JEREMAIA 13
13
Sa vakatakarakarataki na nodra rusa na Juta e nai vau lineni sa vunitaki e na qara-vatu, 1-11. Sa tukuni e na vosa vakatautauvata ni ra na mateni e na ka rarawa, 12-14. Sa vakarota vei ira na veivutuni, me vakadaroi kina na nodra cudruvi, 15-22. A nodra i valavala ca ga sa vu ni nodra cudruvi, 23-27.
1Sa kaya vakaoqo vei au ko Jiova, Mo la'ki kauta e dua na nomu i vau lineni ka vauca kina na tolomu, ia mo kakua ni tonia e na wai. 2Au a qai kauta e dua nai vau me vaka na vosa i Jiova, ka vauca kina na toloqu. 3A sa baci yaco vakarua vei au na vosa i Jiova, ka vaka, 4Mo kauta na nomu i vau oqori, sa vau kina na tolomu, ka cavu tu mo lako ki na Uferetisi, ka vunia maikea e na qara-vatu. 5Au a qai lako, ka vunia mai na Uferetisi, me vaka ka kaya vei au ko Jiova. 6Sa bogi vuqa, sa qai kaya vei au ko Jiova, mo cavu tu, ka mo lako ki na Uferetisi, ka kauta maikina nai vau, ko ya ka'u a kaya mo vunia maikea. 7Au a qai lako ki Uferetisi, ka kelia nai vau ka kauta mai na tikina ka'u a vunia kina: ka raica, sa ca mai nai vau, sa sega e dua na ka e yaga kina. 8Sa qai yaco mai vei au na vosa i Jiova, ka vaka,
9Sa kaya ko Jiova, Ka'u na vakacacana vakaoqo na viavialevu i Juta, kei na viavialevu cake i Jerusalemi. 10Ko ira na tamata ca oqo, era bese ni rogoca na noqu vosa, era muria na nodra yalokaukauwa era muria talega na kalou tani, me qaravi ira, ka soro vei ira, era na vaka ga nai vau oqo, sa sega e dua na ka e yaga kina: 11me vaka sa kabita na tolo ni tamata nai vau, ka'u sa vakabita vakakina vei au na mataqali kecega i Isireli kei na mataqali kecega i Juta, sa kaya ko Jiova; me ra yaco me noqu tamata, me'u rogo kina, ka vakavinavinakataki, ka vakarokorokotaki: ia era bese ga ni vakarorogo.
12Ia mo tukuna vei ira na vosa oqo, Sa kaya vakaoqo ko Jiova na nodra Kalou na Isireli, A tavaya kece ena vakasinaiti ga e na waini: ka ra na kaya vei iko, Keimami sa sega beka ni kila ni na vakasinaiti na tavaya kecega ena waini? 13Mo qai kaya vei ira, Sa kaya vakaoqo ko Jiova, Raica, ka'u na vakasinaiti ira kecega na lewe ni vanua oqo, io ko ira na tui era sa tiko e nai tikotiko i Tevita, kei ira na bete, kei ira na parofita, kei ira kece na kai Jerusalemi, me ra mateni: 14ka'u na botobotolaki ira vata na tamata kei na kai nona, io ko ira vata na qase kei na luvedra, sa kaya ko Jiova: ka'u na sega ni lomana, se vosota, se yalololoma kina, ka'u na vakarusai ira ga.
15Dou rogoca, ka vakatu daliga; dou kakua ni viavialevu: ni sa kaya ko Jiova. 16Dou vakarokorokotaki Jiova na nomudou Kalou, ni sa bera ni vakayacora na butobuto, ni sa bera talega ni tarabe na yavamudou e na veiulu-ni-vanua loaloa; ka dou sa yadrava na rarama, ka sa vukica ga ko koya me yaloyalo ni mate, ka cakava me butobuto sara. 17Ia kevaka dou na sega ni rogoca, ena tagi na yaloqu e na tikina vuni e na vuku ni nomudou viavialevu; ena tagi vakalevu na mataqu, ia ena dave maikina na wai, ni sa vakabobulataki na qele ni sipi i Jiova.
18Mo kaya vei rau na tui kei na ranadi, Drau vakamalumalumutaki kemudrau, drau tiko sobu: ni na lako sobu mai na kemudrau ka levu, io na nomudrau i sala vakaiukuuku: 19a veikoro mai na mata ni ceva ena sogo tu, ka sega e dua me dolava: era na kau tani kecega na Juta, era na kau vakaoti sara vakabobula. 20Drau ta cake, ka raici ira era sa lako mai na mata ni tokalau: sa evei na qele ni sipi ka soli vei iko, na nomu sipi matavinaka? 21A cava ko na qai kaya ni sa cudruvi iko ko koya? ni sai iko ga ka vakavulici ira me ra nomu turaga, ka me ra liu: ena sega beka ni tauvi iko na rarawa, me vaka na yalewa sa taratara? 22Ia kevaka ko sa kaya e lomamu, A cava beka sa yacovi au kina na ka oqo? Ni sa levu na nomu caka cala sa luvati kina na bui ni nomu i sulu, ka dresulaki tani sara mai na bukubuku-ni-yavamu.
23Sa vakatanitaka rawa li na kai Iciopea na kulina, se na lepate na kena tavutonotono? ke vakakina dou na qai rawata mo dou caka vinaka, koi kemudou ka daucakava ga na ka ca: 24o koya oqo ka'u na dui vakasevi ira tani kina me vaka na vu-ni-sila sa cagina tani e na cagi mai veikau: 25sa kemu ga oqo, nai votavota ka'u sa vakarautaka me nomu, sa kaya ko Jiova; ni ko sa guilecavi au, ka vakararavi ki na ka lasu: 26ka'u na cega cake kina na bui ni nomu i sulu ki matamu, me votu kina na nomu luvawale. 27A nomu veibutakoci, kei na nomu daugagano, kei na levu ni nomu dautagane io na nomu i valavala vakasisila e na veiyasana cecere ni vanua, ka'u sa raica oti. Ena ca vei iko, Jerusalemi! ko na sega li ni vakasavasavataki? ena yaco ga ninaica?
Currently Selected:
JEREMAIA 13: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
