Santiago 4
4
Ñeñth koshatseꞌtyenaya ñeñth patsoꞌmarekpapaꞌ ñeñthña eꞌmoñeꞌteneꞌ ñeñth kowentetsa Yomporekop
1Ñewa, theꞌpaꞌ oꞌch yokthapeꞌch poꞌpoñ atthoch señoch erroththeꞌ wenaña eꞌmoñeꞌtannaꞌteñets ñamha orroteñets ñeñth xhokma orrtatyenet sesho. Ñewa, ñeñthpaꞌ arroth wena eꞌñe sa seyeꞌchapretannaꞌteñoth paꞌnamen ñeñthña kellaraꞌyetsaña seyoxhro. 2Tharroꞌmar ñerraꞌm errotheno nanak es yeyeꞌchapretena, ñerraꞌm yapaꞌ ama yecheñepaꞌ oꞌchxhoꞌ ñeñthoꞌmara yemtsannaꞌta. Ñamha ñerraꞌm esempo es yesopeꞌchapreten, ñerraꞌm yapaꞌ ama yecheñepaꞌ oꞌchxhoꞌ ñeñthoꞌmara yorrota, amapaꞌ oꞌchxhoꞌ ñeñthoꞌmara yekhllarannaꞌta. Ñewa, yapaꞌ añoth ama yecheno ñeñth nanak yemnaꞌyen, tharroꞌmar ama añ yenamoeno Yompor. 3Ñatoꞌ amaꞌtchaꞌ es yenamhpaꞌ amach yagape, tharroꞌmar ñatoꞌ añekpach es yenamoeñ ñeñth ama pokteyaye ñokop. Tharroꞌmar ñatoꞌ añekpach es yenamoeñ atthoch yañapaꞌ oꞌch nanak es yokshatseꞌtyena allo. 4Ñewa, awañapaꞌ soten awoꞌch sameꞌñera Cristo, tharraña theꞌñapaꞌ aña sokshatseꞌtyena poꞌpoñ. Amaꞌt señoteñe ñeñth koshatseꞌtyenaya ñeñth patsoꞌmarekpapaꞌ ñeñthña eꞌmoñeꞌteneꞌ ñeñth kowentetsa Yomporekop. Ñeñthoꞌmarña ñerraꞌm yapaꞌxhoꞌ oꞌch alla yokshatseꞌterra ñeñth patsoꞌmarekpapaꞌ oꞌchxhoꞌ alla yeꞌmoñeꞌter yamha Yompor. 5Ñeñthpaꞌ ama orrena oteno Yompor poꞌñoñ ñeñth akellkareth awathotheñ, ñeñthpaꞌ ateth oten. “Yompor Poekamkëñ ñeñth chorratenya ñapaꞌ eꞌñe poemorrenteñotheypaꞌ nanak mopaꞌteney.” 6Ñeñthoꞌmarña Yomporpaꞌ xhokmach moeneñ oꞌch awamenkath phaꞌy atthoch amach alla yepsere ña. Ñeñthoꞌmar amaꞌt Yompor poꞌñoñopaꞌ eꞌñe anwareth awathotheñ ñeñthpaꞌ ateth oten: “Yomporpaꞌ amach errothenoth yenpano ñeñth eꞌñe kowen entetsa ñañeña, amachña Yomporeyeꞌ ameꞌñeno. Ñeñthoꞌmarña Yomporpaꞌ añach nanak yenpoen ñeñth eꞌñe poeñmañeshaꞌ ameꞌñenaya ña.” 7Ñeñthoꞌmarña sapaꞌ xhokmach eꞌñe kowen sameꞌñeña Yompor. Añchaꞌña sathpareꞌt oneñeth tharroꞌmar ñerraꞌm atethchaꞌ sephapaꞌ, oneñethpaꞌ kexhpaꞌnerreschaꞌ. 8Ñeñthoꞌmarña oꞌch alla separrokmaterr epas Yompor. Tharroꞌmar ñapaꞌ xhokmach alla agërres. Theꞌpaꞌ amaꞌt oꞌtheꞌ sephowa ñeñth ama kowenayaye Yomporekoppaꞌ theꞌpaꞌ añ poktetsa oꞌch alla sokthapeꞌcherr kowen atthoch Yomporpaꞌ oꞌch alla enterres eꞌñe kowen. Tharroꞌmar sapaꞌ amaꞌt semneñeñ oꞌch semorrentera Yomporpaꞌ, tharraña xhokma semorrentena ñamha ñeñth patsoꞌmarekpa. Ñeñthoꞌmarña theꞌpaꞌ aña poktetsa oꞌch saꞌypoꞌñaꞌwerr sosyaꞌtsañ ñeñth seyoxhroꞌtsen. 9Eꞌñe sathpareꞌteñoth Yomporpaꞌ xhosa llekërrtsa. Eꞌñe sellkëñothpaꞌ seyawepaꞌch. Ñamha amach alloꞌna secheꞌtatsetneno, xhochña seyawa. Ñamha amach alloꞌna nanak es sokshatseꞌtneno, xhochña sellka. 10Ñamha oꞌch saꞌmetherr soꞌchñar Yomporesho atthoch Yomporpaꞌ oꞌch alla tantaterres.
