ruma ta wa' cu'an jusuc' junok chwach ri Dios; ec'u wo'ora nuya'om wib che ulok'nimaxic ri Dios ruc' ronoje ri nuc'aslem.
20Jec'ula', ri nuc'aslemal na we'in ta chic, ma e re ri Kanimajawal Jesucristo. E pacha' xincam chwa ri cruz junam ruc' ri Cristo. Wo'ora che ri nuc'aslem, ronoje ri can'ano e ruma ri cubulibal nuc'u'x ruc' Ruc'ajol ri Dios, ri lic c'ax xinuna'o y xuya rib pa camic wuma ri'in. 21Na cuaj ta c'ut canc'ak bi uk'ij ri unimal rutzil uc'u'x ri Dios; ma we ta c'o junok curiko cu'an jusuc' che rib chwach ri Dios ruma utakem ri tzij pixab, ri' na jinta cutikoj rucamic ri Cristo.
Currently Selected:
Gálatas 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.