OSEA 2
2
Sa tukuna ko Osea na nodra dauqarava na kalou tani, 1-5. Sa cudruvi ira kina na Kalou, 6-13. A sa vosa tale vakayalololoma vei ira ko koya, 14-23.
1Dou kaya vei ira na tacimu, ko iko Ami; kei ira na tacimu yalewa, ko iko Ruama. 2Dou ia na veilewai kaya na tinamudou, dou ia na veilewai: ni sa sega ni watiqu ko koya, koi au talega, ka'u sa sega ni watina: me biuta laivi ko koya na nona dautagane, kei na nona veibutakoci mai na maliwa ni sucuna; 3de'u vakaluvawaletaki koya, ka vakavotui koya me vaka e na siga ka sucu kina, ka cakava me vaka na veikau, ka soli koya me tautauvata kei na vanua dravuisiga, ka vakamatei koya e na viagunu. 4Ia ka'u na sega ni lomani ira na luvena; ni ra sa luve ni butako. 5Ni sa ia na dautagane ko tinadra: sa ia nai valavala e veivakamaduataki ko koya ka kunekunetaki ira: ni sa kaya ko koya, Au na muri ira na noqu i tau, era solia mai na qau madrai kei na mequ wai, na noqu vutika ni sipi kei na noqu laino, na noqu waiwai kei na mequ ka ni gunu.
6O koya oqo, raica, ka'u na latia kina na nomu sala e na soni, ka viria e dua na bai vatu, me na sega ni kunea rawa ko koya na nonai lakolako. 7Ena cicimuri ira talega ko koya era sa nonai tau, ka sega ni vauci ira; ka na qarai ira ko koya, ka sega ni kunea: ena qai kaya ko koya, Au na la'ki lesu tale vua na watiqu eliu; ni sa vinaka cake vei au na noqu tiko eliu.
8Ia na ka oqo sa lecava ko koya, ni sai au ga ka solia vua na sila kei na waini, kei na waiwai, ia ka'u a vakalevutaka vua na siliva, kei na koula, ia era sa vakayagataka vei Peali. 9O koya oqo ka'u na lesu kina, ka kauta tani na noqu sila e na kena gauna, kei na noqu waini e na kena gauna, ka kauta tani na noqu vutika ni sipi kei na noqu laino sa vuni kina na nona luvawale. 10Ia oqo ka'u na vakaraitaka na nona lialia e matadra na nonai tau, ena sega talega e dua me kaliraki koya mai na ligaqu. 11Ia ka'u na vakaotia kecega na nona marau, kei na nona so levu, kei na nona vula vou, kei na nona siga tabu, kei na nona so levu tabu kecega. 12Au na vakacacana talega na nona veivaini, kei na nona veilolo, sa kaya kina ko koya, Sa qau i soli oqo era solia vei au ko ira na noqu i tau: ia ka'u na cakava ga me veikau; ena kania talega na manumanu ni vanua. 13Au na cudruvaka talega vua na gauna i Peali, ka vakama kina na ka boi vinaka vei ira, ka vakaiukuukutaki koya e na mama ni ucuna kei na nona ka ni ukuuku, ka muri ira na nonai tau, ia sa guilecavi au, sa kaya ko Jiova.
14Ia ka raica, ka'u na rawai koya, ka kauti koya ki na veikau, ka vosavakayalovinaka vua. 15Ia ka'u na volia vua na nona veiwere-ni-vaini emuri, kei na buca ko Akori me vu ni nona vakanananu vinaka: ia ena sere maikea ko koya, me vaka e na gauna sa goneyalewa kina, ka vaka e na gauna ka lako cake mai kina ko koya mai na vanua ko Ijipita.
16Ia sa kaya ko Jiova e na siga ko ya ko na qai vakatokai au ko Isai; ka sega ni vakatokai au tale ko Peali. 17Ni'u na kauta tani na yacadra na Peali mai na gusuna, ena sega talega ni nanumi na yacadra. 18Ia e na siga ko ya ka'u na ia na veiyalayalati e na vukudra, kei na manumanu ni vanua, kei na manumanu vuka, kei na ka sa qasi voli e na qele; ia ka'u na musuka tani mai na vanua na dakai kei nai seleiwau kei nai valu, ka lewa me ra koto sobu e na vakacegu. 19Ia ka'u na tauri iko mo watiqu ka sega ni mudu; io, ka'u na tauri iko mo noqu e na yalododonu, kei na lewa dodonu, kei na yalovinaka, kei na yalololoma. 20Io, ka'u na tauri iko mo noqu e na lomadina: ia ko na kilai Jiova.
21Ia e na siga ko ya, au na rogoca, sa kaya ko Jiova, au na rogo yani ki na mata-ni-lagi, o koya talega ena rogo yani ki na vuravura; 22ko vuravura talega ena rogo yani ki na sila, kei na waiwai, kei na waini; ia na ka talega ko ya ena rogo yani ki Jesirieli. 23Ia ka'u na kaburaki koya e na vanua me noqu; ka'u na lomani koya sa sega ni lomani; au na kaya talega vei ira era sa sega ni noqu tamata, Koi kemudou sa noqu tamata; ka ra na dui kaya mai, Koi kemuni sa noqu Kalou.
Currently Selected:
OSEA 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific