OSEA 1
1
A gauna i Osea na parofita, 1. Sa vakatakarakarataki na nodra ca na Isireli era soro ki na kalou tani, e na dua na yalewa dautagane; ia na Kalou sa vakaroti Osea me kauta me watina, a sa sucu eso na luvena, ka sa vakayacani iratou yadua e na yaca vakaibalebale, 2-9. Sa tini e na vosa ni yalayala, 10,11.
1A vosa i Jiova sa yaco vei Osea na luve i Pieri, e na gauna i Usaia, kei Jocame, kei Easi, kei Esekaia, ko iratou na tui Juta, kei na gauna i Jeropoami na luve i Joasi, na tui Isireli.
2Oqo nai vakatekivu ni vosa i Jiova vei Osea. Sa kaya ko Jiova vei Osea, Mo la'ki kauta e dua na yalewa dautagane me watimu, kei iratou na luve ni butako me luvemu: ni sa dautagane vakalevu na lewe ni vanua, ka ni ra sa vuki tani vei Jiova.
3A sa lako ko koya ka kauti Komera na luve i Tipileimi; a sa kunekune ko koya, ka vakasucuma e dua na luvena tagane. 4A sa kaya vua ko Jiova, Mo vakayacani koya ko Jesirieli; ni sa vo e lailai, ka'u na qai cudruvaka na dra i Jesirieli ki na mataqali i Jeu, ka vakaotia na matanitu ni mataqali i Isireli. 5Ia ena yaco e na siga ko ya, ka'u na musuka na dakai i Isireli e na buca ko Jesirieli.
6A sa kunekune tale ko koya, ka vakasucuma e dua na luvena yalewa. A sa kaya vua ko Koya, Mo vakayacani koya ko Lo-ruama: ni'u na sega ni lomani ira tale na mataqali i Isireli; au na kauti ira laivi sara ga. 7Ia ka'u na lomani ira na mataqali i Juta, ka vakabulai ira e na liga i Jiova na nodra Kalou, ia ka'u na sega ni vakabulai ira e na dakai, se nai seleiwau, se nai valu, se na ose, se vei ira era dauvodo ose.
8Ia ni sa kali Lo-ruama ko koya, sa qai kunekune tale, ka sa vakasucuma e dua na luvena tagane. 9A sa kaya ko Koya, Mo vakayacani koya ko Lo-ami: ni dou sa sega ni noqu tamata, ia koi au ka'u sa sega talega ni nomudou Kalou. 10Ia na kedrai wiliwili na Isireli ena vaka na mata ni nuku ni waitui, sa sega ni vakarauti se wili rawa; ia ena yaco, e na yasana ka kainaki kina vei ira, Dou sa sega ni noqu tamata, ena kainaki kina vei ira, Dou sa luve ni Kalou bula. 11Era na qai soqoni vata na Juta kei na Isireli, ka ra na lesia e dua me liutaki ira, ka ra na lako cake mai na vanua: ni na levu na siga i Jesirieli.
Currently Selected:
OSEA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific