NA SAME 50
50
Sa daurerevaki na Kalou, ena sega ni yaga vua nai valavala ni lotu vakailasu; sa vinakata ga nai valavala dina.
A Same i Esafa.
1O koya sa Kaukauwa, na Kalou, io, ko Jiova, sa vosa oti,
A sa kacivi vuravura mai na yasana sa cadra kina na mata-ni-siga ka yacova na yasana sa dromu kina.
2Mai Saioni, na koro lagilagi duaduaga,
Sa serau mai na Kalou.
3Ena lako mai na noda Kalou, ena sega ni galu:
Ena liutaki koya e dua na bukawaqa sa daukana voli,
Ia sa na vakavolivoliti koya e dua na cava rerevaki.
4Ena kacivi lomalagi maicake ko koya,
Kei vuravura talega, me lewai ira na nona tamata ko koya,
5Dou vakasoqoni ira vata kivei au na noqu tamata yalosavasava;
O ira era sa ia na veiyalayalati kei au ni ra vakacabora nai soro.
6Ia na lomalagi ena tukuna na nonai valavala dodonu:
Ni sa lewa na Kalou vakataki koya ga. Sela.
7Dou rogoca, na noqu tamata, ni ka'u na vosa;
Ko iko na Isireli, ka'u na tukuna na nomu cala:
Oi au ga na Kalou, na nomu Kalou.
8Au na sega ni vunauci iko e na vuku ni nomu i soro,
Se na nomu i soro kama ka tu tiko ga e mataqu.
9Au na sega ni taura e dua na pulumokau mai na nomu vale,
Se na me tagane mai na nomu bai ni me:
10Ni sa noqu ga na pulumokau kila kecega mai na veikau,
Kei na pulumokau lasa mai na veiulu-ni-vanua e udolu.
11Au sa kila yadua na manumanu vuka mai na veiulu-ni-vanua:
Ka sa noqu na manumanu kila kecega ni vanua.
12Kevaka ka'u sa viakana, ka'u na sega ni tukuna vei iko:
Ni sa noqu ko vuravura, kei na ka kecega sa sinai kina.
13Au na kania li na lewe ni pulumokau tagane,
Se gunuva na dra ni me?
14Mo vakacabora vua na Kalou na vakamolimoli;
Ka vakayacora na ka ko a bubului kina vei Koya sa Cecere sara:
15Mo masuti au talega e na siga ni rarawa:
Ka'u na vakabulai iko, ia ko na vakacaucautaki au.
16Ia vei ira nai valavala ca, sa kaya na Kalou,
A cava soti ko sa tukuna kina na noqu vunau,
Ka sa cavuta talega e gusumu na noqu veiyalayalati?
17Ni ko sa cata tiko nai vakavuvuli,
Ka sa biuta ki dakumu na noqu vosa.
18Ni ko a kunea na daubutako, ko a qai lomavata kaya,
Ka sa votai vata kei ira na dauyalewa.
19O sa solia na gusumu ki na ka ca,
Ka sa tulia na ka lasu na yamemu.
20O sa tiko ga ka vosacataki koya na tacimu;
Ko sa kaseti koya na luve i tinamu.
21A ka oqo ko a kitaka, ia ka'u a galu ga;
Ko a qai nanumi au me'u vakataki iko ga:
Ia ka'u na vunauci iko, ka tuva e matamu na nomu i valavala ca oqo.
22Dou nanuma mada na ka oqo, oi kemudou sa guilecava na
Kalou.
De'u sa basuraki kemudou, ka sega e dua me vakabulai kemudou.
23O koya sa vakacabora na vakavinavinaka sa vakacaucautaki au:
Ia ko koya sa lewa vakavinaka na nonai valavala
Ka'u na vakaraitaka vua na bula sa mai vua na Kalou.
Currently Selected:
NA SAME 50: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
