JOSUA 7
7
Sa vakavotui na kocokoco i Ekani, a sa cudruvi ko koya.
1Ia era sa vakacataka na tabu ko ira na Isireli e na ka sa lesi me vakarusai: ni sa tara eso na ka sa lesi me vakarusai ko Ekani na tagane, na luve i Kamai, na luve i Sapiti, na luve i Sira, e na mataqali i Juta: a sa waqa mai na cudru i Jiova vei ira na Isireli.
2A sa tala na tamata eso ko Josua mai Jeriko ki Ai, o koya sa voleka ki Peci-aveni, mai na tu-i-cake ki Peceli, a sa vosa vei ira, ka kaya, Dou lako cake, ka rai vanua. A ra lako cake na tamata ka yamata ki Ai. 3A ra lesu vei Josua, ka kaya vua, Me kakua ni lako cake na tamata kecega; me le rua beka ga na udolu na tamata, se le tolu na udolu, me lako cake ka samuti Ai; me kakua ni oca na tamata kecega ni ra lako kina, ni sa lewe lailai ga ko ira ko ya.
4A sa lako cake kina e le tolu beka na udolu vei ira na tamata: a ra drotaki ira na kai Ai. 5A sa mokuta e le tolusagavulu ka ono beka vei ira ko ira na ka Ai: ka vakasavi ira mai na matamata-ni-koro, ka yaco ki Siparimi, ka ra mokuti ira e nai sobusobu: a sa malumalumu na yalodra na tamata, a ra sa waicala.
6A sa dresulaka na nonai sulu ko Josua, ka cuva vakatoboicu i na qele e na mata ni kato i Jiova, ka yakavi mai, o koya kei ira na qase ni Isireli, ka vakabuya na kuvu ni qele ki na buradeladra. 7A sa kaya ko Josua, Ulei! noqu Turaga, Jiova, e na vuku ni cava ko ni sa kauti ira kina na tamata oqo ki na tai ni Joritani oqo, me soli keimami ki na ligadra na Amoraiti, me keimami vakarusai kina? ia kevaka keimami a lasa e na tai kadua ni Joritani ka tiko kina, ke sa vinaka! 8Oi kemuni na Turaga, a cava me'u kaya ni ra sa vakanadaku vei ira na nodra meca ko ira na Isireli? 9Era na rogoca na kai Kenani kei ira kece sa tiko e na vanua oqo, ka ra na mai vakavolivoliti keimami, ka vakaotia na yaca i keimami e vuravura, ia ka cava kemuni na cakava e na vuku ni yacamuni levu?
10A sa kaya vei Josua ko Jiova, Tucake; a cava ko sa davo vakatoboicu kina vakaoqo? 11Sa ra kitaka na ka ca ko ira na Isireli, ka vakacataka na noqu veiyalayalati ka'u a vakarota vei ira: ia era sa tara eso na ka sa lesi me vakarusai, a ra sa butakoca, ka lasu talega, ka virinoca vata talega kei na nodra i yau. 12Ia era sega ni tu rawa kina ko ira na Isireli e matadra na nodra meca; era sa vakanadakuya na nodra meca, ka ni ra sa lesi me vakarusai: au na sega tale ni tiko kei kemuni, kevaka ko ni na sega ni vakaotia na ka sa lesi me vakarusai me kua ni tiko vei kemuni. 13Tu cake, mo vakasavasavataki ira na tamata, ka kaya, Ni vakasavasavataki kemuni ka waraka na mataka: ni sa vosa vakaoqo ko Jiova na Kalou ni Isireli, Sa tu vei kemuni na Isireli, na ka sa lesi me vakarusai: kemuni na sega ni tu rawa e matadra na nomuni meca, mo ni biuta tani mada na ka sa lesi me vakarusai me kua ni tiko vei kemuni. 14E na mataka kemuni na toro mai vakamataqali: ia na mataqali sa cavuta ko Jiova, ena toro mai vakamatavuvale; ia na matavuvale sa cavuta ko Jiova, ena toro mai vakavuvale; ia na vuvale sa cavuta ko Jiova, ena toro mai vakatamata yadua. 15Ia ko koya sa cavuti ni sa tu vua na ka sa lesi me vakarusai, ena vakamai e na bukawaqa, ko koya kei na nona ka kecega: ni sa vakacataka na veiyalayalati i Jiova, ka ni sa kitaka na ka lialia e Isireli.
16A sa sou e na mataka ko Josua, ka kauti ira mai na Isireli me vaka na nodra veiyavusa; a sa cavuti na mataqali i Juta. 17A sa kauti ira mai na mataqali i Juta; a sa cavuti na nodra matavuvale na luve i Sira: a sa kauta mai na nodra matavuvale na luve i Sira na veivuvale yadua; a sa cavuti ko Sapiti: 18a sa kauta mai na nona vuvale ko koya na tamata yadua; a sa cavuti ko Ekani, na luve i Kamai, na luve i Sapiti, na luve i Sira, e na mataqali i Juta.
19A sa kaya vei Ekani ko Josua, Na luvequ, mo vakavinavinaka mada vei Jiova na Kalou ni Isireli, ka vakatusa mada vua; ka tukuna mai vei au na ka ko sa cakava; kakua ni vunia vei au. 20A sa vosa vei Josua ko Ekani, ka kaya, E dina ka'u a kitaka na ka ca vei Jiova na Kalou ni Isireli, ia ka'u sa kitaka vakaoqo: 21Ni'u a raica sa tu vata kei nai toki ni valu e dua nai tutuvi vinaka mai Sainari, kei na siliva e rua na drau na sikeli, kei na dua na uma koula sa limasagavulu na sikeli na kena bibi, au a qai kocova, ka kauta; ka raica, sa vuni e na qele e na noqu loma ni vale laca, ia na siliva sa no vata era.
22A sa tala eso na tamata ko Josua, ka ra cici ki na vale, ka raica, sa vuni tu e nona vale laca, kei na siliva sa no vata era. 23A ra sa kauta kece, mai na loma ni vale laca, ka kauta vei Josua, vei ira talega na Isireli kecega, a ra kotora yadua e na mata i Jiova.
24Ia ko Josua, kei ira vata kaya na Isireli kecega, era kauti Ekani na luve i Sira, kei na siliva, kei nai tutuvi, kei na uma koula, kei iratou na luvena tagane, kei iratou na luvena yalewa, kei na nona pulumokau, kei na nona asa, kei na nona sipi, kei na nona vale laca, kei na nona ka kecega; a ra sa kauti ira ki na buca i Akori. 25A sa kaya ko Josua, A cava ko sa vakararawataki keimami kina? ena vakararawataki iko e na siga edaidai ko Jiova. A ra sa vakaviriki koya e na vatu ko ira kecega na Isireli; ka ra vakamai ira e na bukawaqa, ka vakaviriki ira e na vatu. 26A ra binia e delana e dua nai binibini vatu levu, ko ya sa tu edaidai. A sa saumaki ko Jiova mai na katakata ni nona cudru. O koya oqo sa vakatokai kina na yaca ni tikina ko ya, Na buca i Akori [Vakararawataki], ka yacova na siga edaidai.
Currently Selected:
JOSUA 7: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
