MACIU 6
6
Sa vakavulici ira na nona tamata ko Jisu, e nai loloma, 14; e na masu, 515; e na lolo, 1618. Sa vakarota me ra kakua ni daulomana na ka vakavuravura, 1923: se lomaocaoca, 2434.
1Dou raici kemudou vinaka mo dou kakua ni kitaka na nomudou i loloma e na matadra na tamata, me ra raici kemudou kina; kevaka e vakaoqo, ena sega na kemudoui sau mai vua na Tamamudou sa tiko mai lomalagi. 2O koya oqo, ni ko sa kitaka nai loloma, mo kakua ni uvuca na davui e matamu, me vaka era daukitaka na dauveivakaisini e na veivale ni lotu kei na veigaunisala, me ra dokai kina vei ira na tamata. Au sa kaya vakaidina vei kemudou, Sa tu ga vei ira na kenai sau. 3Ia ko iko, ni ko sa soli ka ni loloma, me kakua ni kila na ligamu i mawi na ka sa kitaka na ligamu i matau: 4me vuni kina na nomu i loloma: ia na Tamamu sa raica na ka e vuni, ena sauma votu vei iko.
5Ia ni ko sa masu, mo kakua ni vakataki ira na dauveivakaisini: ni ra sa vinakata me ra tu e na veivale ni lotu kei na veitutu-ni-sala ni ra masu, me raici ira kina ko ira na tamata. Au sa kaya vakaidina vei kemudou, Sa tu ga vei ira na kenai sau. 6Ia ko iko, ni ko sa masu, curu ki na nomu loqi, ia ni ko sa sogota na kena katuba, masu vua na Tamamu sa tabogo; ia na Tamamu sa raica na ka e vuni ena sauma votu vei iko.
7Ia ni dou sa masu, kakua ni vosa balabalavu walega, me vakataki ira na tawa lotu; ni ra sa nanuma era na rogoci ni ra sa vosa balabalavu. 8O koya mo dou qai kakua ni vakataki ira; ni sa kila eliu na Tamamudou na ka sa yaga vei kemudou, a sa muri na nomudou kerekere vua.
9O koya mo dou qai masu vakaoqo:
Tama i keimami mai lomalagi,
Me vakarokorokotaki na yacamuni. 10Me yaco na nomuni lewa. Me caka na lomamuni e vuravura me vaka sa caka mai lomalagi. 11Solia mai vei keimami e na siga oqo na kakana e yaga vei keimami. 12Ia kakua ni cudruvi keimami e na vuku ni neimami valavala ca, me vaka keimami sa sega ni cudruvi ira era sai valavala ca vei keimami. 13Ia kakua ni kauti keimami ki na vere, ka mo ni vakabulai keimami mai na ca: Ni sa nomuni na lewa, kei na kaukauwa, kei na vakarokoroko, ka sega ni mudu. Emeni.
14Ia kevaka dou sa sega ni cudruvi ira na tamata sa caka cala, ena sega talega ni cudruvi kemudou na Tamamudou vakalomalagi: 15ia kevaka dou sa cudruvi ira na tamata sa caka cala, ena cudruvi kemudou talega e na vuku ni nomudou caka cala na Tamamudou.
16Ia ni dou sa lolo, kakua ni vakaveveku mata, me vakataki ira na dauveivakaisini; ni ra sa vakatanitaka na matadra, me rairai vei ira na tamata na nodra lolo. Au sa kaya vakaidina vei kemudou, Sa tu ga vei ira na kenai sau. 17Ia ko iko, ni ko sa lolo, lumuta na ulumu, ka tavoya na matamu: 18me kakua ni rairai vei ira na tamata na nomu lolo, vua ga na Tamamu sa tabogo: ia na Tamamu sa raica na ka sa vuni ena sauma votu vei iko.
19Dou kakua ni kumuna vata vei kemudou nai yau e vuravura, e dauvakacacana kina na sarasara kei na veveka, a sa ravabasuka kina na daubutako ka butakoca: 20ia mo dou kumuna vata na nomudou i yau mai lomalagi, sa sega ni vakacacana kina na sarasara se na veveka, a sa sega ni ravabasuka kina na daubutako me butakoca: 21ni na tiko talega na yalomudou e na yasana sa tiko kina na nomudou i yau.
22A cina ni yago na mata; o koya ke sa vinaka na matamu, ena rarama kina na yagomu taucoko. 23Ia kevaka e ca na matamu, ena butobuto na yagomu taucoko. Ia kevaka sa butobuto na rarama sa tu e lomamu, ena vakaevei na kena levu ni butobuto ko ya!
24Sa sega e dua na tamata sa qarava rawa e le rua na turaga; ni na cata e dua, ka lomani koya kadua; se na kabita e dua, ka beci koya kadua. Dou sa sega ni qarava rawa na Kalou kei nai yau. 25O koya kau sa kaya kina vei kemudou, Mo dou kakua ni lomaocaoca e na vuku ni nomudou bula, e na ka mo dou kania, se na ka mo dou gunuva: se e na vuku ni yagomudou, e na ka mo dou vakaisulu kina. Sa ka levu na bula, na kakana na ka lailai, se segai? a yago talega na ka levu, a ka lailai nai sulu, se segai? 26Dou raica na manumanu vuka; ni ra sa sega ni dauveikabukaburaki, se dautamusuka, se daukumuna vata ki na lololo; a sa vakani ira na Tamamudou vakalomalagi. Dou sa sega beka ni yaga vakalevu cake vei ira? 27Ia ko cei vei kemudou, ni sa lomaocaoca, sa rawata me vakuria vakalailai ga na siga ni nona bula? 28Ia dou sa lomaocaoca vakacava e na vuku ni sulu? Dou vakananuma na viavia ni veikau, era sa tubu vakaevei: era sa sega ni daucakacaka, se dautali: 29ia kau sa kaya vei kemudou, O Solomoni e na nonai ukuuku kecega sa sega ni vakaisulu me vaka e dua vei ira oqo. 30Ia kevaka sa vakasuluma vakaoqo na Kalou na co ni veikau, ka tu edaidai, a sa biu ki na lovo e na mataka ena sega li ni gu vakalevu cake me vakasulumi kemudou, koi kemudou sa lailai na nomudou vakabauta? 31O koya mo dou qai kakua ni lomaocaoca, ka kaya, A cava eda na kania? se, A cava eda na gunuva? se, A cava eda na vakaisulu kina? 32ni sa dau vakasaqara na ka kecega oqo ko ira na lewe ni veivanua: ni sa kila na Tamamudou vakalomalagi sa yaga vei kemudou na ka kecega oqo. 33Ia dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo. 34O koya mo dou qai kakua ni lomaocaoca e na vuku ni mataka: ena lomaocaoca na mataka e na vuku ni kena ka. Sa rauta na siga na kena ca.
Currently Selected:
MACIU 6: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
