NA DAUVEILEWAI 20
20
Sa bose na veimataqali i Isireli, me ra vala kei na mataqali i Penijamini, e na vuku ni ka era a cakava ki na watina na Livai, 1-17. Era sa taroga na Kalou, ka qai la'ki vala kei ira na Penijamini mai Kipea, 18-20. Era sa gumatua na mataqali i Penijamini, 21-25. Era sa la'ki tagi na Isireli vua na Kalou; era sa qai gumatua, a sa voleka ni kawaboko na mataqali i Penijamini, 26-48.
1Sa qai lako yani ko ira kecega na Isireli, a ra sa soqoni vata vei Jiova ki Misipe ko ira nai soqosoqo, me vaka era le dua bauga na tamata, mai Tani ka yaco ki Pieri-sepa, kei na vanua ko Kiliati.
2Ia sa tu vata kei na nodra i soqosoqo na tamata ni Kalou ko ira na nodra turaga na tamata kecega, io na mataqali kecega i Isireli, era le vasagavulu na oba na tamata era sa taubale ka sa vakaiseleiwau. 3(Ia sa rogoca ko ira na mataqali i Penijamini ni sa lako cake ki Misipe ko ira na veimataqali i Isireli.) Era sa qai kaya ko ira na Isireli, Dou tukuna mai, se sa yaco vakaevei na ka ca oqo. 4A sa vosa na Livai, na wati ni yalewa ka vakamatei, ka kaya, Au a lako mai ki Kipea sa nei Penijamini, koi keirau kei na watiqu lailai, me moce kina. 5A ra sa ia me ra vakacacani au ko ira na kai Kipea, ka volita na vale ka'u sa tiko kina e na bogi; era sa nanuma me ra vakamatei au: ia era a taura vakaukauwa na watiqu lailai, ka vakacacana a sa mate kina ko koya. 6Ia ka'u a taura na watiqu lailai ka tavatava, ka vakauta ki na vanua taucoko era sa taukena ko ira na Isireli; ni ra a kitaka na ka vakasisila, kei na ka lialia e Isireli. 7Raica, koi kemudou kecega na Isireli; dou tukuna mada mai na ka dou nanuma, kei na nomudou lewa.
8A sa tu cake na tamata kecega me vaka era le dua bauga na tamata, ka kaya, Ena sega e dua vei keda me lako ki na nona vale laca, ena sega talega ni lesu e dua na tamata ki nona vale: 9oqo ga na ka eda na qai kitaka ki Kipea; eda na vakawiri madigi, ka lako cake kina: 10ia eda na kauta na tamata e lewe tini mai na le dua na drau mai na mataqali yadua ni Isireli, kei na le dua na drau mai vei ira na le dua na udolu, kei na le dua na udolu mai vei ira na le oba, me ra kau kakana vei ira na tamata, me ra qai sauma, ni ra yaco ki Kipea e Penijamini, me vaka na ka lialia era a kitaka e Isireli.
11A ra sa soqoni vata me ra kaba na koro ko ira kecega na Isireli ka ra sa yalovata me vaka era le dua bauga na tamata. 12A ra sa talai ira na tamata eso ko ira na veimataqali e Isireli ki na mataqali taucoko i Penijamini, ka kaya, A cava na ka ca oqo sa caka e na kemudou maliwa? 13ia mo dou qai soli ira na tamata, na luve ni ca era tiko e Kipea, me keitou vakamatei ira, ka vakaotia laivi nai valavala ca maivei ira na Isireli. Ia ko ira na mataqali i Penijamini, era sa bese ni muria na vosa ni wekadra, na Isireli; 14a ra sa soqoni vata ki Kipea ko ira na mataqali i Penijamini mai na veikoro, me ra la'ki veivala kei ira na Isireli. 15A ra sa wili na mataqali i Penijamini mai na veikoro e na siga ko ya, ka ra sa le ruasagavulu ka ono na udolu na tamata era vakaiseleiwau, kei ira tale na kai Kipea era sa wili, era sa le vitu na drau na tamata digitaki. 16Vei ira na tamata kecega oqo era sa le vitu na drau na tamata digitaki sa ligai mawi; ka ra sa daurabotaka yadua na vatu me sega ni cala sa na lauta e dua na drau ni ulu. 17Ia ko ira na Isireli, ni ra sa sega ni wili vata kei ira na Penijamini, era sa le vasagavulu na oba na tamata na kedrai wiliwili era sa vakaiseleiwau: era sa tamata i valu ko ira kecega oqo.
18A ra sa cavu tu na Isireli, ka lako cake ki na vale ni Kalou, ka taroga na Kalou, ka kaya, O cei vei keimami me liu yani, me veivala kei ira na mataqali i Penijamini? A sa kaya ko Jiova, Me ra liu ko ira na mataqali i Juta.
19A ra sa cavu tu e na mataka ko ira na Isireli, ka la'ki tiko vakaivalu ki Kipea. 20A sa lako yani ko ira na Isireli me veivala kei ira na Penijamini; ka ra tuvai valu ko ira na Isireli me ra veivala kei ira mai Kipea.
21A ra sa curu yani mai Kipea ko ira na Penijamini, a ra sa vakamatea e lewe rua na oba ka rua na udolu na tamata vei ira na Isireli, e na siga ko ya. 22Ia ko ira na Isireli, era sa vaqaqataki ira, ka tuvai ira tale vakaivalu e na tikina era a tuvai valu kina e nai matai ni siga. 23(A ra sa lako cake ko ira na Isireli, ka tagi e na mata i Jiova ka yakavi mai, a ra sa tarogi Jiova, ka kaya, Me'u lako tale, me'u vala kei ira na Penijamini na taciqu, se segai? A sa kaya ko Jiova, Dou lako ka vala kei ira.) 24A ra sa toro voleka yani vei ira na Penijamini ko ira na Isireli e nai karua ni siga. 25A sa curu yani e Kipea ko ira na Penijamini me vala kei ira e nai karua ni siga, ka ra yaviti ira tale na Isireli ka sa mate kina e le dua na oba ka walu na udolu na tamata; era sa vakaiseleiwau ko ira kecega oqo.
26Era sa qai lako cake ko ira kecega na Isireli, kei ira kecega na tamata, ka lako ki na vale ni Kalou, ka tagi, ka tiko kina e na mata i Jiova, ka lolo e na siga ko ya ka bogivaka, a ra sa vakacabora eso nai soro kama, ka so nai madrali ni veivinakati, e na mata i Jiova. 27A ra sa tarogi Jiova ko ira na Isireli, (ni sa tiko maikea na kato ni veiyalayalati ni Kalou e na gauna ko ya, 28a sa dauqarava ko Finiase, na luve i Eliesa, na luve i Eroni, e na gauna ko ya,) ka kaya, Me'u lako tale me'u veivala kei ira na Penijamini, na taciqu, se me'u kakua? A sa kaya ko Jiova, Dou lako cake; ni'u na soli ira ki na ligamu e na mataka.
29A sa lesia eso na tamata ko ira na Isireli me ra bika lawa voli ki Kipea. 30A ra sa lako cake ko ira na Isireli vei ira na Penijamini e nai katolu ni siga, a ra sa tuvai valu ki Kipea, me vaka eliu. 31A ra sa curu yani ko ira na Penijamini me tavaki ira na tamata, ka ra sa vakayarayarataki mai na koro; a ra sa vakatekivu me ra yaviti ira na tamata, ka mokuti ira mate, me vaka eliu, e na veisalatu, sa lako cake edua vaka ki na vale ni Kalou, ia na kenai karua sa lako e na were ki Kipea: era sa le tolusagavulu beka vei ira na Isireli. 32A ra sa kaya ko ira na Penijamini, Era sa moku tale, me vaka eda mokuti ira eliu. A ra sa kaya ko ira na Isireli, Tou dro mada, ka vakayarayarataki ira mai na koro ki na veisalatu. 33A ra sa cavu tu ko ira kecega na Isireli mai na nodra tikina, ka tuvai ira vakaivalu mai Peali-tamari: ia ko ira na Isireli ka bika lawa koto, era sa lako mai na nodra tikina, mai na vanua veico ni Kipea. 34A ra sa lako mai vaka ki Kipea e le dua na oba na tamata digitaki maivei ira kecega na Isireli, a sa ka levu nai valu: a ra sa sega ni kila ni sa voleka vei ira na ca. 35A sa yaviti ira na Penijamini e matadra na Isireli ko Jiova: ia sa vakamatea ko ira na Isireli e na siga ko ya e le rua na oba ka lima na udolu ka dua na drau vei ira na Penijamini: era sa vakaiseleiwau ko ira kecega oqo.
36A ra kunea ko ira na Penijamini ni ra sa moku: ni ra sa drotaki ira na Penijamini ko ira na Isireli, ni ra sa vakararavi vei ira era sa lesi me bika lawa koto mai Kipea. 37A ra sa totolo sara ko ira ka bika lawa koto, ka sikiti Kipea; ia ko ira sa bika lawa koto, era sa lako tu ka samuta na koro taucoko e nai seleiwau. 38Ia sa lesi e dua nai vakatakilakila vei ira na Isireli kei ira na bika lawa, me ra vakuvuya e dua na kubou levu me lako cake mai na koro. 39Ia ni sa suka mai nai valu ko ira na Isireli, sa ia ko ira na Penijamini ka mokuta mate e le tolusagavulu beka vei ira na Isireli; ni ra sa kaya, Era sa moku vakaidina e matada, me vaka e nai valu eliu. 40Ia ni sa kuvu cake na duru kubou mai na koro, era sa rai ki muri na Penijamini ka raica, sa lako cake ki lomalagi na kubou mai na koro taucoko. 41Ia ni ra sa qai vuki mai ko ira na Isireli, sa kidroa ko ira na Penijamini; ni ra sa raica sa yacovi ira na ca. 42Ia era sa vuki kina ka dro maivei ira na Isireli, e na sala ki na veikau; ia sa vauci ira nai valu: ia ko ira mai na veikoro era sa vakarusai e na kedra maliwa. 43Sa buku na kedra lawa na Penijamini, ka ra sa vakasavi ira, ka buturaki ira vakarawarawa e na yasai Kipea, vaka ki nai cadracadra ni mata-ni-siga. 44A sa mate vei ira na Penijamini e le dua na oba ka walu na udolu na tamata; era sa tamata qaqa ko ira kecega oqo. 45Ia era sa lesu ka dro ki na veikau ki na uluvatu ko Rimoni, ka ra sa vakamatea vei ira nai se e na veisalatu e le lima na udolu na tamata; ka ra sa vakasavi ira matua ka yacovi Kitomi, ka yavita vei ira e le rua na udolu na tamata. 46Ia ko ira kecega sa mate vei ira na Penijamini e na siga ko ya, era sa lewe ruasagavulu ka lima na udolu na tamata era vakaiseleiwau; era sa tamata qaqa ko ira kecega oqo. 47Ia sa lesu e le ono na drau na tamata, ka dro ki na veikau, ki na uluvatu ko Rimoni; a ra sa tiko mai na uluvatu ko Rimoni ka vula va.
48A ra sa lesu tale mai ko ira na Isireli vei ira na Penijamini, ka yaviti ira na tamata e na veikoro, e nai seleiwau, kei na manumanu e yavai va, kei na ka kecega era sa kunea: a ra sa vakama na veikoro kecega era sa kunea.
Currently Selected:
NA DAUVEILEWAI 20: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
