NA SAME 89
89
Sa dina na Kalou ni sa yalayala, 1-4. Sa kaukauwa, 5-14. Sa nanuma na ka e yalataka, 15-37. Ka sa qai nanumi me dua tani beka mai, ni sa biuti ira, 38-52.
A Masikili i Icani na Eseraaiti.
1Au na seretaka na yalololoma i Jiova ka sega ni mudu:
Na gusuqu ena tukuna na nomuni yalodina ki nai tabatamata kecega.
2Ni'u a kaya, Ena tara cake na loloma me sega ni mudu:
O ni na vakataudeitaka na nomuni vosa dina me vaka na lomalagi:
3Au sa ia oti na veiyalayalati kei koya ka'u a digitaka,
Au sa bubului vei Tevita na noqu tamata,
4Au na vakataudeitaka me sega ni mudu rawa na nomu kawa,
Au na tara cake na nomu i tikotiko me yacova nai tabatamata kecega. Sela.
5Ia na lomalagi ena vakavinavinaka e na vuku ni nomuni ka mana Jiova:
Kei ira nai soqosoqo tamata yalosavasava e na vuku ni nomuni vosa dina.
6Ia ko cei mai lomalagi me vakatauvatani kei Jiova?
O cei vei ira na luve ni qaqa me tautauvata kei Jiova?
7Sa rerevaki vakalevu na Kalou e na nodra i soqosoqo na yalododonu,
Me vakarokorokotaki talega vei ira kecega era sa tiko vakavolivoliti koya
8I Jiova na Kalou ni lewe vuqa,
O cei sa kaukauwa me vakataki kemuni, Jiova? Se vaka na nomuni yalodina sa vakavolivoliti kemuni?
9O ni sa lewa na cudru ni wasawasa:
Ni sa tubu na kena biau, o ni sa vakamaravutaka.
10O ni a vorolaki Reapi, me vaka e dua sa vakamatei,
O ni a vakasavi ira na nomuni meca e na ligamuni kaukauwa.
11Sa nomuni na lomalagi, sa nomuni talega ko vuravura:
O vuravura kei na ka kecega sa tiko kina, ko ni a tauyavutaka.
12Na tokalau kei na ceva ko ni a cakava:
O Tepori kei Erimoni ena rekitaka na yacamuni.
13Sa kaukauwa sara na ligamuni:
Sa kaukauwa na ligamuni, Sa cecere na ligamuni matau.
14Ai tutu ni nomuni tikotiko vakaturaga na yalododonu kei na lewa dodonu:
Ena liu ga e matamuni na loloma kei na yalodina.
15Sa kalougata na tamata era kila na rorogo vinaka:
Era na lako voli, Jiova, e na rarama ni matamuni.
16Era na rekitaka na yacamuni e na veisiga:
Era na vakaceceretaki talega e na nomuni cakacaka dodonu.
17Ni kemuni sai ukuuku ni nodra kaukauwa:
Ena vue talega na neimami totoka e na nomuni yalovinaka.
18Ni sa nei Jiova na nodai sasabai;
Ka sa nei Koya na Yalosavasava ni Isireli na noda tui.
19O ni a qai vosa e na raivotu vua na nomuni parofita yalododonu,
Ka kaya, Au sa solia na kaukauwa vua sa qaqa;
Au sa vakaceceretaka e dua sa digitaki maivei ira na tamata.
20Au a kunei Tevita na noqu tamata;
Au sa lumuti koya e na noqu waiwai tabu:
21Ena tiko dei vua na ligaqu:
E tabaqu talega ena vakaukauwataki koya.
22Ena sega ni vakasaurarataki koya rawa na meca;
Ka na sega ni vakamalumalumutaki koya rawa na luve ni caka ca.
23Au na mokuti ira sobu e matana na nona meca,
Ka yaviti ira era cati koya.
24Ia ena tiko kaya na noqu yalodina kei na noqu loloma:
E na vuku ni yacaqu talega ena vue na nona totoka.
