JEREMAIA 2
2
Na Kalou, ni sa vakatakila oti na nona loloma eliu vei ira na Juta, sa qai vunauci ira e na vuku ni nodra vuki tani vua, ni sa ka levu sara, 1-13. Era vuna ga kina na ka rarawa sa yacovi ira, 14-19. A nodra i valavala ca na Juta, 20-30. Era sa vunauci e na vuku ni nodra via vakadonui ira vakataki ira, 31-37.
1A sa yaco vei au na vosa i Jiova, ka vaka,
2Mo la'ki tukuna e na daliga i Jerusalemi, ka kaya, Sa kaya vakaoqo ko Jiova; Au sa nanumi iko, kei na nodaru veilomani ni ko sa gone, kei na loloma ni nodaru veimusuki, ni ko a muri au voli e na veikau, e na vanua sa sega ni tei. 3Sa tabu ko Isireli me nei Jiova, ka sai sevu ni nona vuata; ko ira kece sa vakacacani koya, era na cala; a ca ga ena yacovi ira, sa kaya ko Jiova.
4Dou rogoca na vosa i Jiova, na mataqali i Jekope, kei na veivuvale kecega ni mataqali i Isireli: 5Sa kaya vakaoqo ko Jiova, A caka cala cava era sa kunea vei au ko ira na tamamudou, me ra lako vakayawa tani kina vei au, ka muria na ka wale, ka ra sa sega kina ni yaga? 6ka ra sa sega talega ni kaya, Evei ko Jiova ka kauti keda cake mai na vanua ko Ijipita, ka tuberi keda e loma ni veikau, e na vanua liwa lala ka sukusukura, na vanua ni dausiga kei na yaloyalo ni mate, na vanua sa sega e dua e lakova, ka sega na tamata e tiko kina? 7Ia ka'u a kauti kemudou ki na vanua sautu, mo dou kania na vuana kei na kena ka vinaka; ia ni dou sa curu kina, dou sa vakadukadukalitaka na noqu vanua, ia na noqu i votavota dou sa vakasisilataka. 8Era sa sega ni kaya na bete, Evei ko Jiova? ko ira talega na vu-ni-vunau era sa sega ni kilai au: ko ira nai vakatawa era sa vuki tani vei au, ko ira talega na parofita era sa daucavuti Peali, ka muria na ka sa sega ni yaga.
9O koya oqo ka'u na ia tiko kina na veilewai kei kemudou, sa kaya ko Jiova, io, kei ira talega na luvedra na luvemudou ka'u na ia na veilewai. 10Ia dou lako mada yani ki na veiyanuyanu ko Kitimi, ka raica; ka talatala ki Kitari, ka vakananuma matua, ka kila, se dua kina na ka vakaoqo. 11Sa dua li na matanitu sa vakaisosomitaka na kena kalou, e na ka sa sega ni kalou? ia ko ira na noqu tamata era sa vakaisosomitaki koya sa nodra i ukuuku e na ka sa sega ni yaga. 12Dou kidacala, na lomalagi, e na ka oqo, ia dou ririkotaka, dou vakaloloma mai, sa kaya ko Jiova: 13ni sa rua na ka ca era sa cakava, ko ira na noqu tamata; era sa biuti au, na mata-ni-wai bula, ka ra sa taya me nodra nai keli-ni-wai, nai keli-ni-wai ka ca, ka sa lu tikotikoga.
14Sa bobula beka ko Isireli? se na luve ni bobula beka ko koya? a cava sa qai vakacacani kina? 15a luve ni laioni era sa tagici koya, era sa tabalaka na domodra, ka vakalalataka na nona vanua: na nona veikoro sa kama, sa sega e tiko kina. 16Ko ira talega na gone ni Nofi kei Tapanesi era sa vorolaka na buradelamu. 17A ka oqo ko sa vakayacora vei iko, se segai, ni ko sa biuti Jiova na nomu Kalou, ni sa tuberi iko e na sala?
18Ia oqo, a cava me nomu mo via lako kina ki Ijipita, mo gunuva na wai ni Siori? se cava me nomu mo via lako kina ki Asiria, mo gunuva na wai ni Uciwai? 19Ena kemu kuita na nomu ca, ia na nomu vuki tani ena vunauci iko: mo kila ga ka raica ni sa ka ca ka ka gaga na nomu biuti Jiova na nomu Kalou, ni sa sega talega vei iko na rerevaki au, sa kaya na Turaga ko Jiova ni lewe vuqa.
20Ka'u a musuka mailiu na kemui vua, ka drutia na kemui vau; ia ko a kaya, Au na sega ni talaidredre; ia e na ulu-ni-koro cecere kecega kei na ruku ni kau bulabula kecega ko sa lako sese kina, ka ia na dautagane. 21Ia koi au ka'u a tei iko mo vaini vinaka ga, mo kau dinadina sara; ia ko sa qai vuki vakaevei mo kau ca ni vaini tani vei au? 22Ia kevaka ko sa savai iko e na lase, ka vakalevutaka vei iko na sovu, sa volai tu ga e mataqu na nomu caka cala, sa kaya na Turaga ko Jiova.
23Ko sa kaya vakacava, Au sa sega ni vaqeleqelewataki, au a sega ni muri Peali? mo raica na nomu i valavala e na buca, kila mada na ka ko sa cakava: na kameli totolo ko iko sa vereverea na kenai lakolako; 24kei na asa kila sa daulasa mai veikau, sa boiboica na cagi ni sa gagano voli; ni sa via veiyacovi, ko cei me vakalesui koya tani? ko ira kece era qarai koya, era na sega ni via oca wale; ena kena vula, era na qai kunei koya. 25Me kua mada ni tawa vakaivava na yavamu; ka tarova na nomu i tilotilo, mo kakua ni viagunu: ia ko a kaya, Sa sega vei au nai nuinui: sa segai sara; ni'u a lomani ira na kai tani, ia ka'u na muri ira ga. 26Me vaka sa madua na butako ni sa kune, sa madua vakakina na mataqali i Isireli; ko ira, kei na nodra tui, kei na nodra turaga, kei na nodra bete, kei na nodra parofita, 27ni ra kaya ki na kau, Ko iko na tamaqu; ki na vatu talega, Ko iko ko a vakasucumi au: ka ni ra sa vakanadaku vei au, ka sega ni vakanamata mai: ia e na gauna ni nodra rarawa era na kaya, Mo ni tu cake mai, ka vakabulai keimami. 28Ia sa evei na nomu kalou ko sa cakava me yaga vei iko? me ra tu cake mai, kevaka era sa vakabulai iko rawa e na gauna ni nomu rarawa: na nomu kalou, ko iko Juta sa tautauvata na kedrai wiliwili kei na nomu veikoro. 29A cava dou na mai kaya vei au? koi kemudou kecega dou sa vuki tani vei au, sa kaya ko Jiova. 30Sa sega ni yaga na noqu cudruvi ira na luvemudou; era sa sega ni vakavulici kina: a nomudou i seleiwau sa kani ira na nomudou parofita, me vaka na laioni e dauveivakamatei.
31Kemudou nai tabatamata, dou kila mada na vosa i Jiova. Ka'u a vaka beka na veikau vei Isireli; se na vanua butobuto loaloa? a cava era sa kaya kina na noqu tamata, Keimami sa veitalia ga; keimami na sega ni lako tale vei iko? 32Me guilecava li na goneyalewa na nona ka ni ukuuku, se na yalewa sa qai vakawati na nonai sulu ni vakawati? ia na noqu tamata era sa guilecavi au ka bogi vuqa sa sega ni wili rawa.
33A cava ko sa ia kina nai valavala vakaveiwedevi mo kere loloma kina? ia ko ira talega na yalewa ca ko sa vakavulica e na nomu i valavala: 34Sa kune talega e na bui ni nomu i sulu na dra ni yalodra era sa sega ni cala ka ra dravudravua: sa segai ni'u sa kelia ka'u sa kunea kina, sa tu ga vei ira kecega oqo. 35Ia ko sa kaya, E na vuku ni'u sa sega ni cala, ena suka tani ga vei au na nona cudru. Raica, ka'u na ia na veilewai kei iko, ka ni ko sa kaya, Au sa sega ni valavala ca.
36A cava ko sa daulako voli vakalevu kina mo vakatanitaka kina na nomu i valavala? ko na maduataki Ijipita talega, me vaka ko sa maduataki Asiria. 37Io, ko na lako tani talega kina maivei koya ka na toka na ligamu ki ulumu: ni sa biuti ira ko sa vakararavi kina ko Jiova ia ko na sega ni vakayacori kina.
Currently Selected:
JEREMAIA 2: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
