Hebreos 1
1
Theꞌña Yompor Poechemerpaꞌ ña eꞌñe yeꞌñoranaꞌterraya ñeñth ateth oteñ Pompor yokop
1Eꞌñe awathotheñ Yomporñapaꞌ xhokma eñoranaꞌtyesaneꞌth ñeñth poeyochreshaꞌ peꞌth ñeñthchaꞌ aꞌmhtaꞌyesayeꞌth poꞌñoñ ñeñthara profetaneshaꞌ. Eꞌñe paꞌnamenoth eñotatyesaneteꞌth. Ñetñapaꞌ oꞌch eñotatennayet yatañneshañ judioneshaꞌ ñeñth ateth otenanet Yompor. 2Tharraña theꞌña yapaꞌ eꞌñe ña Poechemer oꞌ eñoranaꞌterrya ñeñth ateth eñoreññaña Yompor yokop. Ñewa, ñeñthpaꞌ ñeñthara Poechemer ñeñth Jesucristotets ñeñth neꞌth Pompor awathotheñ, ñach oꞌpatenaya allowen ñeñth ora allpon eñall, tharroꞌmar ña yexhkatapreteꞌ awath Pompor añ patser ñamha allowen ñeñth esokmañen paꞌnamen eñalletyestsa. 3Ñeñthara Cristo attho atarr kowentena ña paꞌtsnomoeñoth, ñeñthpaꞌ Pomporña orrtaten poꞌpartsoña. Ñeñth ateth kowen orrtatyen ñapaꞌ, Pomporpaꞌxhoꞌña eꞌñe parro atthekmoet. Ñapaꞌ eꞌñe poꞌñoñotha orrtatwan ora esokmañen ñeñth allpon paꞌnamen eñall tharroꞌmar ña poꞌñoñpaꞌ atarr womenk. Ñeñthara ñeñth rromats atthoch eꞌñe eꞌshampeswerrey yoꞌchñar. Allempoña oꞌ orrtatwan attho eꞌshamperrey yoꞌchñar allempoñapaꞌ oꞌ alla anorrwerr Pompor Parets poꞌkowenroth allña atarr partsotapretwerrana Pompor poꞌkonaño eꞌñe all poeꞌntaño.
Ñeñth Yompor Poechemerpaꞌ ña metanaꞌtweneꞌ allowen mellañotheñnaneshaꞌ attho atarr sherben ña
4Ñeñthoꞌmarña theꞌña ñapaꞌ atarr amhchaꞌtarethtena, ello metanaꞌtwenan allowen mellañotheñnaneshaꞌ, tharroꞌmar ñapaꞌ ñeñth otenet ñapaꞌ eꞌñe Parets Poechemer. Ñeñthña mellañotheñnaneshaꞌ ñetpaꞌ ama attheyeꞌ otarethteneto. 5Ñamha yeñoteñ ñapaꞌ ña eꞌñe metanaꞌtwenawet tharroꞌmar mellañotheñnaneshaꞌ amaꞌt poesheñarrothetapaꞌ ama otaneto ñeñth ateth otan Poechemer, ñeñthpaꞌ ateth ot Poechemerekop:
Phapaꞌ pha ñeñtheph eꞌñe Nechemereph, theꞌñapaꞌ oꞌch eꞌñe neñotach acheñeneshaꞌ poꞌñoxh phapaꞌ eꞌñe Nechemer nepeneph.
Poꞌpocheñoñapaꞌ ateth oterrerr Poechemerekop:
Napaꞌ na ñeñthen Pomporen, ñapaꞌ no Nechemer.
6Poꞌpocheñoña allempo xhapatan Poechemer poꞌmother ñeñth atarr nanak sherbets añe patsro ateth eñora ñokop, ñeñthpaꞌ ateth ot:
Theꞌpaꞌ konkorpanaꞌteñepaꞌch allowen nemhllañotheñnaneshar.
