Hebreos 2
2
Amach attha es yepxhatsto eshekchaꞌ yaꞌkeshphatarethterra
1Theꞌpaꞌ attho oꞌ yeñoterrñañ Yompor Poechemer attho atarr nanak partsoten ñeñthoꞌmarepaꞌchña theꞌpaꞌ elloch yemaꞌyoxhrerra oꞌch yeꞌmhñoter eꞌñe poktakma ñeñth attho oꞌ yeꞌmoerrñañ poꞌñoñ. Yeꞌmhñoterrepaꞌchña eꞌñe kowen theꞌt akophotheñpaꞌ ñatoꞌrraña oꞌtheꞌ alla yepserrñañ ñeñth ateth oꞌ yexhaterrey Yompor Poechemer. 2Tharroꞌmar yeñoteñ Yomporpaꞌ ama poenesho poꞌñoñ ñeñth attho eñoranaꞌtanet awath. Tharroꞌmar allempo ñeñth ama eꞌmhñotaye ñeñth attha athpareꞌteꞌpaꞌ eꞌñe tsaꞌtatwaneteꞌth allowen ñeñth allpon eꞌñe pokteꞌ ent ña. Amaꞌt añ ñoñets ñeñth orrtat poꞌmhllañotheñreneshaꞌ xhokma tsaꞌtataneteꞌth ñerraꞌm esempo athpareꞌtenet ñeñth ñoñets. 3Ñeñthoꞌmarña yapaꞌ yeñoteñ ñerraꞌm ama yeꞌmhñoterrñañe eꞌñe ña Poechemer, yañapaꞌ errothenothwachñakaꞌyeña yekeshperratheꞌña ñerraꞌm attha ama es yepxheno; eꞌñe attha eñalleñkaꞌyeña atthoch yaꞌkeshphatarethterrañ eꞌñe kowen. Ñewa, ñenmathpaꞌ Yepartseshar Jesúsña serrpareꞌtatawet atthoch yaꞌkeshphatarethterra. Allempoña ñeñth eꞌmoeneꞌ ateth otanet Yepartseshar Jesús, ñetñapaꞌ oꞌ serrpareꞌtatyet yamha atthoch yeñoch ñeñth eꞌñe poꞌnoxh ña aꞌkeshphatañtetsa. 4Ñamha Pomporñapaꞌ ñaña yeñotateꞌ Poechemer poꞌñoñ ñeñth ateth oteneypaꞌ eꞌñe poꞌñoxh. Ñapaꞌ orrtatyesanet poꞌpartsoña ñamha poꞌwamenk ñeñth acheñeneshaꞌpaꞌ ama poentareto. Ñamha ña Poekamkëñothpaꞌ oꞌ apaꞌyesey eꞌñe poesheñaꞌttsoy errothenchaꞌ moenatey ña ñeñthchaꞌ ateth yethorraꞌyesa ñokop.
Attho Jesucristopaꞌ eꞌñe poktakma acheñetos arr patsro atthoña eꞌñe paꞌmoꞌnasheñ phowerrey
5Theꞌpaꞌ oꞌch noterrserr poꞌpoñoneth añ patser ñeñthchaꞌ werrtsa tsapathoneth. Ñeñthpaꞌ ama mellañotheñneshayeꞌ noña Yompor ñeñthchaꞌ pomnaren perreꞌ. Ñapaꞌ aña naꞌ acheñ ñeñthpaꞌ arromñatheneshaꞌ. 6Tharroꞌmar ateth anareth Yompor poꞌñoñ awathotheñ allempo poesheñarrpaꞌ ateth otan Yompor:
Amaꞌt acheñaya amaꞌt mamesha ama esoyayye, tharraña pha Nomporepaꞌ atarrepaꞌt peyerpoenya. Amaꞌt ya ñeñthey arromñathenaꞌtaraya tharraña pha Nomporepaꞌ atarrepaꞌt pemoerenya.
7Ñeñth arromñatheneshaꞌpaꞌ ama tama awamenkatheyayeto ateth atarr sherben mellañotheñnaneshaꞌ. Tharraña ñeñthpaꞌ mamekpa ateth pemnach. Tharraña amaꞌt attheñpaꞌ elloña oꞌch alla pekowentater ateth ñerraꞌmrratheꞌ esempo oꞌch net ñeñthchaꞌ amhchaꞌtarethterrtsa, allempopaꞌ oꞌch nachet poꞌchoyoꞌmh ñeñth atarr kowen.
8Ñeñthpaꞌ tharroꞌmarña ateth peneꞌ arromñathenaꞌtar allochñapaꞌ atthoch eꞌñe pomnaren penan allowen ñeñth allpon es peyexhkatwa. Arrpaꞌ allowa ateth oten ñoñets ñeñth awathotheñ anareth.
Ñewa, ñeñth ñoñets all oten arromñathenaꞌtar ñeñthchaꞌ eꞌñe pomnaren perreꞌ allowen, ñeñthpaꞌ añkaꞌyeña oteney allowenakop ñeñth errapharen eñall; amach eñalleña amaꞌt eꞌñe pathrra ñeñthchaꞌ ama pomnaren perreto. Tharraña amaꞌt ateth oteneñ ñeñthpaꞌ amaña yenteraꞌ allempoch pomnaren es perr arromñathenaꞌtar, tharroꞌmar ama xherraꞌ allempoch etsoterra ñeñthekop anareth. 9Tharraña eꞌñe yeñoteñ poesheñarr ñeñth arromñathekoptartostsa ñeñth ateth phostsa ñeñthkaꞌyeña Jesús. Allempo acheñetos arr patsro Pomporña moenateꞌ amach tama awamenkathtoso ateth atarr awamenkathtena mellañotheñnaneshaꞌ. Tharraña ñeñthpaꞌ mamekpa ateth moenach atthoch eꞌñe arromñathekoptartosa arr patsro. Ñeñthpaꞌ añekopña ateth pha atthoch moeroxhtosa oꞌch rromos allowenakpay ñeñthey arromñatheneshaꞌ. Yompor eꞌñe poemoereñothey ya atthoña moenatan Poechemer oꞌch rroma yokop. Ñeñthoꞌmarña Pomporpaꞌ oꞌ alla atarr kowentaterran Poechemer allempo oꞌ alla ner ñeñthchaꞌ atarr amhchaꞌtarethterrtsa.
10Ñewa, Yomporpaꞌ yexhkatan allowen ñeñth eñalletyetsa. Ñamha allowenpaꞌ tharroꞌmar yexhkatwe atthoch kowentateññañet ña. Ñamha ñapaꞌ añ moenen shonteꞌ ñeñthchaꞌ eꞌñe poechemereshaꞌ perr ñeñthchaꞌ kowentapreterraya ña. Yomporpaꞌ eꞌñe pokteꞌ enteñ oꞌch moenatan Poechemer atthoch moeroxhtateñ acheñeneshaꞌ. Atthochña eꞌñe etsotatoñ Poechemer eshekchaꞌ aꞌkeshphaterran allowen ñeñthchaꞌ poechemereshaꞌ perr, atthochña eꞌñe awanerranet allchaꞌ kowentapreterrñañet Pompor. 11Ñewa, Poechemer ñeñth Jesús, ñapaꞌ aꞌkowentatan acheñeneshaꞌ Partsokop, atthoña eꞌñe eꞌshampeswanet poꞌchñar. Theꞌña ñeñthey aꞌkowentatwarethey ñamha ñeñth yaꞌkowentaterreꞌ ñeñthpaꞌ ñeñthña eꞌñe ñeñthenaꞌtarekmay tharroꞌmar ñeñthara Yompor yepen ñeñth Pompor pen ña. Ñeñthoꞌmarña Jesúspaꞌ ama poepenkñotheyeꞌ paꞌmoꞌnasheñ penye. 12Yeñoteñ ama penkënyo tharroꞌmar Yompor poꞌñoñ ñeñth anareth awathotheñ ñeñthpaꞌ ateth oten ñerraꞌmrratheꞌ Poechemer otets:
Napaꞌ neserrpareꞌtachchaꞌ nemoꞌnasheñneshaꞌ ateth eꞌñe kowenareꞌ es pephaꞌyen pha. Eꞌñe naxhoteñotheph phapaꞌ xhokmach naꞌyeꞌchoxhtatonaph all apxhena allowen masheñneshaxhno.
