Colosenses 3
3
Añach sokthapeꞌchen ñeñth ateth moenen Cristo ñeñth poeꞌntañoꞌtsen
1Attho poꞌñoxh oꞌ setantapretera Cristo, theꞌñapaꞌ añach sokthapeꞌchen ñeñth ateth moenen Cristo ñeñth poeꞌntañoꞌtsen. Ñapaꞌ allña atarr partsoten eꞌñe Parets poꞌkowenroth. 2Entoꞌmarekopchaꞌña semaꞌyoxhra. Sapaꞌ amachña aña semaꞌyoxhratsto ñeñth patsoꞌmarekpa 3tharroꞌmar sapaꞌ oꞌwañchaꞌ sokshenaña ñeñth patsoꞌmarekpa. Theꞌña sapaꞌ eꞌñe atthes ñerraꞌmrratheꞌ poesheñarr ñeñth rromoets oꞌwañchaꞌ alloꞌna koshaꞌnenana ñeñth patsoꞌmarekpa. (Ñeñthoꞌmarña yapaꞌ yoten oꞌ yerromapretera Cristo.) Theꞌñapaꞌ ñeñthña yokshateneꞌ ñeñth ora allpon atarr kowen enten Cristo. Theꞌpaꞌ attho yokrrerra ello eꞌñe yeparrokmateñoth Cristo ñeñth parrokmateneꞌ Pompor Parets, yaꞌnaña oꞌ yeparrokmaterr epay Parets amaꞌt ñeñthpaꞌ ama entpawoyaye. 4Ñeñthoꞌmarña ñerraꞌm esempoch orrterra Cristo ñeñth allo eꞌñe yokrrena, allempoña sapaꞌxhoꞌña sorrterrach samha epas Cristo. Atthochña sapaꞌ oꞌch sekowentapretera samha.
Oꞌch yeswanom ñeñth mellashañ kothaphñats ñeñth ama pokteyeꞌ enteno Yompor
5Ñeñthoꞌmarña sokoppaꞌ añ poktetsa: Amaꞌt erraꞌtsena sechets ñeñth sokthapeꞌchateneꞌ patsoꞌmarpaꞌ xhosaña aꞌmchechaterreꞌ, ñeñth attho sechtaꞌyeñ ñeñth ama sethaporeyaye, ñamha paꞌnamen sosyaꞌtsañexhno ñeñth ateth moenatseꞌtatyeney yechets, ñamha allpon yemnatseꞌtyen ñeñthpaꞌ ama kowenayeꞌ entapretenye Yompor, ñamha attho es atarr yeyeꞌchapretannaꞌtyena, ñeñthpaꞌ ñeñthaña yeyomporer yepen. 6Ñeñthoꞌmarchaꞌña Yomporpaꞌ entaterranetchaꞌ poꞌyoroxhenña amaꞌt allowen ñeñth athpareꞌteneꞌ. 7Sapaꞌxhoꞌña awathpaꞌ eꞌñe atthekma sokthapeꞌchyeseꞌth allempo sapaꞌ sosyaꞌtsañekpa sokrreꞌth. 8Tharraña theꞌña ñeñthpaꞌ xhosaña aꞌypoꞌñamperreꞌ, amaꞌt ora allowen eꞌmoñeꞌtannaꞌteñets, atsrreꞌmoeñets, oꞌpatarñats, achmhareꞌtannaꞌteñets, amaꞌt allowen eñosatseꞌteñtsoxhno ñeñth atarr sosyaꞌtsañexhno. 9Ñamha amach seshkareꞌtannaꞌtatsto tharroꞌmar theꞌpaꞌ oꞌ seswanemh ñeñth mellashañ ñeñth ateth sokthapeꞌchatyesayeꞌth seyoxhro. Ñeñth ateth sephaꞌyeseꞌth awath ñeñth ama pokteyeꞌ enteno Yompor ñeñthpaꞌxhoꞌña oꞌ seswanemh. 10Sapaꞌ añchaꞌña sechorrerraya ñeñth etserra ñeñthchaꞌña sokthapeꞌchaterreꞌ ello etserra allochña setserrataterrña sokthaphña. Atthoña eꞌñe setserrateñothpaꞌ oꞌch sokthapeꞌcherr eꞌñe kowen ñeñth ateth kothapeꞌchen Yompor ñeñth seyexhkateꞌ. Atthochña sapaꞌ alloꞌnach sesen eñotneneꞌ ñeñth ateth kothapeꞌchen ña. 11Attho yetserrataterr yokthaphña Cristokop, yaña alloweneypaꞌ eꞌñechkaꞌye atthekma poechemer phoweneyña Yompor. Ñeñthoꞌmarña yokoppaꞌ ama eñalleña atthoch yotarethta yapaꞌ poꞌpoñoꞌ acheñrey, yapaꞌ ellopaꞌtetstataretheyoꞌ añoꞌ judioneshayayye, añoꞌ atsorraretheyayye, ñamha poꞌpoñoꞌ acheñrey ñeñth awapña poꞌpoñ anetsoth ñamha ñeñtheyoꞌ yapaꞌ añoꞌ es yeñoteno ñamha ñeñth acheñrey ñeñtheyoꞌ atarwasatarethey eꞌñe attha ñamha ñeñth acheñrey eꞌñe kowenoꞌtseney, tharroꞌmar Cristopaꞌ ñeñthkaꞌyeña eꞌñe allowenakpay, ñapaꞌ ña eꞌñe yechorraꞌwenaya alloweney paꞌnamen acheñrey ñeñth parrokmatenaya.
12Yomporña poemorrenteñothes sapaꞌ oꞌ akrerres ñeñtheschaꞌ aꞌkowentatarethterrtsa Partsokop. Attho akrerrespaꞌ eꞌñepaꞌchña seyxhen atthoch eꞌñe kowen semoerannena, eꞌñepaꞌchña kowen es sorrtatyen poꞌpotantañekop. Sapaꞌ eꞌñepaꞌchña pokteꞌ señch ñerraꞌm poꞌpsheñeñ oꞌch entenes sapaꞌ ama esosheꞌmayayso. Ñamha sapaꞌ amachña aña seꞌnatsto ñeñth eꞌñe sokpa ñeñth ateth sokthapeꞌchen sa tharroꞌmar sapaꞌ ñeñthes alleshonkatets. Ñeñthoꞌmarña sapaꞌ eꞌñepaꞌchña saꞌwantaꞌwanomña ñeñth atarr echarrareꞌ sentyen. 13Ñamha eꞌñepaꞌchña kowen es saꞌwantannena ñerraꞌm esempoch señch poꞌpsheñeñ ñeñth ama pokteyeꞌ orrtateno sokop, sapaꞌ eꞌñechña kowen sephretnannena. Attho Yepartseshar Cristopaꞌ oꞌ peretnaꞌwerres sa, sapaꞌxhoꞌña xhokmachña sephretnannena samha. 14Ñeñth atarr nanak sherbets oꞌch seyxherr atthoch semorrentannena eꞌñe kowen. Tharroꞌmar ñerraꞌm poꞌñoxh yemorrentannenapaꞌ amatheꞌ errothenoth yaꞌypoꞌñerroña poꞌpoñexhno ñeñth kowenteyetsa ñeñth ateth yephaꞌyen. Atthochña alloꞌnachña yesen etsotnomoeꞌña parrokmateñets. 15Attho Yompor oꞌ eꞌñe koshaterres seyoxhro, ñeñthchaꞌña sokthapeꞌchaterreꞌña eꞌñe kowen, tharroꞌmar ñeñthekopña oꞌ xhoreꞌterreyña Yompor atthoch eꞌñe yeparrokmatwerr alloweney ñeñthey ameꞌñenaya. Ñamha oꞌch notas: Sapaꞌ xhokmoepaꞌchña separasyosoꞌteñ Yompor.
16Cristo poꞌñoñpaꞌ xhokmoepaꞌchña eꞌñe kowen sokthapeꞌcheñ sa seyoxhro, atthochña eꞌñe ora señoteñowenpaꞌ xhokmoepaꞌch seyxhatannena atthoch eꞌñe kowen sokshatannena. Ñamha separasyosoꞌteñothpaꞌ semorrechepaꞌch allowen morreñtsoxhno ñeñth Partsokop atthoch saꞌyeꞌchoxhtatoñ attho saxhoteñ. Soksheñeshowenña seyoxhropaꞌ separasyosoꞌchepaꞌch Yompor. 17Amaꞌt esa ñeñth ateth es sephaꞌyen amaꞌt esa ñeñth ateth señosyen, eꞌñechña seyemteñoth Yepartseshar Jesús atthochña sapaꞌ es sephaꞌyes. Ñeñthoꞌmarña sapaꞌ xhokmoepaꞌch separasyosoꞌteñ Yompor Parets eꞌñe Yepartseshar Jesucristo paꞌsoꞌchño.
Atethchaꞌ yokrra añekop ñeñth parro yepaklloꞌtsaꞌyen
18Theꞌpaꞌ oꞌch notas samha ñeñthes arrollarethes: Ñeñth serrollar sepenpaꞌ eꞌñech kowen sameꞌñeña tharroꞌmar ateth poktetsa yokop allowenakpay ñeñthey ameꞌñenaya Yepartseshar Jesucristo. 19Ñamha sa ñeñthes athaporethespaꞌ oꞌch notas samha: Eꞌñech kowen semoerya sethapor, amachña xha moeneꞌ errothwanen sepeñeña sethapor. 20Ñamha sa cheshaneshachaꞌ oꞌch notas samha: Xhokmach sameꞌñya sompor ñamha sachor amachña xha sathpareꞌtatsto. Ñerraꞌm atethchaꞌ sephapaꞌ eꞌñech kowen koshensa amaꞌt Yompor Parets. 21Ñamha oꞌch notas samha ñeñthes achemereshathneshas: Amachña xha saꞌtsrreꞌmareꞌtatatscheña sechemereshaꞌ, theꞌt xha nanak sellkatyenanet. Eꞌñe poellkëñothetpaꞌ xhach atarr kellañtsotyeset, amach eꞌñe kowenayeꞌ ameꞌñenseto. 22Ñamha sapaꞌ oꞌch notas samha ñeñthes atarwasatarethes eꞌñe attha: Xhokmachña eꞌñe kowen sameꞌñyaña ñeñth samoꞌmteꞌ sepen añe patsro. Amachña poekwampeñothesaña semaꞌyoreñ setarwasatsto, ñeñthpaꞌ añekpaña ateth sepena atthoch eꞌñe kowen entenes samoꞌmteꞌ. Eꞌñechña semaꞌyorñekma seyoxhrokmañen eꞌñech kowen setarwasen. Eꞌñechña semhchaꞌnaꞌteñoth Yompor setarwasen eꞌñe kowen. 23Amaꞌt erraꞌtsena ñeñth setarwas sephaꞌyen eꞌñechña seyoxhrokmañen eꞌñe kowen setarwasen. Tharroꞌmar amaꞌt acheñekpa setarwasenpaꞌ eꞌñechña ateth sepena ñerraꞌmrratheꞌ Yamoꞌmtayekop Jesucristokop setarwasen. 24Sapaꞌ eꞌñe señoteñ ñapaꞌ añ oꞌpatatensa ñeñthchaꞌ atarr sokshaterreꞌ tharroꞌmar sapaꞌ poꞌñoxh añ sesherben Cristo ñeñth eꞌñe poꞌñoxh Yamoꞌmteꞌ yepen. 25Tharraña allowen ñeñth ateth phaꞌyeneꞌ ñeñth ama pokteyeꞌ enteno Yompor, ñetñapaꞌ atsaꞌtatarethterretchaꞌ ñeñth allpon phaꞌyesayeꞌth ñeñth ama pokteyaye. Ñeñthoꞌmarña amaꞌt poesheñarrotheta ñokpoetpaꞌ amach eñalleña atthoch pokteꞌ enterranet Yompor.
Currently Selected:
Colosenses 3: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.