JOSUA 2
2
Sa talai e lewe rua me la'ki rai vanua, 1-7. Erau a veiyalayalati kei Reapi, 8-22. Erau a lesu tale ka tukutuku, 23-24.
1Ia ko Josua na luve i Nuni, sa tala e le rua na tamata mai Sitimi, me rau yamata lo na vanua, ka sa kaya, Drau la'ki raica na vanua, kei Jeriko. A rau a lako yani, ka curu ki na nona vale e dua na yalewa dautagane, na yacana ko Reapi, ka rau a moce kina. 2A sa tukuni vei tui Jeriko, ka vaka, Raica, sa lako mai ki ke e na bogi, eso na tamata vei ira na Isireli, me raica sara na vanua. 3A sa talaki vei Reapi ko tui Jeriko, ka kaya, Kauti rau mai ki tautuba na tamata sa lako mai vei iko, erau sa curu ki na nomu vale; ni rau sa lako mai me raica na vanua taucoko.
4A sa kauti rau na tamata ko koya na yalewa, ka vunitaki rau, ka kaya vakaoqo, Erau a lako mai vei au na tamata, ia ka'u a sega ni kila se rau lako maivei: 5ia ni sa vakarau me sogo na matamata-ni-koro, ni sa butobuto mai, sa rau lako yani na tamata, au sa sega ni kila se rau lako kivei na tamata: ia dou cici muri rau vakusakusa, ka dou na vauci rau. 6Ia sa kauti rau e liu ko koya e dela ni vale, ka vunitaki rau e na tidolo ni laino eso, ka virinoca oti ko koya e dela ni vale. 7A sa muri rau eso na tamata e na sala vaka ki na Joritani, ka yaco ki nai vutovuto: ia ni ra sa curu ki tautuba na tamata sa cici muri rau, sa qai sogo na matamata-ni-koro.
8Ia ni rau sa bera ni davo, sa cabe cake vei rau ko koya na yalewa ki dela ni vale. 9A sa kaya vei rau na tamata, Au sa kila sa solia vei kemuni na vanua oqo ko Jiova, ka sa kani keimami na rere levu e na vukumuni, ka sa waicala kecega na lewe ni vanua e na vukumuni: 10ni keimami sa rogoca sa vakadiva na Wasa Damudamu ko Jiova e na vukumuni, ni kemuni a lako mai Ijipita; kei na ka kemuni a cakava vei rau na nodra tui na Amoraiti, mai na tai kadua ni Joritani, vei Sioni kei Oki, koi rau kemuni a vakarusa sara. 11Ia ni keimami a rogoca, sa qai waicala ga na yalo i keimami, a sa yali vei ira yadua na lomadei, e na vukumuni: ni sa Kalou ga ko Jiova na nomuni Kalou mai lomalagi e cake, e vuravura talega era. 12Ia oqo, e na vuku ni'u a lomani kemudrau, mo drau bubului mada vei au ka cavuti Jiova, ni drau na lomani ira talega na lewe-ni-vale nei tamaqu, ka cavuta vei au e dua nai vakatakilakila dina: 13ia drau na vakabula na tamaqu, kei na tinaqu, kei iratou na ganequ, kei iratou na tuakaqu kei na taciqu, kei na nodra ka kecega, ia drau na vakabulai keitou mai na mate.
14A rau sa kaya vua koi rau na tamata, Keirau na mate me kenai sau ni nomudou mate, kevaka dou na sega ni tukuna na neirau tiko oqo: ia ni sa solia ko Jiova na vanua oqo vei keimami, keimami na lomani iko, ka cakava na ka dina vei iko.
15A sa vakatautukutaki rau sobu ko koya e na dali mai na katuba e cake, ni sa toka e dela ni bai ni koro na nona vale, a sa dautiko kina ko koya e dela ni bai. 16A sa kaya vei rau ko koya, Drau dro ki na ulu-ni-vanua, de ra sa sota kei kemudrau ko ira era sa cicimuri kemudrau; ia drau vunitaki kemudrau maikea ka bogi tolu, me ra lesu mada mai ko ira era sa cicimuri kemudrau: ka sa oti, drau na qai lako yani e na nomudrau sala.
17A rau sa kaya vua koi rau na tamata, Keirau na sega ni cala e na vuku ni bubului oqo ko sa vakabubuluitaki keirau kina: 18Raica, ni keimami sa lako mai ki na vanua, mo vakavivica na dali ni vulovulo damudamu oqo, e na katuba e cake ko a vakatautukutaki keirau sobu kina: ka mo vakasoqona vei iko ki vale na tamamu kei na tinamu, kei ratou na ganemu, kei ira kecega na lewe-ni-vale nei tamamu. 19Ia ko ira yadua sa lako yani ki tautuba mai na nomu vale, ena baleti koya ga na nona mate, ia keirau na sega ni cala kina: ia ko ira yadua sa tiko kei iko e vale, ena baleti keirau na nona mate, kevaka sa tarai koya e dua na liga i keimami. 20Ia kevaka ko na tukuna na neirau tiko oqo, keirau na qai sega ni cala e na bubului ko sa vakabubuluitaki keirau kina. 21A sa kaya ko koya, Me yaco ga me vaka na nomudrau vosa. A sa talai rau yani ko koya, ka rau sa lako: a sa vakavivica ko koya na vulovulo damudamu e na katuba e cake.
22A rau a lako yani, ka yaco ki na ulu-ni-vanua, ka rau tiko kina ka bogi tolu, me ra lesu tale mada ko ira ka cici muri rau: a ra sa qarai rau e na sala kecega ko ya ko ira ka vakasavi rau, ka sega ni kunei rau.
23A rau sa lesu tale koi rau na tamata, ka lako sobu mai na ulu-ni-vanua, ka lako ki tai kadua, ka yaco vei Josua na luve i Nuni, ka rau tukuna vua na ka kece ka yacovi rau. 24A rau a kaya vei Josua, Sa solia vakaidina ki na ligada na vanua kecega oqo ko Jiova; ia sa waicala ko ira kecega na lewe ni vanua e na vukuda.
Currently Selected:
JOSUA 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
