Santiago 5
5
Ñeñth ateth otan ekhllayorethneshaꞌ
1Theꞌpaꞌ oꞌch seꞌmhñoten ñeñthes nanak ekhllayorethes. Theꞌpaꞌ eꞌñe seyaꞌchpeñeshaꞌpaꞌ serranareꞌta tharroꞌmar poꞌñoxh xhokma eñall ñeñthchaꞌ sewapoya esempo ñeñthchaꞌ semoeroxhtateꞌ. 2Amaꞌt theꞌpaꞌ oꞌ attha poetsanaꞌtwen sechekom. Sapaꞌ ñeñthaña atarr semorrentena. Ñamha ñeñth nanak koxhneshaꞌ ñeñth sechorraꞌyenapaꞌ oꞌ attha pompereꞌchwa. 3Ñamha amaꞌt theꞌ sekhllayorpaꞌ oꞌ attha chomatlleꞌchwen. Theꞌpaꞌ ama es sherbeno. Yeñoteñ eꞌñe poechmatlleꞌcheñoth sekhllayorpaꞌ ñeñthchaꞌña seꞌnwerreꞌ samha sechets esempowañen ateth ñerraꞌmrratheꞌ achamarethes tso. Theꞌña amaꞌt oꞌ mellapoterrmochapaꞌ sañapaꞌ alloꞌna seshontaꞌwanen sekhllayor. 4Ñamha theꞌ ñeñth attha setarwasatyeseꞌth ñeñth ama setsaꞌtyeseꞌthepaꞌ theꞌña ñetpaꞌ poellkëñothetpaꞌ nanak eñenet sokop. Ñeñthoꞌmarña theꞌ Yompor ñeñth nanak Paretspaꞌ eꞌmoenanet ñeñth ateth poeyaꞌchpeñeshaꞌ xhokma eñenet sokop. 5Ñamha sa añe patsropaꞌ esokmañen sechen ama es sepallteno amaꞌt mamesha. Ñeñthoꞌmarña ñerraꞌm errothenxhoꞌ nanak kowen sentenpaꞌ atethchaꞌxhoꞌ sepena. Xhach sottena ñerraꞌmrratheꞌ chañcho ñeñth nanak erratareth atthoch nanak otaꞌ. Ñerraꞌm oꞌchña nanak esoyaꞌtpaꞌ allempoñapaꞌ oꞌch moetset. Sapaꞌxhoꞌña atethchaꞌ perres samha Yompor esempowañenchaꞌ werra. 6Tharroꞌmar sapaꞌ xhokma semoeroxhtatyeñ acheñ ñeñth ama es yexhkatetso atthachña sapaꞌ semtsatyenanet. Ñamha ñetpaꞌ amach errothenoth aꞌkeshphateto ñañeñeta allempo sapaꞌ soteñeꞌchenanet.
Attho ama amoenmeꞌchpawo kowameꞌteꞌ Cristo
7Ñeñthoꞌmarña, masheñneshachaꞌ ñamha noxhaneshachaꞌ, oꞌch notas, xhokmach eꞌñe saꞌwantaꞌwanom ñeñth echarr sentyen, atthoch sekwameꞌch Yepartseshar Cristo esempowañenchaꞌ werra. Atethchaꞌ sepha ateth yepena ñerraꞌm esempo yemneñ oꞌch es yenareꞌt. Ñerraꞌm yemneñ oꞌch es yenareꞌtpaꞌ xhokmach ñanom yekwen esempowañenchaꞌ wapotyena eshekchaꞌ eꞌñech kowen es yexhkatsa ñeñth nanak yemorrentyena. 8Ñeñthoꞌmarña sapaꞌxhoꞌña xhokmach es saꞌwanten. Amach semoenmeꞌchatsche tharroꞌmar oꞌ mameshamerrapaꞌ oꞌch werra Yepartseshar. 9Masheñneshachaꞌ ñamha noxhaneshachaꞌ, amach sethanmareꞌtannaꞌtatsto, atthoch Yompor ñeñth eꞌñe es eñotetspaꞌ amach otteñeꞌchwerrso samha ñerraꞌm esempoch werra. Tharroꞌmar Yomporpaꞌ oꞌ allanerrmoch. 10Oꞌch masheñneshachaꞌ ñamha noxhaneshachaꞌ sokthapeꞌch ñeñth ateth phaꞌyeseꞌth awath ñeñth aꞌmhtaꞌyesayeꞌth Yompor poꞌñoñ. Tharroꞌmar ñetpaꞌ nanak awanteteꞌth attho nanak amoeroxhtatarethteteꞌth. Ñeñthoꞌmarña sapaꞌxhoꞌña atethchaꞌ sepha samha. 11Poꞌñoxhpaꞌ yeñoteñ ñeñth nanak awanteneꞌ moeroxhteñetspaꞌ ñeñthpaꞌ nanakchaꞌ kosheñtsoꞌtsen. Amaꞌt sapaꞌ señotweñ ñeñth ateth pha awath Job. Ñapaꞌ nanak awantan topateñets. Ñamha sapaꞌ eꞌñe señotweñ ñeñth ateth phoñ Yompor. Allempo moeroxhetwa Job, Yomporñapaꞌ alla apoer esokmañen atthoch eñoch Yomporpaꞌ nanak amoeraña.
