NA TIKO MAI NA LEKUTU 36
36
A lewa e na vuku ni nodra i votavota na goneyalewa, ni sa sega na ganedra.
1Ia ko ira era turaga qase e na nodra mataqali na luve i Kiliati na luve i Mekiri, na luve i Manasa, e na nodra veimataqali na luve i Josefa, era toro mai, ka vosa e na mata i Mosese, kei na matadra na turaga, na turaga qase vei ira na Isireli: 2ka kaya, Sa vakarota ko Jiova vei iko na turaga mo solia na vanua, e na vakawiri madigi, me ra taukena na Isireli: a sa vakarota ko Jiova vei iko na turaga mo solia nai votavota i Silofati na weka i keimami kivei iratou na luvena yalewa. 3Ia kevaka eratou na vakawati kei na tagane e na mataqali tani vei ira na Isireli, ena qai kau na nodratou i votavota mai nai votavota ni neimami qase, ka kau ki nai votavota ni mataqali eratou vakawati kina: ia ena kau tani kina mai nai votavota keimami sa taukena. 4Ia ni na yaco na nodra jupeli na Isireli, ena qai kau na nodratou i votavota ki nai votavota ni mataqali eratou vakawati kina: ia ena kau tani na nodratou i votavota mai nai votavota ni mataqali ni neimami qase.
5A sa vakaroti ira na Isireli ko Mosese me vaka na vosa i Jiova, ka kaya, Sa dodonu na vosa ni nodra mataqali na luve i Josefa. 6Oqo na ka sa vakarota ko Jiova e na vukudratou na goneyalewa na luve i Silofati, ka vaka, Me ratou vakawati kaya ga na tamata eratou vinakata: ia ki na dua na vuvale ni mataqali ga ni nodratou qase me ratou na vakawati kina: 7me sega kina ni veikauyaki na nodra i votavota na Isireli mai na mataqali e dua ki na mataqali tani: ia me ra taura vakadua ko ira na Isireli yadua nai votavota ni mataqali ni nona qase. 8Ia na yalewa yadua, sai taukei ni dua nai votavota e na dua na nodra mataqali na Isireli, me vakawati kei na dua na vuvale e na mataqali ni nona qase, me taukena tiko na tamata yadua vei ira na Isireli nai votavota ni nona qase. 9Ia me kakua ni veikauyaki nai votavota mai na dua na mataqali ki na dua na mataqali tani; ia me ra taura vakadua ko ira na veimataqali kecega ni Isireli na nodra i votavota yadua.
10Eratou sa kitaka na goneyalewa na luve i Silofati me vaka ka vakarota vei Mosese ko Jiova: 11ni ratou sa vakawati kei na luve ni tamadra lalai, ko Mala, ko Tirisa, kei Okila, kei Milika, kei Noa, na luve i Silofati eratou yalewa: 12eratou sa vakawati e na nodra veimataqali na luve i Manasa na luve i Josefa, a sa toka ga na nodratou i votavota e na yavusa ni mataqali ni nodratou qase.
13Oqo nai vakaro kei na lewa, sa vakarota ko Jiova vei ira na Isireli e na gusu i Mosese, mai na vanua cecelevu ni Moapi, sa voleka ki na Joritani, ka donui Jeriko.
Currently Selected:
NA TIKO MAI NA LEKUTU 36: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific