NA SAME 118
118
Me ia na vakavinavinaka vua na Kalou e na vuku ni nona loloma, 1-4. A ka vinaka na vakararavi vei Jiova, 5-18. Sa tukuni na nona lako mai ko Jisu, kei na nona matanitu, 19-29.
1Dou vakavinavinaka vei Jiova; ni sa yalovinaka:
Ni sa sega ni mudu na nona loloma.
2Me kaya ga ko ira na Isireli,
Ni sa sega ni mudu na nona loloma.
3Me kaya ga na kawa i Eroni,
Ni sa sega ni mudu na nona loloma.
4Me ra kaya ko ira era rerevaki Jiova,
Ni sa sega ni mudu na nona loloma.
5Au a masuti Jiova ni ka'u a rarawa:
A sa rogoci au ko Jiova, ka sa vakalalagataki au.
6Sa totaki au ko Jiova; ka'u na sega ni rere:
A cava beka me ra kitaka vei au ko ira na tamata?
7Sa totaki au ko Jiova kei ira era vukei au:
O koya ka'u na raica ni ra ca ko ira era sa cati au.
8Sa vinaka na vakararavi vei Jiova
Ka ca na vakararavi vei ira na tamata.
9Sa vinaka na vakararavi vei Jiova
Ka ca na vakararavi vei ira na turaga.
10Era vakavolivoliti au na lewe ni veivanua:
Ia e na yaca i Jiova ka'u na vakarusai ira.
11Era vakavolivoliti au; io era sa voliti au:
Ia e na yaca i Jiova ka'u na vakarusai ira.
12Era sa vakavolivoliti au me vaka na qele ni pi; era sa bokoci me vaka na bukawaqa dolou:
Ia e na yaca i Jiova ka'u na vakarusai ira.
13O sa biliraki au vakaukauwa me'u bale kina:
Ia sa vukei au ko Jiova.
14Sa noqu kaukauwa kei na vu ni noqu sere ko Jiova,
Ka sa yaco me noqu i vakabula.
15A domo ni reki kei na veivakabulai sa tiko e nodra veivale na yalododonu:
Sa gumatua na liga i matau i Jiova.
16A liga i matau i Jiova sa cecere:
A liga i matau i Jiova sa gumatua.
17Au na sega ni mate, au na bula ga,
Ka tukuna tiko na cakacaka i Jiova.
18Sa vakanakuitataki au vakalevu ko Jiova:
Ia sa sega ni laivi au me'u mate.
19Dou dolava vei au na matamata-ni-koro ni yalododonu:
Au na curu kina, ka ia na vakavinavinaka vei Jiova:
20Oqo na matamata-ni-koro i Jiova,
Era na daucuru kina na yalododonu.
21Au na vakavinavinaka vei kemuni ni kemuni a vakarorogo vei au,
Ka sa yaco me noqu i vakabula.
22A vatu era sa cata ko ira na matai ni vale
Sa yaco me kenai vakadei e na tutu ni vale.
23Oqo na cakacaka i Jiova:
A sa ka e veivakurabuitaki e na matada.
24Oqo na siga sa lesia ko Jiova;
Eda na reki ka marau kina.
25Au masuti kemuni Jiova, mo ni ia sara na veivakabulai:
Au masuti kemuni Jiova, mo ni ia sara na veivakalougatataki.
26Sa kalougata ko koya sa lako mai e na yaca i Jiova:
Keimami sa vakalougatataki kemudou mai na vale i Jiova.
27Sa Kalou ko Jiova, o koya sa vakararamataki keda:
Dou vauca nai soro e na dali ki na tutuna balavu cake ni cabocabo-ni-soro.
28Kemuni na noqu Kalou, ka'u na vakavinavinaka vei kemuni,
Oi kemuni na noqu Kalou, ka'u na vakacaucautaki kemuni.
29Dou ia na vakavinavinaka vei Jiova; ni sa yalovinaka:
Ni sa sega ni mudu na nona loloma.
Currently Selected:
NA SAME 118: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