12Ñeñthoꞌmarña sa, masheñneshachaꞌ ñamha noxhaneshachaꞌ, añ pokteꞌ sapaꞌxhoꞌña añchaꞌ ñanom sekexhpaꞌwa. Amaꞌt eꞌñe erraꞌtsena paꞌsoꞌchñopaꞌ ñatoꞌt senenaꞌña señoñ; amach sotatsto oꞌch senaꞌ señoñ Yompor poeꞌntañ paꞌsoꞌchño, ñamha amach sotatsto oꞌch senaꞌ señoñ Yompor poꞌpatseñ paꞌsoꞌchño. Añchaꞌña ñerraꞌm esempo eꞌñe pokteꞌ es sentenpaꞌ atthach sanap: “Ateththeꞌkaꞌye.” Ñamha ñerraꞌm esempo ama es pokteꞌ sentenopaꞌ atthach sanap: “Ama attheyaye.” Allothpaꞌ ñeñthach. Allochñapaꞌ amach eñalle atthoch otteñeꞌchwerres Yompor.
Añ pokteꞌ xhokmach yemaꞌyochamphsannena
13Añña ñeñth poktetsa ñeñthchaꞌ ateth sepha. Ñerraꞌm erraꞌtsenothes moeroxhtatsapaꞌ xhochña semaꞌyocha. Ñamha ñerraꞌm eseshaꞌ eꞌñe koshetsapaꞌ eꞌñe pokteꞌ morrechetepaꞌ allo yaꞌyeꞌchoxhtateñ Yompor. 14Ñamha ñerraꞌm eseshas atsnaꞌtetspaꞌ añ pokteꞌ oꞌch sagotach ñeñth pomporneshaꞌ pen ñeñth ameꞌñetsa, atthochña ñetchaꞌ maꞌyochamphset atsnañeth. Allothpaꞌ eꞌñe poexhoreꞌteñothet Yomporpaꞌ noñetepaꞌ koñeꞌth es poeseꞌ atsnañethesho. 15Ñerraꞌm eꞌñe poeyemteñothet Yompor maꞌyochetpaꞌ atsnañethñapaꞌ korrerrach. Tharroꞌmar Yomporpaꞌ ñach awamenkath perreꞌ. Ñamha ñerraꞌm añ oꞌ phowa ñeñth ama pokteyayepaꞌ allempo Yomporpaꞌ oꞌch alla peretnerrñañ poꞌchñar. 16Ñeñthoꞌmarña añ pokteꞌ oꞌch saꞌmethaꞌwerr allowenes soꞌchñar. Allochñapaꞌ xhokmach semaꞌyochamphsannena atthoch sokrrerra eꞌñe kowen. Ñamha amaꞌt erraꞌtsena acheñer ñerraꞌm eꞌñe kowen kothapeꞌchen Yomporekop ñamha ñerraꞌm eꞌñe poeyoxhrokmañen maꞌyochetpaꞌ atethña eꞌmhñotenña Yompor. 17Ateth pha awath Elías ñeñth aꞌmhtayeꞌth Yompor poꞌñoñ. Ñeñthña Elías amaꞌt attha ñerraꞌm ya ñeñthey arromñathey. Tharraña allempo maꞌyochana Yompor attho enam amach waterropaꞌ eꞌñe allempotheñña ama waterro maꞌpa char ñamha meterrerr pechapmha arrorr ama wateno. 18Allempoñapaꞌ oꞌ alla maꞌyocherrerr atthoch enamoerran Yompor waterrepaꞌ. Allempoñapaꞌ oꞌ alla waterra, ñamha allempopaꞌ oꞌ alla choparesyerr narmetsoxhno.
19Masheñneshachaꞌ ñamha noxhanesha ñerraꞌm sa poesheñarrothes oꞌch alla sepoerrerra ñeñthes theꞌpaꞌ kotheneꞌ kowen Yompor poꞌñoñ, tharraña ñerraꞌm eseshaꞌña alla sokthapeꞌchaterreꞌ eꞌñe kowenpaꞌ 20sapaꞌ señochepaꞌch ñeñth ateth kothapeꞌchatets eꞌñe kowenpaꞌ xhoch aꞌkeshphatenan pamoꞌts poekamkëñ ñeñth atarr ochñath ñamha xhoch peretnateññañ allowen shonteꞌ poꞌchñar. Theꞌpaꞌ ñeñthach notas. Allowa.
Santiago
Currently Selected:
Santiago 5: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.