7Poꞌmhllañotheñnaneshar ñetpaꞌ añekpa anarethtenet ñetchaꞌ sherbenet Yompor. Ñeñthoꞌmarña ateth eñorena ñokpoet:
Ñerraꞌm erra nemñayenanet eꞌñech pomaꞌyorñekma erra senet eꞌñe ateth penet ñerraꞌm mhorr. Atarr kowen sherbennet ateth ñerraꞌmrratheꞌ tsoꞌ ñeñth atarr kowen woretyets.
8Tharraña Poechemerekoppaꞌ ama attheyeꞌ oteno. Ñokoppaꞌ ateth eñora:
Phapaꞌ atarr Partsoph, ñeñthephchaꞌ xhokma amhchaꞌtarethtetsa pekonaño ñeñth errponañowen. Ñamha ñeñth attho phaꞌmhchaꞌtarethtena phapaꞌ eꞌñe pokteꞌ es pephaꞌyenanet.
9Ñamha ñeñth eꞌñe pokteꞌ nenten napaꞌ ñeñthña atarr phokshateneꞌ. Ñamha ñeñth ama pokteyeꞌ nenteno napaꞌ, phapaꞌxhoꞌña ñeñth atarr petsenaꞌten. Ñeñthoꞌmar napaꞌ ñeñthen Peyomporer pepenen, awoꞌt atarr nanak nokshaterreph. Attho atarr phokshena phapaꞌ ello pemhtanaꞌtweñ allowen poꞌpotantañ ñeñth nesherbhaꞌyeneꞌ ñamet.
10Yomporpaꞌ alla eñorerrerr Poechemerekop, ñeñthpaꞌ ateth otererr:
Partseshachaꞌ, pha yexhkatweꞌ awath pats, eꞌñe echarr phorratwe. Enetpaꞌxhoꞌña eꞌñe pewamenkothekma peyexhkatwe.
11Ñeñth eꞌñe peyexhkatwapaꞌ ñeñthpaꞌ wañerrchaꞌ eꞌñech chenkaꞌwerra esempo, tharraña phapaꞌ ama arromñatheshayaype amaꞌt eꞌñe errponaña. Allowen ñeñth peyexhkatwa ñeñthpaꞌ eꞌñech mellashaꞌtwa eꞌñech ateth pena ñerraꞌmrratheꞌ shetamoets ñeñth atarr amhllashaꞌtña.
12Atethchaꞌ peperr peyexhkatar ateth ñerraꞌmrratheꞌ shetamtsosheꞌm ñeñth oꞌ mellashaꞌt. Oꞌch aꞌmetatseꞌchet oꞌch waporeꞌchet allempo chorrenet poꞌpoñ ñeñth atarr kowen emarr. Tharraña phapaꞌ attheraphach errponañowen. Attho phokrrena phapaꞌ amaꞌt awathapaꞌ amach awañañathterro.
13Poꞌpocheño Yomporpaꞌ alla oterranerr Poechemer, ñeñthpaꞌ ateth och:
Theꞌpaꞌ oꞌch alla phanorrwerr arr nekowenroth allchaꞌ pepartsotapretwerrna. Esempowañenchaꞌ allowen ñeñth peꞌmoñeꞌteneꞌ oꞌch eꞌñe naꞌmchechwerranet atthochña pomnaren pephowerranet.
Tharraña mellañotheñnaneshaꞌñapaꞌ ama attheyeꞌ oche ñeñth ateth otan Poechemer. (Ñeñthoꞌmar yeñoteñ Yompor Poechemer ña atarr sherbets, ello metanaꞌtwenan allowen mellañotheñnaneshaꞌ.) 14Yeñoteñ allowen mellañotheñnaneshaꞌpaꞌ añekpa allsensarethtenet ateth ñerraꞌm Yompor Poekamkëñ, ñetchaꞌ sherbenet Yompor. Atthochña ñetchaꞌ yenpoenet allowen ñeñthchaꞌ aꞌkeshphatarethterrtsa.
Currently Selected:
Hebreos 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.