2 Corintios 1
1
Ri Pablo cuya pan rutzil quiwach ri hermanos e c'o pa ri tinamit Corinto
1Ri'in in Pablo in tako'n re ri Kanimajawal Jesucristo ma e ri Dios ya'yom wa chac chwe. Ri'in junam ruc' ri hermano Timoteo cakaya pan rutzil wach alak, ri alak utinamit ri Dios re riglesia c'o Corinto, y chique conoje ri hermanos ejekel chupa ronoje tak ri luwar re Acaya.#1:1 Corinto e jun tinamit c'o pa ri luwar re Acaya. 2C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo.
Ri bochibal kac'u'x cuya ri Dios
3¡Lic nim uk'ij ri Dios, Rukaw ri Kanimajawal Jesucristo! Ma e Rire ri lic cuc'ut ri c'axna'bal uc'u'x chike y ruc' Rire cape wi ri bochibal kac'u'x. 4Rire e cabochi'in kac'u'x chwach ronoje c'axc'obic, cha' jela' ri'oj utz cakabochi'ij quic'u'x ri e c'o chupa ronoje c'axc'obic. Cakaya c'u ri bochibal c'u'xaj jela' pacha' ri uya'om ri Dios chike ri'oj. 5Ma echiri' canimar ri c'axc'obic pakawi' ruma oj re ri Cristo, e lic canimar ri bochibal c'u'xaj cuya ri Cristo chike. 6Echiri' ri'oj cakatij c'ax yey ri Dios cubochi'ij kac'u'x, wa' cuc'am lo bochibal c'u'xaj y colobetajic re ri Dios che ralak. Jec'ula' ri c'ax katijom y ri bochibal c'u'xaj kac'ulum ri'oj, lic c'o cutikoj che alak cha' jela' cach'ij alak uchuk'ab ri c'axc'obic pacha' ri kic'owibem ri'oj. 7Lic kajiquibam c'u uwach ri cubulibal kac'u'x uc' alak. Ma keta'am alak jun kuc' ri'oj chupa ri c'axc'obic, jec'ula' alak jun kuc' ri'oj che uc'ulic ri bochibal c'u'xaj cuya lo ri Dios.
8Cakaj c'ut, hermanos, queta'maj alak janipa chi c'axc'obic xkic'owibej chila' Asia. Ruma wa unimal c'axc'obic xpe pakawi', xkana'o na jinta chi kachuk'ab che uch'ijic wa' y xkach'ob nenare' na jinta chi pa sak cojc'asi'ic. 9E xkana' ri'oj e pacha' k'atom chi tzij re camic pakawi'. Pero c'o xutikoj chike ri xkic'owibej, ma ruc' wa' xkamajo na jinta uchac ri cacubi' kac'u'x chikibil kib; xew e cubul kac'u'x ruc' ri Dios, ri quebuc'astajisaj lo ri ecaminak. 10Ri Dios e xojesan chwa wa camic yey c'a catajin ne che kato'ic. Cubul c'u kac'u'x ruc', ma keta'am ruc' ruto'bal Rire cojel pan chi utz wo'ora y chikawach apanok. 11Y ralak cojto' ne alak echiri' ca'an alak orar pakawi' chwach ri Dios. Jec'ula' we e q'ui ri xebanaw re wa', e q'ui ri' ri quetioxin chwach ri Dios ruma ri cu'an Rire kuma ri'oj.
Ri Pablo cuk'alajisaj su'be na xic'ow ta Corinto
12C'o ri cuya qui'cotemal chike; wa' e ri kabinic kasilabic kac'utum chiwach ralak y chiquiwach conoje ri winak, ma cakana' chikac'u'x lic sakil y jusuc' ri kabinic jela' pacha' ri caraj ri Dios. Yey wa ka'anom na e ta ruma unimal na'oj re ruwachulew; e ruma ruto'bal ri Dios kuc'. 13Janipa ri cajilaj alak che ri kacartas, lic e kana'oj ri' che alak cha' jela' camaj alak usuc'. 14Wo'ora majom alak usuc' jubik' puwi ri ka'anom; koye'em c'u ri k'ij echiri' camaj alak usuc' ronoje, cha' jela' pa ruc'unibal ri Kanimajawal Jesucristo lic caqui'cot alak chike ri'oj, jela' pacha' ri'oj cojqui'cot che ralak.
15Ruc' c'u wa cubulibal nuc'u'x uc' alak, xuaj quinic'ow nabe uc' alak cha' jela' calaj cac'ul alak ri relej nuc'u'x, 16ma xinch'obo quinic'ow uc' alak echiri' quin'ec Macedonia y quinic'ow tanchic echiri' canmaj bi nube Judea y jela' quinto' bi alak che ri nubenam. 17Jela' ri xinch'obo can'ano, tob na e ta xu'ana'. Ruma c'u la', laj chiwach ralak na xinch'ob ta chi utz sa' ri can'ano. ¿Xa nawi pa we ri'in canch'ob rakan ri can'ano? ¿O xa nawi queb uwa ri nuch'a'tem, pacha' junok cubi'ij: «Lic jiquil uwach quin'ec,» tob reta'am chiribil rib na que'ec taj? 18No'j ri'in na je ta la' can'ano. Ma ruma lic jusuc' ri Dios kuc', na utz ta c'u ri' we ri kach'a'tem queb uwach que'elawi chiwach alak. 19Jec'ula' ri Kanimajawal Jesucristo, Ruc'ajol ri Dios, ri xojtzijon puwi' che alak junam cuc' ri Silvano y ri Timoteo, ruch'a'tem Rire na queb ta uwach que'elawi; ma ronoje ri cubi'ij lic katzij. 20Yey ruma Rire e cu'ana janipa tak rubi'tisinic ri Dios kuc'. E uwari'che cakayac uk'ij ri Dios, cakabi'ij «Are'» y «Amén» che ronoje ri ubi'im lo chike. 21Yey e ri Dios ri cujiquiba' kac'u'x chi utz ruc' ri Cristo junam uc' alak y xojucha'o cha' coju'an re Rire. 22Ec'u Rire uya'om ri Ruxlabixel pa kanima', c'utubal re oj c'o chi puk'ab yey cu'ana na c'u ronoje ri ubi'tisim lo chike.
23Lic caril ri Dios ri c'o pa wanima' y reta'am c'ut su'be na xinic'ow ta chila' Corinto pacha' ri xinch'obo. E ma na xuaj taj coc bis chic'u'x alak ruma canch'a'bej pa alak.#1:23 Ri Pablo xuto c'o jun hermano chila' Corinto xmacunic y ri nic'aj hermanos na xeboc ta il che wa mac. Quil 1 Corintios 5:1. E uwari'che na xraj taj copon cuc' we c'amaja' caquiyijba' wa'. Ec'u ri xu'ano, e xtz'iban pan chique cha' caquiyijba' wa' y jela' rire utz copon cuc' ruc' utzil chomal. 24Na e ta c'u coje'takana pawi' alak chwi ri cojom alak; ma ruma ri cubulibal c'u'x alak, tiquil alak chi utz. Ri caka'ano e cojchacun uc' alak cha' cac'oji' ri qui'cotemal pa anima' alak.
Currently Selected:
2 Corintios 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.