AISEA 1
1
Ko Aisea na parofita, 1, sa vunauci ira na Juta e na vuku ni nodra talaidredre, 2,3; ka tagicaka na nodra daucudruvi, 4-9; ka sa vakarota vei ira me ra veivutuni, 10-17, me bokoci kina na nodra i valavala ca, 18-20, ka me ra tiko vinaka; ni na cudruvi ga ko ira sa sega ni veivutuni, 21-31.
1A raivotu i Aisea na luve i Emosi, ka raica ko koya ka sa baleti Juta kei Jerusalemi e na gauna i Usaia, kei Jocame, kei Easi, kei Esekaia, ko iratou na tui Juta.
2Dou rogoca, na lomalagi, ka vakatu daliga, na vuravura, ni sa kaya mai ko Jiova, Ka'u a susuga ka vakalevulevui ira na luvequ, ia ko ira, era sa vuki tani vei au. 3Sa kila na nonai taukei na pulumokau, kei na asa na bai ni nona turaga: ia ko ira na Isireli, era sa sega ni kilai au; ko ira na noqu tamata, era sa sega ni nanumi au.
4Ulei na matanitu ca, ko ira na tamata sa bitaki e na caka cala, na kawa ni valavala ca, na gone dauvakacaca: era sa biuti Jiova, era sa vakacudrui Koya na Yalosavasava i Isireli, era sa vuki tani tale. 5E na cava mo dou yaviti tale kina? dou na vuki tikoga, sa mate taucoko na ulumu, ka sa malumalumu taucoko na lomamu. 6Mai na qeteqete ni yavamu ka cavaraka sara ki na ulumu sa sega kina na tikimu e bula; sa mavoa ga, a sa dabuiloa, a sa bona tikoga: sa sega ni bobo, se viviraki, se lumuti e nai lumu. 7A nomudou vanua sa lala; a nomudou veikoro sa kama e na bukawaqa; ko ira na kai tani era sa kania na nomudou veiwere e na matamudou, a sa lala didi me vaka ni sa dauvukica ko ira na kai tani. 8Ka sa biu tu na goneyalewa ni Saioni me vaka na vale bola e na were-ni-vaini, me vaka nai cili e na loga ni kiukaba, me vaka na koro sa kabai. 9Kevaka sa sega ni lewa ko Jiova ni lewe vuqa me vo tiko e le vica vei keda, eda sa qai vakataki Sotoma, eda sa qai vakataki Komora.
10Dou rogoca na vosa i Jiova, koi kemudou ka daulewai Sotoma; dou vakatu daliga ki na vunau ni noda Kalou, koi kemudou na kai Komora. 11A cava na kena yaga vei au na nomudou i soro e vuqa? sa kaya ko Jiova: Sa rui levu vei au na sipi tagane mei soro kama, kei na uro ni manumanu sa vakani vinaka; ia na dra ni pulumokau, kei na dra ni lami, kei na dra ni me tagane ka'u sa sega ni vinakata. 12Ni dou sa rairai mai e mataqu, ko cei sa taroga vei kemudou oqo mo dou mai butubutuka na noqu lomanibai? 13Dou kakua ni kauta tale mai nai cabocabo wale; nai madrali boi vinaka sa ka vakasisila vei au; na vula vou kei na siga tabu, na kaci mo dou soqoni levu mai: Ka'u sa sega ni vosota rawa nai valavala ca kei nai soqosoqo tabu. 14Ia na nomudou vula vou kei na nomudou so levu tabu sa cata na yaloqu: Au sa bitaki kina; Sa ka ni oca na vosota. 15Ia ni dou sa dodoka mai na ligamudou, Ka'u na tabonaka na mataqu maivei kemudou: io, ni dou sa masu vakavuqa, ka'u na sega ni rogoca: a ligamudou sa lomoci e na dra. 16Dou vui kemudou, vakasavasavataki kemudou; kauta tani e mataqu na nomudou i valavala ca; dou kua ni caka ca; 17vulica na caka vinaka; segata na lewa dodonu, vukei koya sa vakasaurarataki, dou ia na lewa e na vukuna na luveniyali, kei na dautataro e na vuku ni yada.
18Dou mada mai, me tou veivosaki vata, sa kaya ko Jiova; ke sa vaka na ka kulakula na nomudou i valavala ca, sa na vulavula me vaka na uca-vulavula; ke sa damuvakula sa na vaka na vutika ni sipi. 19Kevaka dou vakadinata ka vakarorogo, dou na kania na veta ni vuata. 20Ia kevaka dou sa bese ka sa talaidredre, ena kani kemudou nai seleiwau: ni sa tukuna oqo na gusu i Jiova.
21Na kena vuki me dautagane na koro ka daudina! sa daucaka tiko eliu na lewa dodonu; a ka dodonu ga ka dautiko kina; ia edaidai sa tiko kina na daulaba. 22A nomu siliva sa vuki me de ni kaukamea, na memu waini sa waicala. 23Ko ira na nomu turaga era sa dautalaidredre, a ra sa nodra i tokani na daubutako: era dui dauvinakata nai solisoli, ka daugu me saumi: Era sa sega ni ia na veilewai dodonu, e na vuku ni luveniyali, kei na kena lewa e na vuku ni yada sa sega ni yaco kivei ira.
24O koya sa kaya kina na Turaga, ko Jiova ni lewe vuqa, ko Koya na Kaukauwa i Isireli, Io, ka'u na vakacegui au maivei ira na noqu meca, ka vakayacora na cudru vei ira era cati au: 25Ia ka'u na tarai iko mada, ka sava tani laivi na nomu de ni kaukamea, ka kauta tani kecega na nomu ca: 26Ka'u na lesi ira tale na nomu turaga ni lewa me vaka eliu, kei ira na nomu daubose me vaka e nai vakatekivu: ka oti, ko na qai vakatokai, Na koro daucaka dodonu, na koro daudina. 27Ena vakabulai ko Saioni e na lewa dodonu; kei ira era na lesu tale mai, e nai valavala dodonu. 28Ia na nodra rusa na dautalaidredre kei ira nai valavala ca ena yaco vata ga, ia ko ira era sa biuti Jiova era na vakarusai. 29Ni ra na maduataka na oki dou sa daudomona, dou na taqaya talega e na vuku ni veiwere dou sa digitaka. 30Ni dou na vaka na vu ni oki sa malai na drauna, kei na were sa sega kina na wai. 31Ia ko koya sa kaukauwa ena vaka na wa ni cina, kei na nona cakacaka me vaka na lidi ni buka, a rau na kama vata ruarua, ka sega e dua me na bokoca.
Currently Selected:
AISEA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific