Romanos 16
16
Attho Pablo arr poꞌcartothpaꞌ eꞌñe womhchaꞌtwan ora allowen ñeñth ameꞌñenaya Cristo all anetso Romo
1Ñamha theꞌpaꞌ añ necartothpaꞌ nemneñ oꞌch neñotatas ñeñth yoxh yepen ya arr ñeñthpaꞌ añ paꞌsoꞌcheñ Febe. Ñapaꞌ ña sherbets Yompor paꞌpakllo allekma apxhenet Yomporekop añ anetso Cencreo. 2Ñapaꞌ moeneñ awoꞌch awoꞌ sesho. Ñerraꞌm esempo xhap seshopaꞌ oꞌch sagaph kowen, ñeñth ateth poktetsa oꞌch yagapannena eꞌñe kowen, ñeñthey ameꞌñenaya Yepartseshar Cristo. Ñamha ñerraꞌm oꞌch xhap sesho, ñerraꞌm eschaꞌ palltosa amaꞌt erraꞌtsena, añ poktetsa sapaꞌ oꞌch seyenpoeñ tharroꞌmar ñapaꞌ atarr kowen ayenpañ; amaꞌt napaꞌ nanak yenpoenen.
3Napaꞌ nemneñ añ necartoth oꞌch newomhchaꞌch noxh Priscila poerrollareꞌna ñeñthara masheñ Aquila, ñeñth parro nethorrena awañmoꞌcha Cristo Jesúsokop. 4Ñetpaꞌ nanak yenpoennet awañmoꞌcha allempo moeneꞌ moetsanetañ. Ñetñapaꞌ awtsa rromatsetañ atthoth aꞌkeshphatnet na allempo moeneꞌ moetsaneñ ñeñth neꞌmoñeꞌteneꞌ. Ñeñthoꞌmarña napaꞌ atarr neparasyosoꞌtenanet ñamha ama napthayaya añña ñamha ñeñth allowen ñeñth ama judioneshayaye, ñeñth eꞌñe pameꞌñeñothet apxhaꞌyenet allemeñ anetsoꞌmar, ñetpaꞌxhoꞌña atarr parasyosoꞌteñet noxh Priscila ñamha masheñ Aquila, tharroꞌmar ñetpaꞌ awoꞌt aꞌkeshphatnet, atthoth ellopaꞌ oꞌ alla neserrpareꞌtatererr ñeñth ama judioneshayaye. 5Ñamha theꞌpaꞌ oꞌch newomhchaꞌch allowen masheñneshaꞌ ñeñth pameꞌñeñothet xhokma apxhenet masheñ Aquila paꞌpakllo, all yexhena epoet poethapor Priscila. Ñamha arr necartothpaꞌ nemneñ oꞌch newomhchaꞌch masheñ Epeneto ñeñth nanak nemorrentena. Ñapaꞌ ña ñanom ameꞌñenaya Cristo all anetso Acayo. 6Allothpaꞌ oꞌch newomhchaꞌch ñamha noxh María ñeñth nanak thorretsa sesho parro. 7Theꞌñapaꞌ oꞌch newomhchaꞌch ñamha namoꞌts ñeñthara masheñ Andrónico ñamha masheñ Junias, tharroꞌmar ñet awañmoꞌchapaꞌ ñeñth parro ewankarethey. Ñetpaꞌ amaꞌt allsensarethneshaꞌpaꞌ nanak asherben entarethtet, tharroꞌmar ñetpaꞌ awathotheñ ameꞌñeret Cristo. Amaꞌt allempo napaꞌ ama nameꞌñenaꞌ ñetñapaꞌ oꞌ ameꞌñaꞌwet ñanom.
