ROMA 7

A tamata sa vakabauti Jisu sa sereki mai na vunau, ka veiwatini kei Jisu, 1-6. Nai valavala ni tamata sa via muria na vunau ni Kalou, a sa kunea ni sa dredre, 7-25.

1Dou sa sega li ni kila, kemudou na veiwekani, (ni'u sa vosa vei ira ga era sa kila na vunau,) ni sa vauca na tamata na vunau e na veisiga ni nona bula? 2Ia na yalewa sa vakawati, sa vauci koya na vunau vua na watina, ni sa bula tiko ko koya; ia kevaka sa mate na watina; sa qai sereki kina na yalewa mai na vunau ni veiwatini. 3O koya ena vakatokai kina me dautagane, kevaka sa laki vakawati kei na dua na tagane tani, ni sa bula tiko na watina: ia kevaka sa mate na watina, sa qai sereki ga mai na vunau ko ya; ka na sega kina ni dautagane, kevaka ena laki vakawati kei na dua na tagane tani. 4Dou sa vakakina, na veiwekani ni dou sa qai sereki mai na vunau e na vuku ni yago i Karisito; me dua tani mo dou veiwatini kaya, io ko koya sa vakaturi cake tale mai na mate me da vua kina vua na Kalou. 5Ni da sa tiko vakayago ga, sa dautubu vakaukauwa e na veitikida na gagadre ca, sa tubu mai na vunau, me vuataki kina na mate. 6Ia eda sa qai sereki mai na vunau, ni da sa qai mate ki na ka sa vauci keda; me da ia na veiqaravi e nai tovo vou ni yalo, ka segai e nai tovo makawa ni vunau.

7A cava me da qai kaya? Sa ca li na vunau? E segai sara. Au a sega dina ni kila se cava nai valavala ca, ke'u sega ni kila na vunau: ni'u sa sega ni kila se cava na daukocokoco, kevaka sa sega ni kaya na vunau, Kakua ni kocokoco. 8Ia na ca, ni sa kaukauwa e na vuku ni vunau, sa vakatubura e lomaqu na gagadre ca kecega. Ni sa mate na ca ni sa sega na vunau. 9Ia ka'u a bula ga eliu ni sa sega na vunau; ia ni sa lako mai na vosa ni vunau, sa bula tale na ca, ka'u sa qai mate kina. 10Ia na vosa ni vunau, o koya sa yaco rawa kina na bula, ka'u sa kunea sa yaco kina na mate. 11Ni sa kaukauwa na ca, e na vuku ni vosa ni vunau, a sa temaki au kina, ka vakamatei au. 12Ia sa savasava na vunau, sa savasava talega nai vakaro, sa dodonu talega, ka vinaka.

13Sa qai yaco beka na ka vinaka me ka me'u mate kina? E segai sara. A ca ga, me rairai kina ni sa ca, sa taura na ka vinaka me kitaki au kina me'u mate; me rairai kina na ca me ca dina sara e na vuku ni vosa ni vunau. 14Ni da sa kila sa ka vakayalo na vunau: ia koi au, au sa vakayago walega, ka'u sa volitaki ki na ca. 15A ka ka'u sa kitaka tiko, au sa sega ni vinakata: ia na ka ka'u sa vinakata, au sa sega ni kitaka; ia na ka ka'u sa cata, au sa kitaka tiko. 16Ia kevaka ka'u sa kitaka na ka ka'u sa sega ni vinakata, au sa kaya kina ni sa vinaka na vunau. 17A sa sega ni koi au dina sa kitaka, a ca ga sa tiko vei au. 18Ni'u sa kila sa sega sara ni tiko vei au e na noqu i tovo vakayago e dua na ka vinaka; ni sa tiko ga vei au na vinakata na ka vinaka; ia na kaukauwa me'u kitaka kina, ka'u sa sega ni kunea. 19Ia na ka vinaka ka'u sa vinakata, au sa sega ni kitaka; ia na ka ca ka'u sa sega ni vinakata, au sa kitaka ga. 20Ia kevaka ka'u sa kitaka na ka ka'u sa sega ni vinakata, sa qai sega ni koi au dina ka kitaka, na ca ga sa tiko vei au. 21Ia ka'u sa kunea kina e dua na vunau, sa tiko kina vei au na ca ni'u sa via kitaka na vinaka. 22Ni'u sa vinakata na vunau ni Kalou e na lomaqu dina: 23ia ka'u sa kunea e dua tani na vunau e na veitikiqu, a rau sa veivala kei na vunau sa tu e na lomaqu, a sa vakabobulataki au ki na vunau ni ca, o koya sa tiko e na veitikiqu. 24A tamata vakaloloma koi au! o cei ena sereki au mai na yago ni mate oqo? 25Au sa vakavinavinaka vua na Kalou e na vuku ni noda Turaga ko Jisu Karisito. Ia sa qai vakaoqo, au sa qarava na vunau ni Kalou e na lomaqu dina, ia na vunau ni valavala ca e na noqu i tovo vakayago.

Currently Selected:

ROMA 7: FOV

Highlight

Copy