Romanos 15
15
Attho añchaꞌña yeꞌnen ñeñth eꞌñe pokteꞌ enten yemoꞌnasheñ
1Ñeñthoꞌmarña napaꞌ notenes, ñeñthey eꞌñe womenk peneꞌ yeyoxher Yomporekop, ñeñthey ama epwoyeꞌ yameꞌñeño Yompor, añña poktetsa oꞌch yeyenpoeñ yemoꞌnasheñ ñeñth ama womenkayeꞌ penaye poeyoxher Yomporekop ñeñth xhokma epwoyeꞌ ameꞌñenana Yompor. Ñeñthpaꞌ atethchaꞌ yeyenpoeñ, amachña aña ateth es yephaꞌyeno ñeñth ateth yemnen ya. 2Añchaꞌña yeꞌnen oꞌch ateth yepen ñeñth eꞌñe pokteꞌ enten yemoꞌnasheñ. Ñeñthpaꞌ atethchaꞌ yeyenpoeñ allochñapaꞌ oꞌch eꞌñe womenk phaꞌnman ñamha poeyoxher Yomporekop, allochñapaꞌ amach alloꞌna epwoyeꞌ ameꞌñenano Yompor. 3Amach aña ateth es yephaꞌyeno ñeñth ateth yemnen ya tharroꞌmar Cristopaꞌ ama aña ateth phaꞌyeseꞌthe ñeñth ateth moeneꞌth eꞌñe ñañeña. Añña phaꞌyeseꞌth ñeñth moenacheꞌth Pompor. Tharroꞌmar ñapaꞌ ñeñthekopña moeroxhteꞌth ñeñth ateth moenacheꞌth Pompor. Ñeñthoꞌmarña Cristopaꞌ ateth otaneꞌth Pompor, ñeñthpaꞌ ateth och: “Pha eꞌmoñeꞌtetañpaꞌ atthoña sasareꞌtennet.” Atthoña eꞌñe etsoterra ñoñets ñeñth ateth akellkaꞌwareth amaꞌt awathotheñ. 4Ñamha allowen añ ñoñets ñeñth ateth akellkaꞌwareth awathotheñ, ñeñthpaꞌ yokpaꞌnaña ateth anareth. Allochñapaꞌ atthoch yapaꞌxhoꞌña oꞌch yexhaterryet ñeñth ateth moenen Yompor. Allochñapaꞌ atthochña womenk yepen yeyoxher Yomporekop. Ñamha añ ñoñets ñeñth ateth akellkaꞌwareth awathotheñpaꞌ nanakchaꞌ koshaterrey allochñapaꞌ atthothchaꞌña eꞌñe yoksheñeshaꞌ yeyemteññaña Yompor ñeñth oꞌpatatenya. 5Yompor ñapaꞌ ñeñth awamenkath yepeneꞌ ñamha ñapaꞌ ñeñthña yokshateneꞌ yeyoxhro. Ñamha ñepaꞌchña eꞌñe señotaterreꞌ, allochñapaꞌ atthoch eꞌñe kowen seyxherr ñeñth ateth moenen Cristo Jesús, allochñapaꞌ eꞌñech kowen sentannena. 6Allochñapaꞌ allowenespaꞌ eꞌñech parrokma saꞌyeꞌchoxhtateññañ Yompor, ñeñthara Yepartseshar Jesucristo Pompor.
Attho amaꞌt ñeñth ama judioneshayayepaꞌ awoꞌt aserrpareꞌtatarethtet añ kowen ñoñets alloch yekeshperra
7Ñeñthoꞌmarña napaꞌ notenes, eꞌñech kowen es sephannaꞌtyena allowenes eꞌñe ateth kowen oꞌ perrey Cristo, allochñapaꞌ atthoch seyemteñoth parro kowenchaꞌ saꞌkshapretarethtena Yompor. 8Ñamha theꞌpaꞌ oꞌch notas, Cristopaꞌ awoꞌt wapa arr patsro atthoch thorrosa judioneshakop. Allochñapaꞌ atthoch allowen acheñeneshaꞌpaꞌ oꞌch xhapanet poeyoxhreto, Yomporpaꞌ ama poenesho poꞌñoñ. Ñeñth eꞌñe ateth otaneꞌth judioneshaꞌ paꞌtañneshañ awathpaꞌ ñeñthchaꞌ ateth moenaterranet esempo, ñeñthpaꞌ xhokmachña eꞌñe etsoterra poktakma. 9Ñeñthekopña wapa ñamha atthochña acheñeneshaꞌ ñeñth ama judioneshayaye ñetpaꞌxhoꞌña oꞌch ayeꞌchoxhtatoñet ñamet Yompor tharroꞌmar Yomporpaꞌ awoꞌt moerenanet ñamet. Atthoña etsoterra ñoñets ñeñth kellkaꞌwet awath ateth ñerraꞌmrratheꞌ eꞌñe Cristo oteꞌ Pompor, ñeñthpaꞌ ateth ot:
Ñeñthoꞌmarña napaꞌ oꞌch naꞌyeꞌchoxhtatonaph alloꞌtsaꞌyen acheñeneshaꞌ ñeñth ama judioneshayaye, allñapaꞌ naꞌxhotenephchaꞌ nemorreñeshaꞌ.
10Ñamha poꞌpoñ ñoñets ñeñth ateth akellkaꞌwareth awathotheñ, ñeñthpaꞌ ateth oten:
Ñamha sa ñeñthes poꞌpoñ acheñes ñeñthes ama judioneshayaysopaꞌ sokshepaꞌch samha, ateth koshena judioneshaꞌ ñeñth poeyochreshaꞌ pen Yompor.
11Ñamha poꞌpoñ ñoñets ñeñthpaꞌ ateth oten:
Ñeñthes ama judioneshayaysopaꞌ saꞌyeꞌchoxhtatoñepaꞌch Yompor, amaꞌt allowenes paꞌnamen acheñres saꞌyeꞌchoxhtatoñepaꞌch Yompor.
12Elloña Isaíaspaꞌxhoꞌña ateth oteꞌth awath:
Esempopaꞌ orrterrach poesheñarr ñeñth Isaí#15.12 Isaípaꞌ ñeñthara Jesé. Ñewa, ñapaꞌ ñeñth poechemeran David ñeñth amhchaꞌtarethtatseꞌth Jerusaléño. poꞌmhreneñ. Ñapaꞌ orrterrach allochñapaꞌ ñeñthchaꞌ paꞌmhchaꞌtarether perr allowen paꞌnamen acheñeneshaꞌ, ñamha allowenet ñachña atarr yemterret. Arrpaꞌ allowa ñeñth ateth aꞌpotheteꞌth Cristo awath.
13Yomporpaꞌ ñachña atarr ayemoetpoterrtsa. Ñamha ñepaꞌchña sokshateneꞌ eꞌñe poktakma. Allochñapaꞌ amach eñalle amaꞌt koñeꞌtha ñeñthchaꞌ sellkateneꞌ attho sameꞌñeña ña. Allochñapaꞌ Paretsña Poekamkëñpaꞌ ñachña awamenkath sepeneꞌ. Atthochña eꞌñech soksheñeshaꞌ sekwen ñeñth oꞌpatatensa Yompor.
Attho Pablopaꞌ awoꞌt llesenseñ Jesucristo atthoch amach poemhchaꞌñotheyeꞌ alla yerpaterraneto ñeñth eꞌñe pokteꞌ enten Yompor
14Ñamha theꞌpaꞌ oꞌch, masheñnesha ñamha noxhanesha notas, napaꞌ neñotenes sapaꞌ atarr semorrentannena ñamha neñotenes oꞌ eꞌñe xhaponasa seyoxhro ñeñth ateth moenatenes Yompor. Allochñapaꞌ atthochña eꞌñe kowen sokthapeꞌchatannena erraꞌtsentheꞌ kowentetsa Yomporekop. 15Tharraña amaꞌt atethpaꞌ ama nemhchañotheyeꞌ oꞌ notwanmaso paꞌnamen arr necartoth ñeñth ateth pokteꞌ enten Yompor. Atthoña oꞌ alla neyerpaterrserr ñeñth ateth moenen Yompor. Ñeñthoꞌmarña ateth nepenes, tharroꞌmar eꞌñe Yompor poemoereñothenpaꞌ 16awoꞌt moenatenen nach thorretsa Jesucristokop. Errakmañen allemeñ anetsoꞌmar nethorrena, alloꞌtsaꞌyen acheñeneshaꞌ ñeñth ama judioneshayaye. Napaꞌ na aꞌpothenawet Yompor poꞌñoñ ñeñth poꞌñoxh alloch yekeshperra. Oꞌch nameꞌñatwera ñeñth ama judioneshayaye, allempoñapaꞌ atthochña newapatanet Yomporesho ateth ñerraꞌmrratheꞌ xho es yapoeñ Yompor, ñañapaꞌ ñeñthchaꞌña atarr koshateneꞌ. Allothñapaꞌ Paretsña Poekamkëññapaꞌ ñachña aꞌkowentatwerrawet. Atthochña eꞌñe kowen enteñet Yompor.
