NA SAME 38
38
Sa vakatusa na nona ca na tamata sa kila dina na yalona.
A Same i Tevita, me vakananuma kina na ka.
1I Jiova, kakua ni vunauci au e na nomuni cudru:
Se cudruvi au e na nomuni cudru waqawaqa.
2Ni sa coba sara ki lomaqu na nomuni gasau,
Ka sa bibi vei au na ligamuni.
3Sa sega na tiki ni yagoqu sa bula e na vuku ni nomuni cudru;
Sa sega ni vakacegu na suiqu e na vuku ni noqu i valavala ca.
4Ni sa uasivia cake na uluqu na noqu caka ca:
Me vaka nai colacola bibi ka'u sa sega ni colata rawa.
5Sa bona ka vakanana na noqu vidikoso
E na vuku ni noqu lialia.
6Au sa rarawa sara; au sa vakalairoro vakalevu;
Au sa tagi lako e na siga ka bogi mai.
7Ni sa robota na toloqu na mate vakasisila:
Ka sa sega na tiki ni yagoqu sa bula.
8Au sa malumalumu ka musulaki sara:
Au a vutugu ni sa daurarawa na yaloqu.
9I Jiova, sa tu e matamuni na ka kecega ka'u sa gadreva;
Ka sa sega ni vuni vei kemuni na noqu vutuqu.
10Sa ceguoca na lomaqu, sa yali tani na noqu kaukauwa:
Na rai ni mataqu talega, sa takali vei au.
11A noqu i tau kei na wekaqu era la'ki tu tani mai na noqu mate ca;
Ia na kai noqu era sa tu vakayawa.
12A ra sa birika nai cori ko ira sa qarai au me'u mate.
Ia ko ira talega era sa segata me'u ca era vosavakacacataki au,
Ka ra vakananuma ki na ka lasu e na tiki ni siga kecega.
13Ia koi au, ka'u sa vaka na didivara, ka'u sega ni rogoca;
Ka vaka na galu sa sega ni dalaga.
14Ia ka'u sa vaka e dua sa sega ni rogoca rawa,
Ka sa sega e na gusuna na veivunauci.
15Ni'u sa nuitaki kemuni ga, Jiova:
O ni na rogoci au, na Turaga na noqu Kalou.
16Ni'u sa kaya, De ra rekitaki au:
Ia ni sa tidara na yavaqu, era sa vakalevulevui ira vei au.
17Ni'u sa voleka ni tu vakadua,
A sa tu vakadua e mataqu na noqu rarawa.
18Ni'u na vakatusa na noqu i valavala ca;
Ka'u na rarawa e na vuku ni noqu caka cala.
19Ni ra sa tamata bula na noqu meca, ka ra sa kaukauwa:
Ia ko ira era cati au ni sega na vuna era le vuqa mai.
20O ira talega era kitaka na ka ca mei sau ni ka vinaka
Era noqu meca; ni ka'u sa muria na ka vinaka.
21I Jiova, Kakua ni biuti au,
Kemuni na noqu Kalou, kakua ni vakayawa vei au.
22Mo ni kusarawa mo ni vukei au mai,
Kemuni na Turaga na noqu i Vakabula.
Currently Selected:
NA SAME 38: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
