Colosenses 4
4
1Ñamha sapaꞌ oꞌch notas samha ñeñthes pamoꞌmteꞌ pen ñeñth setarwasaten. Sapaꞌ atethchaꞌ sepeꞌña saꞌtarwasañer ñeñth eꞌñe pokteꞌ entenet ñet. Ñamha sapaꞌ señochepaꞌch sapaꞌxhoꞌña sechenkaꞌyeña Samoꞌmteꞌ ñeñth poeꞌntañoꞌtsen.
2Ñamha theꞌ allowenespaꞌ oꞌch notas samha: Xhokmoepaꞌchña semaꞌyoxhrenaña maꞌyochatsa, amach sekhllañotha semaꞌyocheñoña Yompor. Eꞌñechña separasyosoꞌteñeshaꞌ semaꞌyocheña. 3Ñamha oꞌch semaꞌyocheña Yompor yokop, oꞌch senamonay atthoch eñalleta allchaꞌ yeserrpareꞌtoñ poꞌñoñ, allchaꞌ eꞌñe yaꞌpotwa ñeñth awathotheñ ñeñth amaꞌt poesheñarrapaꞌ ama eseshayeꞌ eñotenaye ñeñth ateth penaña Cristo. Ñeñthoꞌmarña na theꞌpaꞌ ayottamphsarethen cárcelo. 4Ñamha añchaꞌ senamon Yompor allochña napaꞌ oꞌch eꞌñe neñotaterranet eꞌñe eñotoxhen ñeñth ateth poktetsa nokop oꞌch eꞌñe naꞌpotwer allowen.
5Ñamha añekop ñeñth ama ameꞌñetso sapaꞌ señotepaꞌchña ñeñth kowentetsa ñeñthchaꞌ ateth sephanet. Amaꞌt thaya sapaꞌ arosña attha es poexhatstatsa. 6Eꞌñe semoereñothpaꞌ xhokmoepaꞌchña eꞌñe kowen seꞌñoranaꞌtyenanet, allochña ñetpaꞌ eꞌñech kowen entonaset ñeñth ateth señen. Allochña sapaꞌ señochchaꞌ eñoranaꞌtyesawet atthoch eꞌñe kowen sanapyesanet eꞌñe poesheñaꞌttsokmoet.
Arrpaꞌ all soꞌterranet poꞌcartoth
7Ñamha theꞌpaꞌ oꞌch notas, masheñ TÃquico ñach señotatenayaꞌ allowen ñeñth ateth nepena na arr. Ñapaꞌ atarr yemoerannena, ñapaꞌ xhokma eꞌñe kowen yenpoenen attho yethorrena Yepartsesharekop. 8Ñeñthoꞌmarña napaꞌ ñeñthekopña nemñeñña sesho ñach señotatenayaꞌ ñeñth ateth yepena ya arr. Ñamha ñach sokshatoseꞌ eꞌñe seyoxhrowen. 9Oꞌch nemñe epoet masheñ Onésimo. Ñapaꞌxhoꞌña xhokma atarr kowen yenpoenen, nanak yemoerannena. Ñapaꞌ eꞌñe parroꞌmarneshas. Ñetchaꞌña señotatoseꞌña allowen ñeñth ateth yepena ya arr.
10Ñamha masheñ Aristarcopaꞌxhoꞌña moeneñ oꞌch womhchaꞌtas añ necartoth. Ñapaꞌxhoꞌña eꞌñe parrokma ayottamphsarethey. Allothpaꞌ oꞌch womhchaꞌtas ñamha masheñ Marcos ñeñthara añ patherr necartoth. Ñapaꞌ Bernabé poepaꞌñer. Napaꞌ oꞌ notwas atethchaꞌ sepeꞌ masheñ Marcos. Ñerraꞌm esempoch xhap seshopaꞌ eꞌñech kowen sagaph. 11Ñamha masheñ Jesús ñeñthara sochetsa Justo, ñapaꞌxhoꞌña moeneñ oꞌch womhchaꞌtas añ necartoth. Ñetpaꞌ ñeñthet ñapoeth judioneshet ñeñth ameꞌñetsa, ñetña nethorrapretenet Yomporekop atthoch atarr ayochreshathtena ña. Ñetña atarr nokshateneꞌ. 12Ñamha masheñ Epafras ñeñth parroꞌmarneshas, ñapaꞌxhoꞌña moeneñ oꞌch womhchaꞌtas ñamha. Ñapaꞌxhoꞌña nanak thorrena Cristokop. Eꞌñe poemaꞌyocheñoth womenkpaꞌ atarr thorrena sokop. Poemaꞌyocheñothpaꞌ xhokma enamatennas Yomporeshoth atthoch eꞌñe womenk sephaꞌnom seyoxher Yomporekop. Ñamha añ enamoennas atthoch eꞌñech poktakma xhaponasa seyoxhro ora allowen ñeñth ateth moenen Yompor. 13Ñokoppaꞌ oꞌ eꞌñe neñotatwas ñeñth ateth nanak thorrena sokop ñamha añekop ñeñth Laodiceoꞌtsaꞌyen, ñamha ñeñth Hierápolisoꞌtsaꞌyen. 14Ñamha masheñ Lucas ñeñth apartañtetsa, nanak yemoerannena, ñapaꞌxhoꞌña moeneñ oꞌch womhchaꞌtas añ necartoth. Masheñ Demaspaꞌxhoꞌña moeneñ oꞌch womhchaꞌtas ñamha.
15Theꞌña sapaꞌ oꞌch sewomhchaꞌch samha nokop masheñneshaxhno ñamha noxhaneshaxhno ñeñth Laodiceoꞌtsaꞌyen. Oꞌch sewomhchaꞌch ñamha Ninfas, sewomhchaꞌch ñamha allowen ñeñth xhokma apxhetsa ña paꞌpakllo eꞌñe pameꞌñeñothet Cristo. 16Esempoch lleyaꞌwet añ carta sesho allothpaꞌ oꞌch selleyach ñamha laodiceoꞌmarneshaꞌ ñeñth pameꞌñeñothet Cristopaꞌ xhokma apxhenet ñamet. Ñamha poꞌpoñ necarta ñeñth nemñen Laodiceo sapaꞌxhoꞌña selleyeꞌch ñerraꞌm esempoch wapateret Laodiceoth oꞌch xherr sesho. 17Ñamha oꞌch soch masheñ Arquipo ñeñth ateth noten na, poꞌñoxhpaꞌ etsotanepaꞌña ñeñth ateth yecheña Yepartseshar ñeñthchaꞌ poꞌtarwas phaꞌ ñokop.
18Na ñeñthen Pablon arrpaꞌ nekellkëñoth eꞌñe na notothpaꞌ oꞌch newomhchaꞌtnerres. Theꞌpaꞌ oꞌch seyerpaꞌna napaꞌ ayottamphsarethen. Theꞌpaꞌ ñeñthach notas, Yomporepaꞌchña saꞌnataya. Ñeñthpaꞌ atthetepaꞌch Nompore. Allowa.
Pablo
Currently Selected:
Colosenses 4: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.