Attho ama atompareꞌtpawo yamoꞌts
11Masheñneshachaꞌ ñamha noxhaneshachaꞌ, amach sesasareꞌtannaꞌtatsto. Tharroꞌmar ñerraꞌm eseshaꞌ sasareꞌteneꞌ pamoꞌts, amapaꞌ ñeñth tompareꞌteneꞌ pamoꞌtspaꞌ poꞌñoxhpaꞌ oꞌ achmhareꞌtan ñamha Yompor poꞌñoñ ñeñth ateth anareth. (Tharroꞌmar Yompor poꞌñoñ ñeñth ateth anarethpaꞌ ateth oten, yemorrentannaꞌtepaꞌch alloweney.) Tharroꞌmar ñetpaꞌ xhach otenapoetañ Yompor poꞌñoñ ñeñth ateth anarethpaꞌ ñatoꞌ amatheꞌ es sherbeno. Tharraña ñerraꞌm esempo ateth yepenapaꞌ xhach yottena ñerraꞌmrratheꞌ yañeña eꞌñe es eñotwets. Tharraña ñeñthpaꞌ ama attheyaye. Añña pokteꞌ xhokmach yameꞌñya Yompor poꞌñoñ ñeñth ateth anwareth. 12Tharraña yapaꞌ yeñoteñ eꞌñe poesheñarra ñeñth neneꞌ añ ñoñets ñeñthara Yompor ñeñth eꞌñe poꞌñoxh es eñotets. Ñeñthara Yompor ñeñth eñoteneꞌ ñeñthchaꞌ allpon aꞌkeshphaterr, ñamha ñeñthchaꞌ allpon chenkërrtsa. Esoꞌmareꞌtña sañapaꞌ xhatheꞌ sotenapañ ñatoꞌ eꞌñech sañeña eñoteꞌ ñeñth ama kowenayaye acheñ.
Attho ama eñotpawo ñeñthchaꞌ yetantoya tsapathoneth
13Theꞌpaꞌ oꞌch notas ñamha poꞌpoñoneth. Oꞌch seꞌmhñoten ñeñthes ateth otets: “Theꞌch amapaꞌ ñatoꞌ tsapathchaꞌ oꞌch awen bhaxhayo poꞌpoñ anetso, allchaꞌ netarwasenaꞌ patherr char atthoch negana shonteꞌ kelle.” 14Tharraña amaꞌt ateth soteneñpaꞌ amaña señoteñeña ñatoꞌ eschaꞌ setantoya tsapathoneth. Tharroꞌmar añ patsropaꞌ eꞌñe mamekpa yokrrena. Attho yokrrena arr mameꞌ añ patsropaꞌ eꞌñe atthey ñerraꞌmrratheꞌ os ñeñth yentaꞌmoeneꞌth awathekma xhach rremaꞌxhen eꞌñe patso. Oꞌchña enomeꞌtaꞌmoen atsneꞌpaꞌ oꞌch wañerr. 15Ñeñthoꞌmar aña pokteꞌ oꞌch soten ateth: “Ñerraꞌm Yomporchaꞌ moenatspaꞌ aꞌnatnepaꞌ atthoch nephaꞌyes ñeñth ateth nokthapeꞌchen.” 16Tharraña sapaꞌ ama attheyeꞌña sepeno. Ñeñthapaꞌ atthachña paꞌnamen sotyen eꞌñe sommoꞌcheñoth. Tharraña ñeñth attho yommoꞌchyenapaꞌ ñeñthpaꞌ ama kowenayaye. 17Ñeñthoꞌmarña ellopaꞌ oꞌch alla noterrserr: Ñerraꞌm esempo yeñoteñ yeyoxhro ñeñth kowentetsa Yomporekop, ñerraꞌm amaña ateth yephopaꞌ ñeñthpaꞌ ñeñthña yoꞌchñar yepen.
Currently Selected:
Santiago 4: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.