JEREMAIA 4
4
Na Kalou, sa kacivi ira na Isireli me ra veivutuni, me ra vinaka kina, 1,2. Sa vakaroti ira na Juta me ra veivutuni, ni sa voleka ni yacovi ira na ca levu, 3-18. Sa tagicaki na nodra ka rarawa na Juta, 19-31.
1Kevaka ko na lesu mai, na Isireli, sa kaya ko Jiova, mo lesu mai vei au: ia kevaka ko na biuta tani na nomu ka vakasisila e mataqu, ko na qai sega ni lako tani: 2ia ko na ia na bubului ka vaka, Sa bula ko Jiova, ka ia e na lomadina, kei na yalododonu, kei na cakacaka dodonu; ia era na vosavakalougatataki ira e na vukuna ko ira na lewe ni veimatanitu, ko koya talega era na vakacaucautaka.
3Ni sa kaya vakaoqo ko Jiova vei ira na Juta kei Jerusalemi, Dou cukita na nomudou qalau ia dou kakua ni kaburaka na sila ki na veiwa-votovotoa. 4Dou cilivi kemudou mo dou nei Jiova, ka kauta tani na vuso ni yalomudou, koi kemudou na kai Juta kei na lewe i Jerusalemi: de lako yani me vaka na bukawaqa na noqu cudru, ka waqa me sega e dua e bokoca rawa, e na vuku ni kena ca ni nomudou i valavala.
5Dou tukuna mai Juta, ka vakarogorogoya mai Jerusalemi; ka kaya, Dou uvuca na davui e na vanua: dou kaci yani, dou soqoni vata, ka kaya, Dou soqoni vata mai, me da la'ki curuma na veikoro vakabai. 6Dou vakarewataka na kuila vaka ki Saioni: dou dro, kakua ni berabera: ni'u na vakayacora mai na tokalau, na ka ca kei na veivakarusai levu. 7Sa lako cake mai na kena veikau e dua na laioni, io sa lako tu mai ko koya sa dauvakacacana na veimatanitu; sa lako yani mai na nona yasana me vakalalataka na nomu vanua; na nomu veikoro ena vakalalataki, me sega e dua e tiko kina. 8E na vuku ni ka oqo dou vauca vei kemudou nai sulu taga, dou tagi ka qoqolou: ni sa sega ni suka tani vei keda na cudru waqawaqa i Jiova. 9Ia ena yaco e na siga ko ya, sa kaya ko Jiova, ena waicala na yalona na tui, kei na yalodra na turaga; a ra na kidacala ko ira na bete, ia na parofita era na kidroa.
10Au a qai kaya, Ulei, na Turaga ko Jiova! e dina ko ni sa vakacalai ira vakalevu na tamata oqo, kei Jerusalemi, ni ko a kaya, Dou na tiko vakacegu; ia ka sa lau ki na vu ni yalodra nai seleiwau.
11E na gauna ko ya ena tukuni vei ira na tamata oqo, kei Jerusalemi, E dua na cagi todra sa liwa mai na veitikina cecere ni veikau, vaka ki na gone yalewa ni noqu tamata, ka sega me iriva na sila, se vakasavasavataka, 12io sa dua na cagi kaukauwa mai na veiyasana ko ya, ena lako mai vei au: ia koi au talega ka'u na qai tukuna na lewa vei ira. 13Raica, ena lako mai ko koya me vaka na o, ka vaka na covulaca na nona qiqi-ni-valu: sa totolo na nona ose ka bera na ikeli. Ulei koi keda! ni da sa vakarusai. 14Mo vuya tani na ca mai na lomamu, Jerusalemi, mo bula kina. A cava na kena dede me tiko e lomamu na nanuma ca? 15Sa dua na domo sa tukutuku mai Tani, a sa vakarogoya na ka rarawa mai na veiulu-ni-vanua ko Ifireimi. 16Mo dou tukuna vei ira na veimatanitu; raica, vakarogoya ki Jerusalemi, ni ra sa lako mai nai valu i vakatawa mai na vanua vakayawa, ka ra na bolebole ki na veikoro vaka-Juta. 17Me vakataki ira nai vakatawa ni were, era na viribaiti koya vakakina; ni sa vuki tani vei au ko koya sa kaya ko Jiova. 18A nomu i valavala kei na nomu cakacaka sa vakayacora na ka oqo vei iko; oqo na nomu caka ca ga, ka sa gaga sara, sa lau sara ki na vu ni yalomu.
19Na ketequ, na ketequ! sa sautaribariba na vu ni lomaqu; sa kudrukudru na yaloqu e lomaqu; au sa sega ni galu rawa, ni ko sa rogoca, na yaloqu, na rorogo ni davui, na kaila ni valu. 20Sa kacivaki na veivakarusai sa tarava na veivakarusai; ni sa vakacacani na vanua taucoko: sa vakacacani vakasauri na noqu vale laca, ka vakidacala na noqu i lati. 21A cava na kena dede me'u raica tiko na kuila, ka rogoca tiko na rorogo ni davui?
22Ni ra sa lialia na noqu tamata, era sa sega ni kilai au, era sa gone sesewa, ka sa sega vei ira na vuku: era sa ia vaqaseqase nai valavala ca, ia era sa sega ni vuku me ra caka vinaka.
23Au a raici vuravura, ka raica, sa sega ni vakarautaki, ka sa lala tu, kei na lomalagi, ka sa sega na kena rarama. 24Au a raica na veiulu-ni-vanua, ka raica, era sa sautaninini, a sa yavavala na veiulu-ni-koro kecega me vaka na ka walega. 25Au a vakararai, ka sa sega na tamata, ka sa dro na manumanu vuka kecega. 26Au a vakararai, ka sa lekutu na veiwere bulabula, ia na kena veikoro kecega sa basubasuki sobu e na mata i Jiova, e na mata ni nona cudru waqawaqa.
27Ni sa kaya vakaoqo ko Jiova, Ena lala na vanua taucoko; ia ka'u na sega ni vakaotia sara. 28E na vuku ni ka oqo ena yasovaka ko vuravura, ka na loaloa mai na lomalagi e cake: ni'u sa vosataka, ni'u a nakita, ni'u na sega ni veivutunitaka, ni'u na sega talega ni suka tani maikina. 29Ena dro na lewe ni koro taucoko e na vuku ni domodra era vodo ose kei na domodra era vakadakai; era na lako ki loma ni veikau, ka kaba cake ki na vatu: ena biu na veikoro kecega, ka na sega e dua na tamata me tiko kina. 30Ia ni ko sa vakacacani, a cava mo qai cakava? Kevaka ko sa vakaisulutaki iko e nai sulu kulakula, kevaka ko sa vakaiukuukutaki iko e nai ukuuku koula, kevaka ko sa qumuta na matamu, ena sega ni yaga na nomu vakamatavinakataki iko; era na beci iko ga na nomu i tau, era na segata me ra vakamatei iko.
31Ni'u sa rogoca e dua na domo sa vaka na domo ni yalewa sa taratara, ka vaka na yaluma i koya sa vakasucuma na nona ulumatua, na domo ni goneyalewa ni Saioni, ni sa tagicaki koya ga, ni sa dodoka na ligana, ka kaya, Ulei koi au oqo! ni sa luvu na yaloqu e na vukudra na daulaba!
Currently Selected:
JEREMAIA 4: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
