NA VOSA VAKAIBALEBALE 25
25
1Oqo talega na Vosa vakaibalebale i Solomoni, ka vola ko iratou na tamata nei Esekaia na tui Juta.
2Sa rogo na Kalou ni sa vunia na ka:
Ia sa rogo ko ira na tui ni ra sa vakataroga matua na ka. 3A kena cecere na lomalagi, kei na kena titobu na vuravura,
Kei na kena sega ni kilai rawa na lomadra na tui. 4Kauta tani na kena butubutu mai na siliva,
Ena qai dua na kena bilo na dauriri siliva. 5Kauta tani na tamata ca mai na mata ni tui,
Ena qai vakataudeitaki e na ka dodonu na nonai tikotiko. 6Kakua ni ko dokai iko e matana na tui,
Ia mo kakua ni la'ki tu e na nodra tikina na tamata turaga: 7Ni sa vinaka me ra kaya vei iko, Mo lako cake mai ki ke;
Ka ca mo vakatalai sobu e na mata i koya na tui
O koya ko sa raica oti. 8Kakua ni kusarawa ni la'ki veileti,
De ko lecava na ka mo cakava e na kenai otioti,
Ni sa vakamaduataki iko na kai nomu. 9Drau veivosakitaka na nomu ka kei koya ga na kai nomu;
Ia mo kakua ni vakavotuya na ka vuni vua e dua tani: 10De vakamaduataki iko ko koya sa rogoca,
Ka sega ni takali rawa na kemui rogo ca. 11A ka sa vosataki taudonu
Sa vaka na moli koula e na kato siliva. 12Sa vaka na sau koula, kei nai ukuuku sa koula dina
Ko koya sa vunauca vakavuku na daliga rogo. 13Me vaka na liliwa ni uca-vulavula e na vula i mago,
Sa vakakina ko koya nai talaki dina vei ira sa talai koya:
Ni sa vakaceguya kina na yalodra na nona turaga. 14O koya sa dokai koya e na nonai solisoli lasu,
Sa vaka na o kei na cagi ka sega na uca. 15Na yalomalua sa rawa kina na turaga,
Ia na yame malumalumu sa musuka na sui. 16Ko sa kunea li na oni? kania ga me rauti iko,
De ko mamau kina, ka luaraka. 17Tarova na yavamu mai na vale ni kai nomu;
De sa vakasosataki ko koya, ka cati iko. 18A tamata sa tukuna vakailasu na kai nona
Sai tukituki, kei nai seleiwau, kei na gasau gagata. 19A vakararavi vua na daulawaki e na siga ni rarawa
Sa vaka na bati sa ramusu, kei na yavana e dua sa mavule. 20Me vaka e dua sa kauta tani nai sulu e na siga ni liliwa, kei na livi wai wiwi ki na lase,
Sa vakakina ko koya sa ia na sere vua sa bibi na lomana. 21Kevaka sa viakana na nomu meca, mo vakania e na madrai;
Kevaka sa viagunu, mo solia vua na wai ni gunu: 22Ni ko na binia kina na qilaiso sa waqa tu ki na uluna,
Ia ena sauma vei iko ko Jiova. 23Na tokalau sa kauta mai na uca:
Kei na kakase vuni na mata cudrucudru. 24Sa vinaka na tiko e na tutu ni dela ni vale,
Ka ca na tiko kaya na yalewa dauveileti e na vale levu. 25Me vaka na wai liliwa vua sa viagunu,
Sa vakakina nai tukutuku vinaka mai na vanua yawa. 26A tamata yalododonu sa cuva vua na tamata ca
Sa vaka na mata-ni-wai vuvu, kei nai vurevure ni wai ca. 27Sa sega ni vinaka mo kania vakalevu na oni:
Ka sa sega ni vinaka me ra viaviarogo na tamata. 28A tamata sa sega ni lewa rawa na yalona
Sa vaka na koro sa kabasu, ka sega ni vakabai.
Currently Selected:
NA VOSA VAKAIBALEBALE 25: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