17Ñeñthoꞌmarña theꞌpaꞌ eꞌñe neyemteñoth Cristopaꞌ eꞌñe pokteꞌ nenteñ oꞌch eꞌñe noksheña ñeñth allo nethorrena Yomporekop. 18Napaꞌ aña patherr noten attho Cristopaꞌ eꞌñe awamenkath penen, ñeñthoꞌmarña xhokma nameꞌñateña amaꞌt ñeñth ama judioneshayaye. Attho neserrpareꞌtatanet Yompor poꞌñoñ, ñetñapaꞌ awoꞌt eꞌñe nameꞌñatwanet. Ñamha attho napaꞌ eꞌñe kowenareꞌ es norrtatyen, ñetñapaꞌ awoꞌt eꞌñe kowen ameꞌñeñet Yompor. 19Ñamha ñetpaꞌ añña ameꞌñatawet ñeñth attho eꞌñe awamenkath penen Cristo atthoña norrtatanet Yompor poꞌpartsoña ñeñth ama poentareto. Ñetpaꞌ ñeñthña eñotatwawet, ñeñthpaꞌ poꞌñoxh eꞌñe Parets Poekamkëñoth ñeñth eꞌñe awamenkath yepeneꞌ. Attheñapaꞌ ora errakmañen oꞌ neserrpareꞌtwa añ kowen ñoñets attho eꞌñe yameꞌñeñoth Cristopaꞌ oꞌch yekeshperra. Atethña neserrpareꞌtyesnom allemeñ anetsoꞌmar eꞌñe Jerusaléñotheñ Ilíricoꞌmarowen. 20Napaꞌ añña atarr nemnen oꞌch neserrpareꞌtyen añ kowen ñoñets errapharen bhaxhayoꞌmar all ama poeꞌmareto ñeñth Cristotets. Atthochña napaꞌ amach arra neseno serrpareꞌtats all oꞌ serrpareꞌtatwawa poꞌpsheñeñ. 21Atthochña etsoterra añ ñoñets ñeñth ateth akellkaꞌwareth awathothen, ñeñthpaꞌ ateth oten Cristokop:
Acheñeneshaꞌ ñeñth amaꞌt awathapaꞌ ama aserrpareꞌtatarethteneto ñeñth ateth pena ña, ñetñapaꞌ enteretchaꞌ. Ñeñthara acheñer ñeñth ama poeꞌmarano ñeñth ateth pena ña, ñetñapaꞌ xherranetchaꞌ poeyoxhreto ñeñth ateth pena ña.
Attho Pablopaꞌ atarr sechena oꞌch awoꞌ anetso Romo oꞌch emoꞌtenanaꞌ ñeñth ameꞌñetsa all
22Napaꞌ shonteꞌ neserrpareꞌtatyen errakmañen arr, ñeñthoꞌmarña ama eshkayeꞌ neseno sesho. Amaꞌt awañotheñ atarr nesechenañ oꞌch nabhchensaꞌ, ama erroth nepeñe. 23Tharraña na theꞌpaꞌ oꞌ neꞌnwa netarwas ñeñth attho neserrpareꞌtyen arroꞌmar allemeña. Ñamha napaꞌ awathotheñ nesechena oꞌch nabhchensaꞌ. 24Ñeñthoꞌmarña theꞌpaꞌ eꞌñe poꞌñoxh nesechena oꞌch awen sesho oꞌch nabhchensaꞌ. Allochñapaꞌ oꞌch yabhchannaꞌta allponmat, allempoñapaꞌ ñatoꞌ atthothpaꞌ oꞌch seyenpaꞌn atthoch nexhap ñamha Españo. 25Ñewa, theꞌpaꞌ ñanomchaꞌ Jerusaléño neta, atthoch nanmanet allpon ofrenda masheñneshakop ñeñth ameꞌñetsa all. 26Tharroꞌmar allpon ñeñth ameꞌñetsa Macedonio ñamha Acayo, ñetpaꞌ eꞌñe pokteꞌ enteñet oꞌch apoet allpon ofrenda, ñeñthchaꞌ oñmachet masheñneshaꞌ Jerusaléño ñeñth nanak es palltaꞌyenet. 27Macedonioꞌmarneshaꞌ ñamha Acayoꞌmarneshaꞌ ñetpaꞌ ama judioneshayayeto. Tharraña eꞌñe pokteꞌ enteñet oꞌch yenpoeñet judioneshaꞌ ñeñth Jerusaléñoꞌtsaꞌyen ñeñth nanak es palltaꞌyenet. Napaꞌxhoꞌña eꞌñe pokteꞌ nenteñ tharroꞌmarña ñeñth judioneshaꞌ ñetpaꞌ ñetña serrpareꞌtaterret ñanom ñeñth ama judioneshayaye Yompor poꞌñoñ. Ñeñth ateth apharethtet ñetpaꞌ ñeñthpaꞌ poekamkëñekop. Ñeñthoꞌmarña theꞌpaꞌ eꞌñe pokteꞌ, ñeñth ama judioneshayayepaꞌ oꞌch alla yenpoerran ñamha ñeñth judioneshaꞌ ñeñth poktetsa poꞌchtsokpoet alloch korrenet arr patsro. 28Allempoch nexhap Jerusaléño oꞌch napos masheñneshaꞌ ofrenda. Oꞌch napwerranet atthochña eꞌñe neꞌnwa ñeñth netarwas nepen. Allempoñapaꞌ oꞌch awen ñamha Españo. Ñewa, amach nexhenaꞌ Españopaꞌ oꞌch nemoꞌtnomoes allponmat, allothchaꞌ nemhterrerr seshothpaꞌ allempochña oꞌch awen Españo. 29Ñamha neñoteñ ñerraꞌm esempoch nexhap sesho eꞌñe neserrpareꞌtateñothes Cristo poꞌñoñ, sapaꞌ nanakchaꞌ nokshaterres eꞌñe nanak Yompor paꞌnateñoth.
30Ñamha theꞌpaꞌ oꞌch masheñnesha notas, eꞌñe seyemteñoth Yepartseshar Jesucristo, ñamha atthoch apoeney Parets Poekamkëñ alloch eꞌñe yemorrentannena, sapaꞌ xhokmach semaꞌyochampesna. Nanakchaꞌ semaꞌyochapretna, 31oꞌch senamaton Yompor atthoch kowamphsen allochñapaꞌ amach xha rromapno judioneshaꞌ ñeñth ama ameꞌñetso all Judeo. Ñamha oꞌch senamaton Yompor añekop judioneshaꞌ ñeñth ameꞌñetsa Jerusaléño, atthoch eꞌñe kowen entapretapnet ñeñthchaꞌ naposanet. 32Allochñapaꞌ ñerraꞌm Yompor moenatspaꞌ eꞌñech noksheñeshaꞌ nexhap sesho. Allñapaꞌ namesostheꞌ eꞌñe kowen allponmat, ñamha eꞌñe yabhchannaꞌteñothpaꞌ oꞌtheꞌ alla eꞌñe noksherra neyoxhro. 33Yomporepaꞌchña eꞌñe kowen saꞌnataya allowenes, ñeñthara Yompor ñeñth eꞌñe kowen yokshateneꞌ yeyoxhro. Ñeñthpaꞌ atthetepaꞌch Nompore.
Currently Selected:
Romanos 15: ame
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.