EFESO 1
1
Sa vakavinavinaka vua na Kalou ko Paula e na vukudra na lewe ni lotu mai Efeso, a sa vakatakila na ka era sa kalougata vakalevu sara kina ni ra sa qai vakabauti Jisu, 114. Sa tukuna ni sa masulaki ira tiko, me ra vuku vakalevu sara, ka kalougata vakaidina, 1523.
1Koi au ko Paula, nai apositolo i Jisu Karisito e nai lesilesi ni Kalou, vei ira era sa lotu mai Efeso, ka sa yalodina vei Jisu Karisito: 2Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.
3Me vakarokorokotaki na Kalou, na Tamai koya na noda Turaga ko Jisu Karisito, o koya sa vakalougatataki keda e na ka ni veivakalougatataki vakayalo kecega e na veiyasana vakalomalagi e na vuku i Karisito; 4me vaka sa digitaki keda eliu e na vukuna, sa qai tauyavutaki emuri ko vuravura, me da yalosavasava ka sega ni cala e matana e na loloma; 5ni sa lesi keda eliu me da vakabau me da luvena e na vuku i Jisu Karisito, me vaka na nona lewa vakayalovinaka; 6me dokai kina na kena vinaka ni nona loloma: o koya sa lomani keda kina ko koya e na vukuna na Daulomani: 7o koya eda sa rawata kina na bula sa voli e na nona dra, io, na vakabokoci ni valavala ca, me vaka na nona loloma levu; 8o koya sa vakalevutaka sara vei keda ko koya e na vuku kei na yalomatua kecega; 9ni sa vakatakila vei keda na nona lewa ka vuni tu, me vaka na ka e vinaka vua, ka sa nakita vakai koya ga: 10me yaco kina na ka sa lewa ko koya ni sa oti kecega na gauna sa lokuci me soqona vata na ka kecega vei Karisito, na veika mai lomalagi, kei na veika e vuravura; 11eda sa caka talega kina me nonai votavota, ni da sa lesi eliu me vaka sa nakita ko koya sa cakava na ka kecega me vaka na nona lewa: 12me dokai kina na nona vinaka e na vuku i keitou, oi keitou sa vakararavi taumada vei Karisito: 13koi kemudou talega, ni dou sa rogoca eliu na vosa ni vakavuvuli dina, nai tukutuku-vinaka ni nomudou bula, sai koya ni dou sa vakabauta dou sa dregati kina, e na Yalo Tabu ka yalataki, 14o koya nai matai ni nodai votavota me yaco mada na gauna ena rawa dina kina ko ira na nona sa voli tu, me dokai kina na nona vinaka.
15E na vuku ni ka oqo koi au talega, niu sa rogoca oti na nomudou vakabauta na Turaga ko Jisu, kei na nomudou loloma talega vei ira kecega era sa lotu, 16au sa sega ni mudu ni vakavinavinaka e na vukumudou, niu sa cavuti kemudou tiko e na noqu masu; 17vua na Kalou ni noda Turaga ko Jisu Karisito, a Vu ni ka e vakaiukuukutaki, me solia vei kemudou na yalo ni vuku kei nai vakavuvuli macala, mo dou kilai koya kina: 18ni sa vakararamataki na mata ni yalomudou; mo dou kila kina nai nuinui sa kacivi kemudou kina ko koya, kei na kena levu ni ukuuku sa taukena ko koya vei ira sa lotu, 19kei na kena levu sara ni nona kaukauwa vei keda sa vakabauta, me vaka sa daucaka yaco e na nona kaukauwa vakaidina, 20sa qisi Karisito kina ko koya, ni sa vakaturi koya cake mai na mate, a sa vakatikora e na ligana i matau e na veiyasana vakalomalagi, 21sa uasivi cake sara vei ira kecega sa liu, kei ira era sa lewa, kei ira sa kaukauwa, kei ira era sa turaga, kei na yaca kecega sa cavuti e na gauna oqo kei na gauna emuri: 22a sa vakamalumalumutaka na ka kecega me tu e ruku ni yavana, a sa lesi koya me lewa na ka kecega, e na vuku ni soqosoqo lewe ni lotu, 23o koya na yagona, sa sinai sara vua sa vakasinaita na ka kecega e na ka kecega.
Currently Selected:
EFESO 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific