ROMA 10

Sa tukuna ko koya ni sa biuti ira na Jiu na Kalou ni ra sa sega ni vakabauti Jisu; ia na tamata kece sa vakabauti koya dina, era sa veivinakati kina kei na Kalou, 1-21.

1O kemudou na veiwekani, au sa gadreva e na vu ni yaloqu, au sa masu talega vua na Kalou e na vukudra na Isireli, me ra bula. 2Ni'u sa tukuni ira ni ra sa lomakatakata vua na Kalou, ia era sa sega ni yalomatua. 3Ni ra sa sega ni kila na veivakadonui sa vu mai vua na Kalou, a ra sa qara me dua na veivakadonui vakataki ira, a ra sa sega kina ni vakamalumalumutaki ira me ra vakadonui mai vua na Kalou. 4Ni sa vakayacora na Karisito na ka sa nakiti e na vunau, me vakadonui ko ira kece era sa vakabauta.

5Ni sa tukuna ko Mosese na veivakadonui sa yaco e na vuku ni vunau, Na tamata sa cakava, ena bula kina. 6Ia na veivakadonui sa yaco e na vakabauta sa tukuna vakaoqo, Mo kakua ni vosa e na yalomu, O cei me lako cake ki lomalagi? [ka me kauti Karisito sobu mai:] 7se vaka ne, O cei me lako sobu ki na Yasana-vuni? [ka me kauti Karisito cake mai na mate.] 8Ia ka cava e kaya? Sa voleka vei iko na vosa, io e na gusumu, kei na yalomu: a vosa ni vakabauta, o koya keitou sa vunautaka. 9Kevaka ko na vakatusa e na gusumu na Turaga ko Jisu, ka vakadinata e na vu ni yalomu ni sa vakaturi koya cake tale mai na mate na Kalou, ko na bula. 10Ni sa vakadinata na tamata e na vu ni yalona me sa vakadonui kina, ia na gusuna sa vakatusa kina me bula. 11Ni sa kaya nai Vola Tabu, O koya yadua sa vakabauti koya ena sega ni vakamaduataki.

12Ni sa tautauvata na Jiu kei koya sa matanitu tani: ni sa dua bauga na Turaga vei ira kecega, o koya sa vutu ni ka vinaka vei ira kecega era sa masuti koya. 13Ni na bula ko ira vakaaduaga era sa masuta na yaca i Jiova.

14Era na qai masu vakacava vua era sa sega ni vakabauta? a ra na vakabauti koya vakacava era sa sega ni rogoca kina? a ra na rogoca vakacava, kevaka e sega e dua me tukuna? 15Ia era na tukuna vakacava, kevaka era sa sega ni talai? me vaka na ka sa volai, Sa lagilagi sara na yavadra era sa tukuna nai tukutuku-vinaka ni veika vinaka! 16A ra sa sega ni vakabauta kecega nai tukutuku-vinaka; ni sa kaya ko Aisea. I Jiova, ko cei sa vakabauta na neitou i tukutuku? 17Eda sa kila kina ni sa rawa na vakabauta e na vakarorogo, kei na vakarorogo e na vosa i Karisito. 18Ia ka'u sa taroga, Era sa sega li ni rogoca? E dina sa vakakina, Sa lako na kedrai rogorogo ki vuravura taucoko, Kei na nodra vosa ki nai yalayala kei vuravura. 19Ia ka'u sa taroga, Sa sega beka ni kila ko ira na Isireli? Sa tukuna eliu ko Mosese, Au na vakavuvutaki kemudou e na vukudra era sega ni noqu tamata: Au na vakacudrui kemudou e na matanitu sesewa. 20A sa doudou sara ko Aisea, ka sa tukuna, Era sa kunei au ko ira era a sega ni qarai au: Au sa vakarairaitaki vei ira era a sega ni tarogi au. 21Ia ka sa kaya vei ira na Isireli, E na veisiga kecega ka'u sa dodoka yani na ligaqu kivei ira na tamata dautalaidredre ka dauvakatitiqa.

Currently Selected:

ROMA 10: FOV

Highlight

Copy