8Allothpaꞌ nemneñ oꞌch newomhchaꞌch ñamha masheñ Amplias ñeñth atarr nemoerena eꞌñe yameꞌñeñoth Yepartseshar parro. 9Allothpaꞌ ñamha masheñ Urbano, oꞌch newomhchaꞌch ñamha ñeñth parro yethorrena ñeñth poꞌtarwas pen Cristo Jesús. Allothpaꞌ eꞌñe nemorrenteñothpaꞌ oꞌch newomhchaꞌch ñamha masheñ Estaquis. 10Oꞌch newomhchaꞌch ñamha masheñ Apeles ñeñth xhokma awanteneꞌ allowen paꞌnamen topateñets atthoña eꞌñe kowen kothenan Cristo. Allothpaꞌ ñamha oꞌch newomhchaꞌch allowen ñeñth pamoꞌts pen Aristóbulo. 11Allothpaꞌ ñamha namoꞌts Herodión, allothpaꞌ ñamha ñeñth pamoꞌtseshaꞌ pen Narciso. Ñetpaꞌ atarr ameꞌñeñet Yepartseshar. 12Theꞌñapaꞌ nemneñ oꞌch newomhchaꞌch ñamha noxh Trifena ñamha noxh Trifosa. Ñetñapaꞌ nanak thorreññañet Yepartseshar poꞌtarwas, allothpaꞌ noxh Pérsida ñapaꞌxhoꞌña nanak yemorrenteña attho nanak thorrena ñamha Yepartsesharekop. 13Ñamha arrpaꞌ oꞌch newomhchaꞌch ñamha poꞌpsheñeñ masheñ Rufo ñeñth pameꞌñeñoth nanak asherben yenteñ Yepartsesharekop. Ñamha pachoreꞌna oꞌch newomhchaꞌch, tharroꞌmar ñapaꞌ eꞌñe ateth nenteñ ñerraꞌmrratheꞌ ñeñth eꞌñe nachor nepen. 14Theꞌñapaꞌ oꞌch newomhchaꞌtererr poꞌpotantañ masheñneshaꞌ ñeñth añ Asíncrito, ñamha Flegonte ñamha Hermas, ñamha Patrobas, allothpaꞌ ñamha Hermes, ñamha poꞌpotantañ masheñneshaꞌ ñeñth parrompañoꞌtsaꞌyenet. 15Theꞌpaꞌ oꞌch alla newomhchaꞌtererr ñeñth masheñ Filólogo ñamha noxh Julia, allothpaꞌ ñamha masheñ Nereo epoet ñamha poꞌxh, allothpaꞌ ñamha Olimpas, ñamha amaꞌt allowenet masheñneshaꞌ ñeñth parrompañoꞌtsaꞌyenet.
16Eꞌñe semorrentannaꞌteñothpaꞌ atethchaꞌ sewomhchaꞌtannaꞌtena#16.16 Poꞌñoxh oteney, “Eꞌñe semorrentannaꞌteñoth xhoch setsoꞌtstsaꞌpaꞌtannena ñerraꞌm esempo sewomhchaꞌtannaꞌtena.” Ñeñthpaꞌ ateth yexheteꞌth awath. ñeñth ateth poktetsa Partsokop. Ñamha allowenet masheñneshaꞌ ñeñth apxhaꞌyetset allemeñ anetsoꞌmar eꞌñe pameꞌñeñothet Cristo, ñetpaꞌxhoꞌña moeneñet oꞌch womhchaꞌtaset ñamha arr necartoth.
Attho Pablo arr poꞌcartothpaꞌ oꞌ alla kothapeꞌchaterraneterr poꞌpocheño
17Oꞌch, masheñneshachaꞌ ñamha noxhaneshachaꞌ, noterrserr poꞌpoñ añ necartoth. Señotchaꞌ añ acheñeneshar ñeñth moeneneꞌ oꞌch ellopaꞌtetstatonaset sokthaphña ñeñth attho sameꞌñeña Cristo, tharroꞌmar ñetpaꞌ moeneñet oꞌch kothapeꞌchataset ñeñth ama attheyaye ñeñth ateth oꞌ yeyxhatwas. Ñeñth acheñer atethpaꞌ oꞌch selloꞌtsentach seshoth, amach seyemtatstaneto ñeñth ateth yexhatenet. 18Tharroꞌmar ñetpaꞌ ama añeyeꞌ sherbeneto Yepartseshar Jesucristo. Aña kothapeꞌchenet ñeñth ateth moenenet ñet poꞌchets attho korrenet. Attho serrpareꞌtenet koxhneshaꞌ ñoñets, ñeñthpaꞌ attha shekëñet acheñeneshaꞌ ñeñth ama womenkayeꞌ penaye poeyoxher. 19Ñewa, alloweney yeñotenes sapaꞌ oꞌ sameꞌñera Cristo ñeñthoꞌmarña napaꞌ atarr nokshensa. Añña nemnen oꞌch eꞌñe señot ñeñth eꞌñe kowentetsa Yomporekop. Allochñapaꞌ amach sokthapeꞌchatsto ñeñth ama kowenayaye. 20Allochñapaꞌ Yomporpaꞌ awenchaꞌ aꞌwañamphsonas ñeñth attho atarr shekënes oneñeth, ñeñthara Yompor ñeñth eꞌñe kowen yokshateneꞌ yeyoxhro. Yepartsesharepaꞌchña Jesucristo eꞌñe saꞌnatenaya.
21Theꞌpaꞌ oꞌch alla neñotaterrserr añ necartoth, masheñ Timoteopaꞌxhoꞌña moeneñ oꞌch womhchaꞌtas ñamha, ñapaꞌ ñeñth epan nethorrena. Allothpaꞌ ñamha añ namoꞌts maꞌpsheñoꞌmaret ñetpaꞌxhoꞌña moeneñet oꞌch womhchaꞌtaset ñamet. Poesheñarrpaꞌ añ masheñ Lucio, allothpaꞌ ñamha masheñ Jasón, ñamha masheñ Sosípater.
22Napaꞌxhoꞌña ñeñthen sochetsa Tercio, eꞌñe nameꞌñeñoth Yepartseshar nemneñ oꞌch newomhchaꞌtas añ masheñ Pablo poꞌcartoth. Napaꞌ ñeñthen kellkaten masheñ Pablo.
23Masheñ Gayopaꞌxhoꞌña moenen oꞌch womhchaꞌtas ñamha. Na theꞌpaꞌ eꞌñe paꞌpaklloꞌtsenen ña, tharroꞌmar all nexhap. Ñapaꞌ ateth otenanet xhokmach apxhenet allowenet paꞌpakllo ñeñth ameꞌñetsa arr. Ñamha masheñ Erasto moeneñ oꞌch womhchaꞌtas ñamha. Ñapaꞌ ña tesorerotets arr Corinto, ña aññoꞌteneꞌ kelle anetsokop. Ñamha masheñ Cuartopaꞌxhoꞌña moeneñ oꞌch womhchaꞌtas ñeñthara añ necartoth.
24Yepartsesharepaꞌchña Jesucristo saꞌnataya allowenes. Ñeñthpaꞌ atthetepaꞌch Nompore.
Attho all wañen Yompor poꞌñoñ añ cartothpaꞌ yaꞌyeꞌchoxhtatoñepaꞌch ora alloweney
25Theꞌñapaꞌ yaꞌyeꞌchoxhtatoñepaꞌch Yompor tharroꞌmar ñapaꞌ ñach awamenkath sepeneꞌ, ñeñth eꞌñe ateth oten añ kowen ñoñets alloch yekeshperra. Ñeñthara añ kowen kothaphñats ñeñth neserrpareꞌtatenes ñeñth eꞌñe ateth pena Jesucristo ñeñth awathotheñ ama eñotpawo. 26Tharraña theꞌpaꞌ Yompor ñeñth ama arromñatheshayayepaꞌ moenaterrey oꞌch yeñoter ñeñth ama eñotpawo awathotheñ. Ñewa, ñapaꞌ awathpaꞌ añ eñotateꞌth ñeñth aꞌmhtaꞌyesayeꞌth poꞌñoñ, ñetñapaꞌ awoꞌch kellkënet ñeñth ateth eñotatenanet Yompor. Atthochña yeñoter yamha, amaꞌt ñamha allowen paꞌnamen acheñeneshaꞌ; allochñapaꞌ atthoch eꞌñe yameꞌñaꞌwerra ora errapharen, ñeñthey paꞌnamen acheñey.
27Eꞌñe poemoereñothey Jesucristo ayeꞌchoxhtatarethtepaꞌch Yompor errponowañen, ñeñthara Yompor ñeñth ñapoeth eꞌñe eñotañtetsa. Ñeñthpaꞌ atthetepaꞌch Nompore. Allowa wañ añ necarta.
Pablo
Currently Selected:
Romanos 16: ame
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.