NA SAME 146
146
Me ia na vakavinavinaka vei Jiova.
1Dou ia vei Jiova na vakavinavinaka.
Mo vakavinavinaka vei Jiova, na yaloqu.
2Ni'u sa bula tiko ka'u na vakavinavinaka vei Jiova;
Ka'u na sere vua na noqu Kalou e na gauna kecega ka'u sa bula kina.
3Dou kakua ni vakararavi vei ira na turaga,
Se vua na luve ni tamata, ni sa sega vua na ka mo dou bula kina.
4Sa lako tani na nonai cegu, a sa suka ko koya ki na kena qele;
E na siga dina ko ya sa oti na ka e vakanananu kina.
5Sa kalougata ko koya sa nonai vukevuke na Kalou i Jekope,
O koya sa nuinui tiko vua na nona Kalou ko Jiova:
6O koya ka bulia na lomalagi, kei vuravura,
Na wasawasa, kei na ka kecega sa tu kina;
O koya sa dinadina tikoga na nona vosa ka sega ni mudu:
7O koya sa lewa vakadodonu e na vukudra era sa vakasaurarataki:
O koya sa vakani ira era sa viakana.
Sa sereki ira era sa vesuki ko Jiova.
8Sa basuka na matadra na mataboko ko Jiova:
Sa vakatudonutaki ira era sa vakalairoro ko Jiova:
Sa lomani ira na yalododonu ko Jiova:
9Sa maroroi ira na vulagi ko Jiova;
Sa vakabulai ira tiko era sega ni vakatamani kei na yada:
Ia na nodra i valavala na tamata ca sa vukica sara.
10Ena lewa tiko ko Jiova ka sega ni mudu,
Io na nomu Kalou, ko iko Saioni, e nai tabatamata kecega.
Dou ia vei Jiova na vakavinavinaka.
Currently Selected:
NA SAME 146: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
