NA SAME 35
35
Sa masulaki koya ko Tevita, ni sa levu na nona meca.
A Same i Tevita.
1I Jiova, mo ni veileti kei ira era sa veileti kei au;
Ni veivala kei ira era sa veivala kei au.
2Mo ni taura nai sasabai kei nai vakaruru,
Ka tu cake mo ni vukei au.
3Mo ni cavuta talega na moto, ka vakalatia na nodra sala era sa vakacacani au:
Mo ni kaya mai ki na yaloqu, Oi au na nomu i vakabula.
4Me ra vakidroataki ka vakamaduataki era sa saga na yaloqu;
Me ra vakasukai ki muri ka vakataqayataki era bosea na ka me'u ca kina.
5Me ra vaka na qa-ni-sila sa cagina,
Me vakasavi ira talega na agilose i Jiova.
6Me butobuto ka tidara na nodra sala,
Me vakasavi ira talega na agilose i Jiova.
7Ni sa sega na vuna ni ra vunia na nodra lawa e nai keli me rawai au;
Era kelia me'u mate kina ka sega na vuna.
8Me yaco vakidacala vua na rusa;
Ia me rawai koya ga na nona lawa sa vunia ko koya;
Me lutu ga ko koya ki na veivakarusai dina ko ya.
9Ia na yaloqu, ena rekitaki Jiova;
Ena reki ga ni sa vakabulai au ko koya.
10Ena kaya talega na suiqu kecega, O cei sa vakataki kemuni,
Jiova,
Ni kemuni sa vakabulai koya sa dravudravua mai vua sa rui kaukauwa vua,
Io, na dravudravua kei na luveniyali mai vua sa vakacacani koya?
11Era sa tu cake mai na dauveibeitaki vakailasu;
Era sa beitaka vei au na ka ka'u sa sega ni kila.
12Era sa kitaka vei au na ka ca mei sau ni ka vinaka,
Ka sa ca kina na yaloqu.
13Ia koi au, ni ra sa tauvi mate, ka'u sa vakaisulu e nai sulu taga:
Ka'u sa vakamalumalumutaki au e na lolo;
Ka sa suka tale ki na lomaserequ na noqu masu.
14Au ai valavala vua me vaka vua na wekaqu se na taciqu;
Ka'u a lako roko ni'u sa bibi, me vaka e dua sa tagicaka na tinana.
15Ia ko ira, ni'u sa gera era sa reki, ka ra soqoni vata;
Ko ira na kaisi kei ira au sega ni kilai ira era sa soqoni vata vakaca vei au, Era sa basuraki au ka sega ni cegu:
16O ira vata kei na dauveivakaisini era dauveivakasewasewani e na magiti,
Era sa vakasequruquru vei au.
17I Jiova, e vica vata na siga kemuni na vakaraica walega?
Ni vakabula na yaloqu mai na nodra veivakarusai,
Na noqu ka talei duaduaga maivei ira na luve ni laioni.
18Au na vakamolimoli vei kemuni e nai soqosoqo levu;
Ka'u na vakavinavinaka vei kemuni e na kedra maliwa na lewe vuqa.
19Me ra kakua ni reki e na vukuqu ko ira na noqu meca ni sa sega na vuna;
Me ra kakua talega ni katariva ko ira era cati au walega.
20Ni ra sa sega ni vosataka na vosa ni vakacegu;
Ia kivei ira era tiko vinaka e na vanua, era veinanuyaka ga na ka ni dauveivakaisini;
21A ra sa dalaga vakalevu vei au,
A ra sa kaya, Sai koya! Sai koya! sa qai kunea na matada!
22O ni sa kunea talega, Jiova, mo ni kakua ni galu tiko;
Noqu turaga, ni kakua ni yawa vei au.
23Mo ni yavala mai, ka yadra mo ni lewai au,
Io mo ni totaki au mai, noqu Kalou kei na noqu Turaga.
24Mo ni lewai au, Jiova na noqu Kalou, me vaka na nomuni yalododonu;
Ia mo ni kakua ni laivi ira me ra rekitaki au.
25Me ra kakua ni kaya e lomadra,
Sai koya! sa loma i keitou oqo!
Me ra kakua ni kaya, Keitou sa tilomi koya sara!
26Me ra madua ka kidroa vata era sa rekitaka na noqu vakacacani;
Me ra vakaisulu e na veivakamaduataki kei na veivakarogocataki ko ira era sa vakalevulevui ira vei au.
27Me ra kaikaila e na marau, ka reki, ko ira era sa vinakata me'u vakadonui;
Io, me ra kaya tikoga, Me vakacaucautaki ko Jiova,
O koya sa vinakata me ra tiko vinaka na nona tamata.
28Ia na yamequ ena tukuna na nomuni lewa dodonu
Kei na nomuni vakavinavinaka e na veisiga kece ka bogi.
Currently Selected:
NA SAME 35: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
