1 Timoteo 3
3
Pixabanic puwi ri quibinic quisilabic raj c'amal quiwach rutinamit ri Dios
1Lic usuc' wa cambi'ij: We c'o junok lic caraj cu'an aj c'amal quiwach rutinamit ri Dios, ri' lic chomilaj chac ri curayij. 2Pero lic chirajawaxic che juna aj c'amal quiwach rutinamit ri Dios e jusuc' rubinic usilabic cha' na jinta c'o cach'a'tiben re. E c'ola jusuc' ruc' ri rixokil, lic chuch'obo chi utz ri cu'ano, chuchajij rib chiribil rib cha' na catzak ta pa mac y chom quilitaj rubinic cuma ri jujun chic. Xaki chebuc'ulu chi utz tak ri quebopon chirocho, y c'ola una'oj che uc'utic Rutzij Upixab ri Dios. 3Lic chirajawaxic che na k'aba'rel taj, na aj ch'a'oj taj, na rayinel ta re puak cach'ac ruc' socoso'nic, na que'ec ta uc'u'x ruc' ri puak; ma ri chirajawaxic wi e lic utz uc'u'x y ch'u'ch'uj uc'u'x. 4Chu'ana ri sakil takanic pa rocho; chuc'utu c'u chique ri ralc'o'al cha' quebu'an e cojol tzij y jec'ula' quec'oji' chi jusuc'. 5Ma e ri na curik ta cu'an sakil takanic pa rocho, ¿su'anic c'u ri' quebuchajij chi utz rutinamit ri Dios?
6Na utz taj we c'o junok c'ac' ucojom ri Utzilaj Tzij yey cacojic aj wach chupa riglesia, ma c'axtaj cu'an nim che rib y cak'at c'u tzij puwi' jela' pacha' ri xuc'ulumaj ritzel winak ruma xu'an nim che rib.#Is. 14:12-14 7Ri lic chirajawaxic wi e chom rubinic usilabic chiquiwach tak ri na quicojom ta rubi' ri Kanimajawal Jesucristo, cha' na jinta junok cac'akaw bi uk'ij y na catzak ta chupa juna pajtajibal re ritzel winak.
Pixabanic puwi ri quibinic quisilabic raj chaquib e to'bel piglesia
8Jec'ula' raj chaquib e to'bel piglesia lic chirajawaxic chique e jusuc' ri quibinic quisilabic, na xa ta queb quipalaj, na e ta k'aba'relab, na e ta rayinel re puak cach'ac ruc' socoso'nic. 9Chirajawaxic caquitakej ri sakil c'utunic uk'alajisam ri Dios yey caquina' pa canima' utz qui'anom chwach Rire. 10Nabe na chirajawaxic cac'am quipa cha' cak'alajinic we lic jusuc' ri quibinic quisilabic; tec'uchiri' utz quebu'an aj chaquib e to'bel piglesia.
11Jec'ula', chirajawaxic chique rixokib e jusuc' ri quibinic quisilabic, na e ta aj molot, lic caquich'ob chi utz ri caqui'ano y caqui'an chi utz ronoje ri takal chique.
12Ec'u rachi aj chac to'bel piglesia, lic chirajawaxic c'ola jusuc' ruc' ri rixokil y chu'ana sakil takanic paquiwi tak ri ralc'o'al y paquiwi conoje tak ri e c'o pa ri rocho. 13We cu'an c'u chi utz ruchac, catac'abax uk'ij chiquiwach ri ticawex y canimar uc'u'x che uk'alajisaxic ri cubulibal uc'u'x ruc' ri Kanimajawal Jesucristo.
Ruc'u'xibal ri Utzilaj Tzij puwi ri Kanimajawal Jesucristo
14Ri'in lic nucubam pan nuc'u'x qui'nwila tan awach Timoteo, pero cantz'ibaj na pan wa' chawe 15cha' we xinmayin che awilic, chaweta'maj sa' ri sakil binic silabic chirajawaxic chique ri e re ri Dios; ma rique e utinamit ri Dios c'aslic yey rutinamit e chapayom re y e catiquiban re ri K'ijsak. 16Pakatzij wi lic nim uk'ij ri K'ijsak re ri Dios k'alajisam chikawach:
E ri Kanimajawal Jesucristo xu'an ticawex
echiri' xc'un che ruwachulew.
Ronoje ri xu'ano y ri xubi'ij e lic jusuc'
y ri Ruxlabixel ri Dios e xk'alajisan re wa'.#Ro. 1:4
Xilitaj cuma ri ángeles.
Xtzijox rubi' chique ruq'uiyal quiwach tak ri ticawex che ruwachulew
y e q'ui ri xquicoj rubi'.
Yey xc'ul tanchi chila' chicaj ruc' yacbal uk'ij.
Currently Selected:
1 Timoteo 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.