13Yompor poꞌñoñ ñeñth akellkarethpaꞌ ateth oterrerr ñerraꞌmrratheꞌ Cristo oꞌ alla oterrerr:
Napaꞌxhoꞌña neyemteña Yompor.
Ñamha ateth oterrerr Cristo:
Theꞌ arroꞌtsenen epan Nompor poechemereshaꞌ ñeñth kowamphsatenen ña.
14Ñewa, allowen ñeñth eꞌñe paꞌmoꞌnasheñekmoet phannetsa, ñetpaꞌ eꞌñe ñeñthenaꞌtarekmoet. Ñeñthoꞌmarña Jesúspaꞌ eꞌñe acheñetos atthoch paꞌmoꞌnasheñ phosey. Eꞌñe arromñathenaꞌtartosa eꞌñe ateth ñerraꞌmrratheꞌ ya. Ñapaꞌ tharroꞌmarña ateth phosa allochñapaꞌ atthoch rromos. Tharroꞌmar allempo rromapaꞌ atthoña poerratampeswan oneñeth poꞌwamenk attho atarr amhchaꞌnoxhtanaꞌteney allempo yerromoen. 15Ñeñthpaꞌ Jesúsña aꞌwañatampeswoseꞌ ñeñth amaꞌt cheshotheñ xhokmach yemhchaꞌten attho yerromoen, ñeñthpaꞌ atarr amhchaꞌnoxhen yenteñ. 16Ñewa, yeñoteñ ama mellañotheñnaneshayeꞌ llekënoña Jesús ñeñthchaꞌ yenpos arr patsro. Yaña llekosa ñeñthey arromñatheneshay ñeñthey eꞌñe poꞌñoxh poꞌmhrenñey pen Abraham; ñeñthoꞌmarña ñapaꞌ moeneñ oꞌch yenposey. 17Ñeñthoꞌmarña ñokoppaꞌ eꞌñe poktoña oꞌch acheñetos, oꞌch eꞌñe atthetos ñerraꞌm ya ñeñthey paꞌmoꞌnasheñneshaꞌ pen. Allochñapaꞌ eꞌñe poellkapreteñothey ya ñeñthey eꞌñe pamoꞌts penpaꞌ eꞌñech kowen aꞌpoktaterrey Partsesho. Atthoña ñapaꞌ xhokma eꞌñe kowen sherbenan Pompor ateth ñerraꞌmrratheꞌ ñeñth korneshatyets Partsokop. Ñapaꞌ eꞌñe poꞌñoxh Paꞌmhchaꞌtarether peñ allowen ñeñth kornaneshatyets Partsokop. Ñeñthoꞌmarña ñapaꞌ eꞌñe ña tsaꞌtwerraya alloweney acheñeneshay yoꞌchñar allempo ashatarethta eꞌñe ña poꞌrras. Atthoña eꞌñe aꞌpoktaterrnay yoꞌchñar Yomporesho. 18Ñapaꞌ atarr moeroxhtosa allempo wapoñeꞌth topateñets; ñeñthpaꞌ atthoch aꞌypoꞌñereñ Pompor. Ñeñthoꞌmarña theꞌpaꞌ eꞌñe poellkapreteñothey ya ñapaꞌ eꞌñe eñoteñ oꞌch yenpaꞌy atthoch awamenkath phonay yeyoxher allochñapaꞌ amach alla aꞌpoerrataterrye topateñets ñeñthchaꞌ allpon yewapoya yamha.
Currently Selected:
Hebreos 2: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.