NA SAME 56
56
Sa tagi vua na Kalou ko Tevita e na vuku ni nona meca, 1-8. Ka sa qai vakacegu ni sa nanuma na vosa ni Kalou, ka sa sega ni rere, 9-13.
Vua na Domo-ni-sere e na Jonace-elemireokimi. A Same i Tevita, ni ra sa tauri koya na kai Filisitia mai Kaca.
1Mo ni lomani au mai, na Kalou; ni ra sa sagai au vakaca na tamata;
O koya sai valu mai vei au, sa vakararawataki au e na veisiga.
2Era sa via tilomi au e na veisiga na noqu meca:
Ni ra sa lewe vuqa era veivala kei au, oi kemuni sa Cecere.
3A siga ka'u sa rere kina,
Ka'u na vakararavi kina vei kemuni.
4E na vuku ni Kalou ka'u na reki e na nona vosa,
Au sa vakararavi tiko vua na Kalou;
Au na sega ni rerevaka na ka era cakava rawa vei au na tamata.
5E na veisiga kecega era kauta vakatani na noqu vosa;
A ka kecega era sa nanuma sa ka ga me'u ca kina.
6Era sa soqoni vata, era vunitaki ira,
Era vakaraica na noqu i lakolako,
Ni ra lawakitaka tiko na yaloqu.
7Me ra dro bula li e na vuku ni nodra caka cala?
E na nomuni cudru, na Kalou, mo ni biuti ira sobu na tamata.
8O ni sa wilika na noqu veiseyaki:
Mo ni vakataloca na wai ni mataqu ki na nomuni tavaya: Sa sega beka ni volai oti e na nomuni vola?
9Ni'u sa tagi vei kemuni era na qai dro tani na noqu meca:
Ka'u sa kila oqo: ni sa totaki au na Kalou.
10E na vuku ni Kalou ka'u na reki e na nona vosa:
E na vuku i Jiova ka'u na reki e na nona vosa.
11Au sa vakararavi vua na Kalou:
Au na sega ni rerevaka na ka era cakava rawa vei au na tamata.
12Sa vauci au na noqu bubului vei kemuni na noqu Kalou:
Me'u vakavinavinaka vei kemuni.
13Ko ni sa vakabula oti na yaloqu mai na mate:
Kei na yavaqu talega, me kakua ni tarabe,
Me'u lako voli kina e na mata ni Kalou
E na rarama ni bula?
Currently Selected:
NA SAME 56: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