25Au na vakayacora talega na ligana ki na waitui,
Kei na ligana i matau ki na veiuciwai.
26Ena kacivaka vei au ko koya, Oi kemuni na tamaqu,
Na noqu Kalou, kei na uluvatu ka'u sa vakabulai kina.
27Au na lesi koya talega me noqu ulumatua,
Me cecere cake vei ira na tui kei vuravura.
28Au na vakabauta tiko na noqu loloma vua ka sega ni mudu,
Ena tu dei talega kaya na noqu veiyalayalati.
29Au na vakataudeitaka na nona kawa me sega ni mudu,
Ena vaka talega na gauna ni lomalagi na nonai tikotiko vakaturaga.
30Kevaka era biuta na noqu vunau ko ira na luvena,
Ka sega ni muria na noqu lewa;
31Kevaka era vakacacana na noqu i lesilesi,
Ka sega ni vakabauta na noqu i vakaro;
32Ka'u na qai sauma na nodra bese e nai waro,
Kei na nodra i valavala ca e na kuita
33Ia ka'u na sega ni kauta laivi mai vua na noqu loloma,
Se lasutaka na noqu vosa dina.
34Au na sega ni vakacacana na noqu veiyalayalati,
Se vakatanitaka na vosa sa cavuta na tebenigusuqu.
35Au sa bubului vakadua e na noqu yalododonu
Me'u kakua ni lasu vei Tevita.
36Ena sega sara ni mudu na nona kawa,
Ena vaka na mata-ni-siga e mataqu na nonai tikotiko vakaturaga.
37Ena vakataudeitaki me vaka na vula ka me sega ni mudu,
Ka vaka nai vakadinadina levu mai lomalagi. Sela.
38Ia ko ni sa biuta ka vakasisilataka,
Ko ni sa cudru vua ko ni a lumuta.
39O ni sa vakatawayagataka na nomuni veiyalayalati kaya na nomuni tamata:
O ni sa cakava me ka wale na nonai sala vakaturaga ni kemuni sa biuta ki na soso.
40O ni sa basuraka kecega na nona bai;
O ni sa vakarusa sara na nona bai ni valu kaukauwa.
41Sa betiraki koya ko ira kece sa lako voli e na sala:
Sa rogo ca vei ira era tiko voleka vua.
42O ni sa vakaukauwataka na ligadra i matau era sa vakararawataki koya;
O ni sa vakamarautaki ira na nona meca kecega.
43O ni sa vakatawayagataka na bati ni nonai seleiwau,
Ka sega ni vukei koya me tu rawa e nai valu.
44O ni sa vakaotia na nonai ukuuku,
Ka biuta ki na soso na nonai tikotiko vakaturaga.
45O ni sa vakalekalekataka na gauna ni nona cauravou:
O ni sa vakaisulutaki koya e na madua. Sela.
46A cava na kena dede, Kemuni Jiova? ena sega beka ni mudu na nomuni vunitaki kemuni?
Ena waqa beka me vaka na bukawaqa na nomuni cudru?
47Mo ni nanuma na kena lekaleka ni noqu bula:
A cava ko ni a bulia kina na luve ni tamata kecega me ra ka walega?
48O cei na tamata sa bula tiko ka na sega ni kunea na mate?
Ena vakabulai koya li mai na liga ni bulubulu? Sela.
49Kemuni na Turaga sa evei na nomuni yalololoma eliu,
O ni a bubului kina vei Tevita e na nomuni yalodina?
50Kemuni na Turaga, mo ni nanuma na kedrai rogo ca na nomuni tamata;
Au sa colata voli e lomaqu na nodra vosa ca na veimatanitu kecega e vuqa;
51Era sa vosa ca kina, Jiova, ko ira na nomuni meca;
Era sa vosacataka kina na nonai lakolako ko ni a lumuta.
52Me vakarokorokotaki ko Jiova ka sega ni mudu.
Emeni, Emeni.
Currently Selected:
NA SAME 89: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
