KALATIA 6
6
Sa vakavulici ira ko koya me ra yalomalua vei ira era sa cala; ka me ra veivuke tiko, 15. Me ra lomasoli, 610. Sa qai cavuti ira tale nai vakavuvuli vakailasu; a sa tukuna na ka sa reki kina ko koya, 1118.
1Oi kemudou na veiwekani, kevaka sa vakidacalataki e dua na tamata mei valavala ca, mo dou vakavinakataki koya e na yalo malumalumu, oi kemudou sa vakayalo; ka mo vakaraici iko, de ko sa dauveretaki talega. 2Dou veivuke ni colata na nomudou i colacola, ka mo dou vakayacora kina na vunau i Karisito. 3Kevaka e dua sa nanumi koya me ka levu, ia sa ka walega, sa qai vakaisini koya vakai koya. 4Ia me lewa deivaka na nona cakacaka na tamata yadua, ena qai rekitaki koya e na vuku i koya ga ka segai e na vukuna na tani: 5ni na colata na nonai colacola na tamata yadua.
6Ia ko koya sa vakatavulici e na Vosa, me solia nai votavota ni ka kecega e vinaka vei koya sa vakatavulica. 7Mo dou kakua ni vakaisini kemudou; a Kalou ena sega ni vakalialiai; na ka kecega sa kaburaka na tamata ena tamusuka talega ko ya. 8Ko koya sa kaburaka na ka ni nonai tovo vakayago, ena tamusuka na rusa mai nai tovo vakayago; ia ko koya sa kaburaka na ka ni Yalo Tabu, ena tamusuka na bula tawa mudu mai na Yalo Tabu. 9Ia me da kakua ni ceguoca e na caka vinaka, ni da na tamusuka e na kena yabaki, kevaka eda sa sega ni oca. 10O koya oqo, ni sa rawa, me da caka vinaka vei ira na tamata kecega, ka vakalevu vei ira era veitokani e na vakabauta.
11Dou raica na mata ni vola lelevu kau sa volavola kina vei kemudou e na ligaqu dina. 12O ira era sa via rairai vinaka vakayago, era sa vakasaurarataki kemudou mo dou cilivi; me ra kakua ga ni vakacacani e na vuku ni kauveilatai nei Karisito. 13Ia ko ira era sa cilivi era sa sega ni talairawarawa ki na vunau; era gadreva ga mo dou cilivi me ra rekitaka na lewemudou. 14Ia koi au, me kakua sara na ka tani meu rekitaka, na kauveilatai ga ni noda Turaga ko Jisu Karisito, o koya sa lauvako kina vei au e na kauveilatai na veika vakavuravura, koi au talega ki na veika vakavuravura. 15Ni sa sega ni yaga me cili, se me sega ni cili, sa yaga ga me tamata yalovou. 16Ia me yaco na vakacegu kei na loloma, kivei ira kecega era sai valavala tiko me vaka nai vakarau oqo, vei ira talega na Isireli ni Kalou.
17Me kakua e dua me vakararawataki au e na gauna emuri: ni sa tu ga e na yagoqu na we ni noqu mavoa e na vuku i Jisu.
18Me tiko kei na yalomudou, na veiwekani, na loloma ni noda Turaga ko Jisu Karisito. Emeni.
Currently Selected:
KALATIA 6: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific